DONA GRASIA

Una de las mas interesantes i importantes figuras en la istoria de los Djudios de Turkia es Donna Grasia Nasi, una mujer ke por su rikeza, su saviduria i su influensa, yego a una tala fama ke los djudios de su tiempo la yamavan simplemente "La Sinyora".

Donna Grasia nasio en Portugal, en los primeros anyos del siglo XVI, en una famiya de anusim, djudios ke avian fuyido de la Inkizision de Espanya i ke malgrado ke avian sido ovligados a konvertirsen al kristianizmo mantenian en sekreto sus fe en la relijion djudia.

Donna Grasia ke se avia kazado kon uno de los anusim mas rikos de Lisbon, embivdo siendo ainda relativamente djovena, eredando una de las mas grandes fortunas de Portugal. Espantandose ke sea ovligada kon uno de los nobles kristianos, eya topo el kamino de salir del paiz kon toda su fortuna. Al prinsipio bivio en Flandres, oy Beljika ma ke entonses se topava basho dominio espanyol. De ayi paso a Italia i en 1553 sovre la invitasion del sultan turko Suleyman el Manyifiko, yego a Estanbol onde se instalo en un grande i ermozo palasio en la uria del Bosfor.

Eya dezvelopo muy buenas relasiones kon el Sultan i aprovecho su influensa para ayudar a los djudios no solo en Turkia sino ke en otros paizes tambien, segun se puede ver por enshemplo, de su aksion kontra la sivdad de Ankona, en Italia.

Esta era una sivdad onde, en la primera metad del siglo XVI, se avia dezvelopado una komunidad djudia rika i floresiente ke inkluiya anusim tambien. . Una buena parte de los djudios de esta sivdad avian yegado sovre la invitasion del Papa Paolo III, i avian ayudado a dezvelopar las relasiones komersialas kon paizes ajenos, aziendo de Ankona uno de los prinsipales portos italianos en el Mar Adriatiko.

Ma la situasion troko en 1555, kuando yego al poder el Papa Paolo IV, ke kito leyes antisemitikas. El ovligo a los djudios de Ankona a bivir en un geto i limito sus aktividades komersiales. La situasion se deterioro ainda mas, kuando 51 de los anusim de esta sivdad fueron arrestados komo djudaizantes, konversos ke kontinuavan a kumplir los uzos i ritos djudios, "krimen" por el kual, en akeyos dias, la pena era de ser kemado bivo.

Al yegarle las primeras novedades sovre este dezvelopamiento, Donna Grasia se adreso imediatamente al Sultan Suleyman el Manyifiko demandandole de intervenir. I en efekto, el Sultan embio al Papa una letra akavidando, en terminos muy serios i duros, ke si los djudios de Ankona no eran liberados, el responderia tomando mizuras kontra los kristianos en su imperio.

Esta letra tuvo un rezultado imediato i el Papa ordeno de liberar a los anusim de Ankona. Ma el orden yego solo despues ke 25 de eyos ya avian sido matados en medio de las flamas, lo ke kavzo un grande estremesimiento en el mundo djudio.

En reaksion a este akto salvaje de las otoridades de Ankona, Donna Grasia yamo a los komersantes djudios del mundo entero a boykotar al porto de Ankona i embiar sus merkansias al porto de Pizarro. Este boykot, ke fue en realidad el primer akto politiko de su djenero en la istoria de la Diaspora, kaje ke reusho; ma en fin de kuento el duvo ser anulado en segito a la pression… de los djudios de Ankona djustamente, algunos de entre los kualos se espantaron de las konsekuensas ke podria tener este akto.

Ma mizmo si no reusho, este boykot fue eskrito en la istoria komo el primer kavzo en el kual los djudios aprovaron de emplear sus fuersa ekonomika para luchar kontra sus persekutores; la primera vez en la kuala fue solevantada la posibilidad ke los djudios tomen mizuras al nivel internasional para salvar a sus ermanos.

De este punto de vista se puede dizir ke Donna Grasia fue la prekursora de la lucha ke es echa oy dia, por medios politikos i ekonomikos, para ayudar i salvar a los djudios ke estan en apreto en kualkera parte del mundo.

Ma no solo esto. Dona Grasia i su yerno Don Yosef Nasi tienen a sus kredito una inisiativa ke si uviera reushido, los djudios uvieran yegado a tener un estado independiente muncho antes de la kreasion del estado de Israel.

En el anyo 1561 eyos obtuvieron del sultan un firman permetiendoles de rekonstruir la sivdad de Tiberia, ke estava entonses kaje kompletamente en ruinas, i aresentar ayi djudios ke puedrian mantenersen, entre otras, del kultivo de arvoles de mora, pozando la baza para una industria de seda.

La sivdad fue efektivamente rekonstruida i entornada de murayas ke asiguraron su defensa kontra los trivos de beduines de los entornos, ma pokos djudios solo respondieron a la yamada de azer sus aliya i aresentarsenen la sivdad rekonstruida. Despues de pokos anyos munchos de entre eyos abandonaron el lugar, pedriendo ansi la okazion de krear ayi una grande i floresiente komunidad djudia ke uviera podido ser la baza de un estado djudio ainda en el siglo 16.