FILATELIA SEFARADI

Asta la sigunda metad del siglo pasado, la filatelia – el hobi de koleksionar timbros – era muy popular entre los ninyos no solo del paiz onde nasi, Turkia, sino ke de munchos paizes mas.

Sin saver la verdadera sinyifikasion del nombre de este hobi, filatelia, estos ninyos dedikavan largas oras a arekojer timbros (o pules sgun eran yamados en Turkia), despegandolos kon muncho kudio de las envelopes de letras ke resivian sus parientes, amigos o konosidos. La parte mas interesante del hobi venia despues: areglar estos timbros en albumes espesiales, en koleksiones aregladas sigun el paiz ke emitio el timbro o una gran variedad de temas komo portretos de personalidades famozas, panoramas de ermozos lugares, evenimientos importantes de la istoria, plantas o animales kuriozos i mas.

Este era un hobi interesante i atraktivo del punta de vista estetiko, por la ermozura de los timbros, kon sus formas i kolores plazientes, i tambien por su grande provecho del punto de vista edukativo. En efekto, en areglando los timbros segun sus paiz de orijin, o la personalidad o evenimiento istoriko o kualkera otra koza de la kuala se tratava en los timbros, los chikos ancheavan muncho sus konosimientos sovre la jeografia o la istoria de los diversos paizes del mundo, sovre las flores i plantas ke kresian i los animales ke bivian ayi, i muncho mas.

El livro “Filatelia Sefaradi” de Mordehay Arbell mos da una muchidumbre de exemplos sovre lo ke podemos embezar, grasias a la filatelia, no solo sovre la istoria, jeografia i mas de los diversos paizes, sino ke tambien sovre aspektos muy poko konosidos de la istoria i kultura de los sefaradis.

Ayi topamos por exemplo una seria de timbros sovre Juan Lindo, un sefaradi ke en el anyo 1841 fue elijido komo prezidente de San Salvador, en la Amerika Sentral. El se distingio, entre otras, por su desizion de fondar eskolas en todos los kazales de este paiz, kon una povlasion de mas de 150 personas, i tambien de fondar la Universidad Nasionala de El Salvador.

Lo interesante es ke, despues de aver terminado su kadensia komo prezidente de San Salvador, en el anyo 1847 el ue elijido komo prezidente de otro paiz sentroamerikano, Honduras, siendo ansi el uniko sefaradi ke yego a ser prezidente de 2 paizes – una klara prova de la mizura en la kuala gozo de fama i respekto.

El livro “Filatelia Sefaradi” mos traye munchos timbros mas sovre sefaradis ke se distingieron por sus alkanses en el mundo politiko, ekonomiko, kultural i mas; algunos de eyos muy konosidos komo la mujer de finansas i filantropa Dona Grasia Nasi, el filozofo Baruh Spinosa, el pintor Modiliani, el ke fue primer ministro de Inlglitierra, Benjamin Disraeli i tambien otros menos konosidos komo Sir Joshua Hasan, ke fue primer ministro de Gibraltar, o el prezidente de la Asanblea nasionala de Yugoslavia, despues de la II Gerra Mundiala, Moshe Piyade .

Ay tambien munchos timbros dedikados a los kales sefaradis en las diversas partes del mundo, i sovretodo en los Caribes, ansi ke monumentos diversos ke tienen relasion kon la istoria o la kreasion kulturala de los sefaradis.

Uno de estos monumentos es la Estatua de la Libertad, ke se topa en la izla Ellis, a la entrada del porto de New York. Lo ke se save de esta estatua es ke fue un regalo de Fransia a Estados Unidos, en sinyo de admirasion por los prinsipios de libertad i respekto por los derechos umanos en baza de los kualos se kreo esta gran demokrasia.

Kon el tiempo esta estatua yego a simbolizar a Estados Unidos komo el paiz ke avrio sus puertas a los miliones de imigrantes, munchos de eyos refujiados de payizes onde bivian en la mizeria, o de rejimes krueles i diktatoriales onde sufrian de diskriminasiones, maltratamientos i mizmo masakros estremesientes.

Este simbolizmo topo su ekspresion literaria en una poezia de Emma Lazarus, desediente de una las primeras famiyas sefaradis ke se aresentaron en New York. Traemos aki, en traduksion al ladino, la primera strofa de esta poezia, ke sus versos estan gravados en una grande plaka de bronzo en el piedestal de la estatua.

Ansi es dicho en estos versos, kon los kualos la esatua se adresa a los paizes de onde vienen los imigrantes:

Dadme vuestros proves, vuestros kansados

Vuestras masas ansiozas de respirar libremente

Los mizerables refuzados por vuestras kostas

Embiadme esta djente sin kaza, reskapada de tempestas

Mi entorcha les aklara el kamino a la oportunidad.

Sigun es kontado en la biografia de Emma Lazarus, eya eskrivio esta poezia komo parte de una kampanya ke avia sido echa afin de arekojer fondos para fraguar la baza de la estatua. En efekto, los fransezes avian embiado la estatua komo regalo, ma a kondision ke los amerikanos fraguarian la baza, el piedestal sovre el kual seria montado este djigantesko monumento.

La realizasion de este proyekto no fue fasil. Uvo menester de asperar unos kuantos anyos asta ke fue desidido de empesar en una kampanya para arekojer los fondos menesterozos por medio de donasiones del publiko. Fueron organizadas asenbleas en las kualas fueron echos deskorsos; fueron eskritos artikolos i panfletos, i entre otras uvo tambien ken demando de Emma Lazarus de eskrivir un poema ke pueda ekspresar la importansia del proyekto.

Es ansi ke nasio el poema “El Muevo Koloso”, en el kual Emma Lazarus ekspreso sus sintimientos al ver la mizeria de los imigrantes ke yegavan a New York. Eyos devian asperar en la izla Ellis, a la entrada del porto, asta ke se terminavan los examenes medikales i los areglos burokratikos, antes ke les sea permetido de entrar a New York i de ayi a otras partes del paiz onde se aresentavan mas o menos definitivamente.

Kuando fueron arekojidos los fondos menesterozos i ke se termino la konstruksion del piedestal sovrel kual fue alevantada la Estatua de la Libertad, en su baza fue metida la plaka de bronzo kon el poema ke resivio desde entonses, kon palavras enkorajantes, a todos los ke eskojeron de emigrar a Estados Unidos i empesar ayi una mueva vida.

Oy, kon el Internet i todos los medios dijitales de los kualos dispozamos, kreo ke ya no ay munchos ninyos ke se dedikan a arekojer timbros i areglarlos en albumes sigun sus temas, ma para mi i munchos mas este es un hobi ke me ayudo saver algo sovre aspektos de muestra kultura ke otramente no uvieran yegado a mi konosimiento.