Yehuda i Shomron territoryos istorikos aparteniente solo a los djudios i mas a dingunos, mos demandan dezde 50 anyos en el derredor diplomatiko en referandose a las leyes internasyonalas, sin spesifiar las kualas, de decharlos a los arabos komo terra araba. Israel konkisto esta zona inkluida en el mandat Britaniko establisido por la Liga de las Nasyones en 1917 i akaparada por la Jordania en 1948, en el anyo 1967. Lo ke kere dizir ke la apartenensia de estos territoryos no son okupados ma” disputados” entre Israel i (si ve un dia su kreasyon), el estado palestiniano. Achakito mi ermaniko los dirijentes de la otonomia palestinyana dezde 1967 i kon insistensia en muestra epoka no keren meterse al torno de una meza i diskutir de la kestyon. Eyos pretenden ke de Yehuda i Shomron (Y i S) devemos tomar atras los serka 350.000 djudios establisidos en los ultimos 50 anyos .
La surpreza fue grande kuando el sekretaryo del estado Mike Pompeo, de los Estados Unidos (EU) en su deklarasyon de la semana pasada aklaro ke el establisimiento sivil de los israelianos en Y i S , no kree dingun enkonveniente politiko i ke no es en opozisyon a las leyes internasyonalas. Ansi anulo la idea de sus viejos kolegas sekretaryos ke dizian el kontraryo..
Enteresandome al sujeto topi munchos aklaramyentos a este sujeto ke yevan una importansia muy grande para la defensa de Israel en jeneral i de Yerushalayim en partikular ke vos resumo aki.
-El statuto de los djudios ke biven en Y i S, es nomado en diferentes formas. El mas uzado es yamar los establisimientos de los djudios ‘settlements’.Lo ke kere dizir ahuera de Israel. Los Jordanianos en 1950 kuando aneksaron los territoryos en kestyon inventaron el biervo ‘west bank’ para markar la ekspulsion illejitimada de los djudios ke bivian aya. Ma este nombre no fue konfirmado ke solo por los britanikos i mas por dinguna nasyon. El nombre el mas empleyado es Yehuda i Shomron, nombre bibliko ke fue utilizado mizmo por las Nasyones Unidas antes 1950. Dunke podemos insistir de las nasyones amigas de Israel de uzar solo este nombre. Por kontra los arabos, las Nasyones Unidas(NU),la Union Evropea (UE) insisten a emplear el biervo ‘settlements’ para los lugares okupados por los israelis djudios, insistiendo ke esto no es en konformita kon los prensipyos internasyonales todo en non dando detalyos sovre eyos.
-Es ke Y i S, son terras okupadas ¿ En analizando las leyes ke rijen las kondisyones sovre la ‘okupasyon’ del kuatren Pakto de Jenevra, su artikolo 49-6 ovliga a protejar la povlasyon otoktona okupada en el territoryo en konflito. En el kavzo de Israel eya de dinguna manera no miro de ekspulsar los 300.000 arabos ke biven en Y i S i de no darles la libertad de movimiento ke konosemos en la zona C, establisida kon los akordos de Oslo. Ademas Israel sinyo en 1994 la pas kon la Jordania i en el akordo es dicho klaramente ke las dos partes achetan tal i kual los territoryos de kada parte komo son establisidos aktualmente. Dunke Y i S ke azia parte del Mandat keda en las manos de Israel i no puede ser konsiderada zona okupada sovre todo ke nunka apartuvo a una entita palestiniana.
-Kualo de mas nesesita Israel para azer achetar Y i S komo terra nasyonala? Munchos politikos amerikanos influentes en la politika mondiala, estan deakordo ke estos territoryos no apartuvieron del todo a una entita independiente soverana.Demandar ayudo de esta djente sera importante.. Tomar avantaje de la deklarasyon de Pompeo i forsar las NU i la EU los kualos insisten malgrado ke sus argumentos son falsos de deklarar komo Obama en su tiempo,las implantasyones djudias “illejitimas”. Arrivar a konvenser toda esta djente no va ser un lavoro fasil realizavle en kurto tiempo.
Oy egziste varios grupos antisemitas i antiisrael ke miran de boykotar los produk tos fabrikados o kresidos por las komunidades establisidas en Y i S. Los governos a los kualos apartienen en deklarando las komunidades djudias illejitimas les dan la posibilita komo boykotar los produktos israelianos, no solo esto, mizmo krear entrompesos en las relasyones de puevlo a puevlo. Estas diskriminasyones despues de la deklarasyon de Pompeo no vana ser esperamos vistas kon un buen ojo en EU. El governo de Trump pro Israeliano puede deklarar kontra estos grupos i sus payizes boykot de sus produktos koza ke los va meter en grande ataganto.
Por fin Israel deve mirar kon pasensia i grande diplomasia a kontinuar a anchear sus relasyones kon los payizes arabos en jeneral para konvenserlos a ke forsen a sus 2 ermanos palestinianos a asentarse kon Israel i a negosiar una pas mizmo yelada , bien entendido en guadrando Y i S para Israel.