Muzeo de La Shoa en Dallas, Turkia, i Koinsidensias

Todos los turkanos ya savemos ke el 10 de Novembre (el dia ke esto eskriviendo esto) es el aniversaryo de la muerte de Ataturk en 1938. I komo djudios, savemos tambien ke es aniversaryo de Kristallnacht ("noche de vidros rompidos") el grande pogrom kontra los djudios de Almanya en la mizma data. Mas djusto dizir, la desgrasia en Almanya fue en la noche del 9 al 10 Novembre, i Ataturk muryo a las 9:05 de la demanyana (ora lokal) del 10 Novembre. Ma las dos novedades aparesieron el mezmo dia, 10 Novembre de 1938, en la oja prinsipal de jurnales del mundo. Remarki esto munchos anyos atras, en el Dallas Morning News de dicha data ke estava ekspozada en el Muzeo del Holokausto en Dallas, kon los dos haberes en la prima oja.

El museo de Dallas fue fondado en 1984 por un grupo de reskapados de la Shoa, i es el primer museo ke tuvo un vagon de los ke yevaron djudios a sus muerte en los kampos nazistas. Despues de 15 anyos situado en una parte del JCC (Sentro Komunal Judio), paso a al 3er etaj de un edifisio en el sentro de la sivdad ke se avia echo famozo (o infamozo) en 1963, porke Fue del 6en etaj de aki ke Lee Harvey Oswald tiro i mato al Prezidente John F. Kennedy en el 22 Novembre de 1963. I es aki ke esta situado el museo "The Sixth Floor Museum" dedikado a la vida i la asasinasion del dicho Prezidente (Si vos enteresa, podesh ver el sitio: https://www.jfk.org/the-museum/ ).

En este edifisio el muzeo de la Shoa troko su ombre a "Dallas Holocaust and Human Rights Museum" (Muzeo del Holokausto i de Derechos Umanos), DHHRM en kurto, i resivio munchos fondos para fraguar un muevo edifisio. Finalmente este Septembre pasado el DHHRM se avrio en su propria fragua mueva, grande i moderna. (Podesh verlo en: https://www.dhhrm.org/ ) Mozotros asistimos en la aviertura, entre muncha djentorya. Agora no solo ke la seksion de la Shoa es mas grande, ma tambien ay seksiones dedikadas a otros puevlos i grupos ke sufriyeron krueldad, jenosidio, ekspulsion, i mizerya. Entre eyos estan Amerikanos Nativos (Indios), los de Rwanda, Cambodia, i mas, i - siguro - los Armenos. (Todo kon fotografias, filmos, videos, i tekstos.) No es menester apuntar ke la Turkia no esta tomando un buen nombre en esta ekspozision. Esta mensionado (kon foto i teksto) tambien la inundasion del vapor Struma.

Ma, de otro lado esta Selahattin Ulkumen - el konsul turko de Rhodes (Rodos) ke salvo 42 personas - entre los pokos "djustos" ilustrados kon foto i teksto. En Dallas ay una grande komunidad de turkos, ma no se si dingunos de eyos tienen ido a este muzeo. I no se si otros vijitadores remarkan estas relativmente pokas mensiones konsernando la Turkia, o a ke grado estas mensiones ayudan a eliminar o enforsar prejuisios kontra la Turkia ke egziste en este pais, ande biven tantos milyones de gregos i armenos, i munchos otros ke simpatizan kon eyos.

En el edifisio muevo de la DHHRM, bushki a ver el jurnal Dallas Morning News del 10 Novembre 1938 ke dava la notisia de Kristalnacht djuntos kon la de la muerte de Mustafa Kemal Ataturk, i ke yo avia visto munchas vezes en su viejo lugar, ma no estava aki! Avia solo kipures (pedasos kortados) de varios jurnales ke davan el haber de Almanya solo. Un dia vo ir a bushkarlo en los archivos del muzeo, ke siguro estara ayi, i lo vo fotografear.

Meldi en una revista ke la muerte de Ataturk en 1938 fue un grande haber en Almanya, i tuvo muy grande lugar en sus jurnales. Siguro ke estos no mensionaron Kristalnacht.

Por konkluir vendremos a otra koinsidensia del mez de Novembre. mezYa mensioni ke el prezidente Kennedy fue asasinado el 24 de Novembre 1963. Vos akodrash ken tambien fue asasinado en este mez? Yitzhak Rabin, en 4 Novembre 1995. En el kalendario djudio era el 12 Heshvan del anyo 5756. Oganyo el 12 Heshvan era el 10 de Novembre, dia de la muerte de Ataturk.

Ishalla ke tengamos koinsidensias buenas de agora endelantre.