Kuando esto en viaje me agrada siempre vijitar una sinagoga, i si es posible toparme en una tefila ayi. Este Sukot pasado estava en Londra, Inglitierra, i keria ir a la kehila sefaradi de ayi. Ay dos: la una es la mas istorika, konosida komo Bevis Marks, ke es la primera sinagoga de Inglitierra, i la otra es la de Holland Park, ke fue fondada por emigrantes de Salonik i Turkia en el empesijo del siglo 20.
Anyos atras ya estuve en Bevis Marks, i ya se ke orasyonan al stilo Sefaradi-oksidental, komo en la sinagoga Portugeza de Amsterdam, o en Shearit Israel konosida komo "Spanish-Portuguese", de New York. Esta ves estava pensando de ir a la de Holland Park, ke es al stilo oryantal muestro, aunke i esta se yama "Spanish-Portuguese".
Ke ay en un nombre?
Antes de kontinuar, una nota sovre los nombres de estas kehilot. Jeneralmente kuando se yaman "Portuguese", o "Spanish-Portuguese", kijo dizir ke son de los sefaradis oksidental. Estos son los sefaradim ke se fueron direktamente de Espanya i/o Portugal a Hollanda, i de ayi a Inglityerra, las Amerikas, las islas del Karib, ets. Lo mas de eyos fueron de los ke fueron uvligados a konvertirsen en Portugal, i kuando pudieron salir de ayi, retornaron a sus fe djudia. Kijo dizir ke nunka fueron al "oriente", komo lo izieron muestros aguelos. Tienen sus proprias uzos i melodias relijiozas, diferente de lo muestro i de los ashkenazis tambien.
I en el kavzo de las kehilot sefaradis de Londra, la kestion de nombres se komplika un poko, porke tienen nombres paresidos. La de Bevis Marks (Bevis Marks es el nombre de la kalejika ande se topa) se yamava "Spanish Portuguese Jews Congregation", i tiene su nombre verdadero ke es K"K (Kehila Kedosha) Shaar Ashamayim. La de Holland Park se yamava "The Sephardi Congregation of Levantine Jews," i agora se yama "Spanish Portuguese Congregation, Holland Park. I su nombre ebreo es K"K Shaar Ashamayim Knesset Sason David!
Sukot en la K"K Shaar Ashamayim de Bevis Marks
En primero vos kontare la razon ke finalmente me fui a la kehila de Bevis Marks.
Kuando vo a un lugar muevo, tomo mas grande plazer si me puedo enkontrar kon una persona ke konosko ayi. En Londra no konosko a dingunos personalmente, ma se ke tenemos miembros de Ladinokomunita en Inglitierra. Antes de mi viaje les eskrivi a eyos (tres personas) i dos me respondieron, kon alegria de kerer enkontrarme. El uno, Michael Alpert, keria enkontrarme en el otel el dia ke arivi porke se estava indo en viaje al dia, ma yo no pudi, i no mos se fado enkontrarmos. El otro, Lawrence Kilshaw, me disho ke el ayuda en la hazanut de Bevis Marks, i ke se va topar ayi en Shabat. Seguro ke ke prefero ir ande konosko una persona, i seguro ke kero konoser un miembro de Ladinokomunita.
Yegi djusto kuando empesaron a meldar el SeferTora. Algunos de los ombres en la Teva, inkluzo el haham, vestian el chapeo chilentro (silindir) preto, komo tambien es el uzo en la kehila Spanish-Portuguese de New York. La teva es en medyo, komo en todas las kehilas sefaradis viejas. Los vestidos de los SifreiTorah son komo los de Turkia, de rpa brodada. Kreygo ke avia unos trenta ombres asentados en los bankos al deredor.
Seguro ke la azara de mujeres es ariva, i es ayi ke me asenti. Las otras mujeres, 6-7 d'eyas, estavan asentadas endjuntos en un banko. Yo me asenti en otro, i despues ke ya se yevaron las seferToras al Ehal, i se eskapo esta parte del servisio, me alevanti a mirar los vestidos de seferTora viejos ke estavan ekspozados en almarios por atras. La una era echa del fostan de novia de la sinyora de Moses Montefiore!
El sermon del haham estava muy enteresante, sovre todo ke siendo el Amerikano, avlo de los arvoles "Sequoya" en California ke tienen 2000 anyos, i komo el puevlo djudyo semos komo estos, ke no emporta lo ke akontese en muestro deredor, kontinuamos a bivir i estar fuertes, ets. Los lugares i arvoles ke mensiono, todos los konosia yo.
Kurto lo azere, el servisio se eskapo, i yo dainda no se kual de los hazanim es mi amigo Lawrence. Le demandi a una mujer ke avia venido despues de mi i se asento a mi lado. Me disho ke eya me lo iva amostrar abasho. Salimos afuera, i kaminimos enverso la suka. Lawrence era el alto i ermozo djoven kon la ermoza boz. Kuando mos prezento, no vos puedo dizir la bienvenida ke me izo. i la alegria ke sintimos los dos.
Tuvimos mazal ke el tiempo estava bueno i se pudo azer la seuda en la ermoza suka. (Lawrence me disho ke jerneralmente aze luvya kada dia de Sukot!) No solo ke me se fado estar i komer en la suka, i tener un ermozo djoven amigo a mi lado, tuve tambien mas onores. Lawrence se alevanto i me prezento al grupo kon biervos elokuentes de alavasiones, sovre todo por mi lavor en Ladinokomunita. I despues ke ya kantaron todos el Birkat amazon en ebreo, i kantaron tambien la kantika "Bendigamos al Altissimo" ke munchos konosemos, Lawrence kanto el Birkat Amazon en Ladino ("Ya komimos i bevimos, i al Dio Santo Bendicho El bendishimos, ets...) de una manera la mas ermoza ke la tengo sintido!
Fue el mas ermozo dia de mi estada en Londra, grasias a mi amigo Lawrence Kilshaw.
Post-Script:
Ay muncho de kontar sovre esta ermoza istorika kehila de Bevis Marks, i de los sefaradim de Inglitierra. Puede ser en otro artikolo. Entre myentres podesh topar toda ls enformasion, i munchas fotos, en Internet.