ANGEL PULIDO EL APOSTOLO DE LOS SEFARADIS

Es interesante ke en los 400 anyos i mas ke pasaron desde la Ekspulsion de Epanya, en 1492, asta los primeros anyos del siglo 20, kaje i no uvo ningun kontakto entre los espanyoles i los sefaradis ke se avian aresentado en diversas partes del mundo, i mas espesialmente en las tierras del Imperio Otomano.

De una parte, los sefaradis tenian el amargo rekuerdo de lo ke avian sufrido sus avuelos kuando salieron al exilo, abandonando sus kazas i todos sus bienes. Salvo muy pokas eksepsiones, ningun sefaradi no podia imajinarse mizmo el retorno a Espanya.

De la otra parte, los espanyoles kontinuavan a tener una imajen muy negativa de los djudios, aun ke en realidad ya no avia kedado en Espanya ningun djudio, i mizmo los desendientes de los konversos ya no azian mas ningun esforso para mantener en sekreto los prinsipios de la relijion djudia.

El trokamiento vino solo a prinsipios del siglo pasado en segito a las aktividades del senador Angel Pulido i un grupo de otras personalidades ke se djuntaron a el, yamando a renovar las relasiones i la kolaborasion kon los sefaradis.

Angel Pulido nasio en Madrid en 1852, fue mediko i lider politiko i ainda djoven, en sus anyos 30, fue elijido a la Akademia Real de Medisina, siendo el mas djoven miembro de esta institusion. El se dediko a la medisina asta ke entro en la politika en los anyos 80 del siglo 19. Era un erudito, kon profondos konosimientos de literatura i istoria. Tenia la pluma fasil i la prensa katolika liberala le servia de tribuna para la difuzion de sus ideas.

El empeso en su lucha en favor de los sefaradis en 1904, kon su livro Los israelitas españoles y el idioma castellano. Un anyo despues el publiko un sigundo livro, Españoles sin Patria y la Raza Sefardí onde trusho el rezultado de su korespondensia kon los dirijentes de las komunidades sefaradis del Sud-Este de Evropa i del Oriente Medio - korespondensia ke tiene grande valor por la rikeza i diversidad de informasiones ke trae sovre la situasion de estas komunidades al prinsipio del siglo 20.

Pulido eskrivio ke el buto de su aserkamiento a los sefaradis era en primer lugar nasional i espanyol. Estava konvensido ke los serka de dos milyones de sefaradis djudeoespanyol- avlantes ke, sigun el, bivian en el mundo al prinsipio del siglo 20, podian kontribuir a los interesos de Espanya; interesos ke avian sufrido muncho en la kriza de 1898 kuando, kon el tratado de Paris, los espanyoles pedrieron sus ultimas kolonias - Cuba, Puerto Rico i las Filipinas.

La aktitud de Pulido enverso las komunidades sefaradis era romantika. El admirava a los sefaradis ke segun el sovresalian por sus talento ekonomiko, sigun puede ser visto entre otras, de sus palavras, dirijidas a las Kamaras de Komersio, yamandolas a reconquistar la amistad de la raza mas comercial y mejor diseminada que existe en el mundo.

De la Real Akademia de la Lengua i de la Asosiasion de Eskritores i Artistas, el demando ke ayuden a la kreasion de eskolas i tambien de premios literarios ke estimulen la lengua djudeoespanyola i la aserken al kastiliano.

Pulido no pensava del todo en la posibilidad de un retorno en masa de los djudios a Espanya. A la kontra el dezeava ke eyos kontinuen a bivir en la Diaspora afin de ayudar de ayi a los interesos de Espanya en el mundo. Si tuvo la idea de retorno de un numero limitado de djudios, fue prinsipalmente pensando en imprezarios ke ayudarian a krear muevas emprezas i dezvelopar la ekonomia espanyola.

La aktitud de los sefaradis, de sus parte, frente a la posibilidad de un retorno a Espanya, fue ambivalente. De una parte, munchos konservavan el temor istoriko de la Inkizision i no konsideravan komo djusto i razonable de renunsiar a sus atadijos kon el Imperio Otomano ke les avia dado azilo en sus ora de apreto, kuando avian sido arondjados de Espanya.

Djuntos kon esto, en la mayoria de las letras embiadas al senador Pulido por eminentes personalidades publikas en las komunidades sefaradis, se reflekta una aktitud de simpatia a Espanya i de prontitud a lograr un reenkontro kon el puevlo espanyol, para el provecho de las dos partes.

En fin de kuento, los sefaradis no fueron enfrentados kon el menester de desidir si podian akseptar o devian rempushar las propozisiones del Dr. Angel Pulido. Malgrado todos sus esforsos, el no reusho a asigurarse el apoyo nesesario de los faktores governamentales espanyoles i no fue echo entonses nada de konkreto para la realizasion de sus proyektos. Aun kon esto, kale rekonoser ke su kampanya kontribuyo muncho a krear en Espanya una atmosfera de amistad i simpatia a los sefaradis i a sus kultura – por lo kualo munchos lo konsideran komo el “Apostolo de los Sefaradis”.