Esta semana varios jurnales djudios, transmetiendolo del Jewish Telegraphic Agency, publikaron artikolo sovre el filmo yamado "Sefarad", produsido en Portugal, ke muevamente esta obtenible en iTunes i ke en el 15 de Desembre va salir en Amazon Prime. (Meldarlo en: https://www.jta.org/quick-reads/tiny-portuguese-jewish-community-makes-a-1-2-million-feature-film-about-its-history.) El anunso lo trato komo ke fuera un filmo muevo, ma la realidad es ke ya fue distribuido en djenayo (January) pasado, i en mayo fue mostrado en el Jewish Film Festival de Toronto, Kanada ( i posiblemente en otros lugares tambien.)
Seguro ke lo enteresante, i la razon de mereser un artikolo, es el tema i el koste del filmo. El trata de la istoria de los djudios de Portugal del siglo 15 asta el prezente, uzando estorias de personas verdaderas, i saltando de una epoka a otra. Una seksion emportante es sovre el ofisier militar (lieutenant) Artur Carlos de Barros Basto, konsiderado komo el "Dreyfus" de Portugal. En los anyos de 1920 Barros Basto perkuro i parvino a estableser vida djudia en la sivdad de Porto, ma despues fue echado de la armada kon akuzasiones falsas. Vos do aki un kurto sumaryo de su vida:
Artur Carlos de Barros Basto
Nasyo en Porto en una famiya katolika, ma de chika edad su nono (granpapa) antes de murir le disho ke eran de famiya djudia. En una sinagoga en Lisbon en 1904 desidio de tornar a la relijion de sus ansestros. El partisipo en la Primera Gerra Mudial komo ofisier en la armada, i fue dekorado por su eroizmo.
Se konvertio al djudaismo en Tanjer i tomo el nombre de Abraham Israel Ben-Rosh. Se kazo kon djudia i tuvo grande famiya. Se dediko a topar otros kripto-djudios i konverserlos de salir a luz komo djudio. Establesio eskola para embezar el djudaismo a las kriaturas. Fondo una kehila, ke finalmente en 1930 paso a ser la ermoza sinagoga Kadoorie en la sivdad de Porto. Esto todo le izo munchos enemigos en el governo de Salazar. Kon akuzasiones falsas, el fue kondanado en 1938 i echado de la armada. Murio en provedad en 1961. Finalmente en 1997 el governo de Portugal admetio ke era inosente, i le rehabilito su onor. Oy biven 400 djudios en Porto.
La inyeta de Barros Bastos, Isabel Ferreira Lopes, es la aktual vise presidente de la komunidad djudia de Porto. I el es el grand-tio de la aktrisa Daniela Ruah.
Ken pago por el koste del filmo?
El filmo Sefarad kosto mas de 1,2 milyon de dolares, el mas karo filmo ke se tiene produsido sovre una komunidad djudia. Ken pago por el filmo? Al pareser no keren ke se sepa egzaktamente. Una persona de la komunidad ke kijo kedar anonimo, disho ke vino de las sumas ke kovraron de las personas de diversas partes del mundo ke se adresaron para tomar sertifikado de desendensia djudia en kamino para tomar la nasionalidad Portugeza. Otra persona disho ke las paras vino "de fondos privados."
En todo kavzo, el filmo parese ser muy bueno. La promosion se puede ver
en https://vimeo.com/325213906 . Espero ke lo van a trayer al Festival de Filmos Djudios (Jewish Film Festival) en Dallas al anyo ke viene. En todo kavzo, agora lo podemos enkomendar de iTunes o en Desembre, de Amazon Prime.