Los ojos de la suegra

Avía una s.huegra i una almuera. A la s.huegra no l`agradava dar a komer a la almuera.

Un día la s.huegra kayó hazina i le disho a l`almuera: "No te pareska" disho, "ke yo sto echada akí i no vo ver lo ke stas komiendo!"

Le disho eya: "Komo puede ser? Eya sta echada akí i yo sto ayá…"

Ama la s.huegra, antes ke se echara hazina, se fue al charshí, merkó dos ojos de vaka, los apegó en la puerta de la kuzina.

Le disho a l`almuera: "Kuando vas a entrar a la kuzina, alevanta los ojos a la puerta, i vas a ver los ojos míos apegados ayá."

Ansina ke kada vez ke l`almuera entrava a la kuzina, mirava ke stavan los ojos ayá i no komía nada.

Un día le disho la vizina: "Kualo te stas aflakando?"

Le disho eya: "Kualo ke te konte? Eya sta echada en la kama i los ojos los tiene en la kuzina!"

Le disho la vizina: "Kualo stas avlando!!" Stiró la mano, los kitó los ojos i le disho: "Bova! Todo puedes komer!"

I de akel día l`almuera bivió oroza.

Kontado por ESTER VENTURA - 1990