Entre los numerozos lugares onde toparon refujio los djudios ekspulsados de Espanya en 1492, i despues de eyos los anusim ke reusheron a salir de Espanya i sovretodo de Portugal, merese una mension espesiala la sivdad de Amsterdam, la kapitala ekonomika de Nederland, mas konosida de antes komo ‘Holanda o Paizes Bashos, i onde estos refujiados reusheron a krear una komunidad prospera i floresiente.
Esto fue posible porke, a la diferensia de Fransia, Italia i otros paizes onde el katolisizmo era la relijion de estado, i onde los djudios ke avian sido konvertidos por la fuersa i kerian kontinuar a kumplir las mitsvot del djudaizmo korrian el peligro de ser arestados por la Inkizion, torturados i kemados en los autos da fe, ‘Holanda avia adoptado el kalvinizmo (uno de los ramos de la relijion potestante) i era muncho mas liberal i tolerante.
‘Holanda venia de liberarse, en la sigunda metad del siglo 16, despues de averse revoltado kontra el reynado de Espanya. Kon la independensia se dezvelopo i se enfuertesio ainda mas la ekonomia de este paiz ke era bazada prinsipalmente sovre el komersio internasional. Rekonosiendo la valor de los anusim ke fuiyan de Portugal i ke eran konosidos por sus kapachidades komersiales, eyos fueron resividos en Amsterdam, al prinsipio komo kristianos, aun ke todos savian ke eran djudios. Kon el tiempo eyos resivieron la autorizasion de profesar aviertamente la relijion djudia i mizmo de fraguar sus ‘esnoga’, uno de los mas grandes i mas ermozos kales de akeya epoka, i mizmo de muestros dias.
Los djudios de Amsteram kontribuyeron de una manera muy apresiable al dezvelopamiento de la ekonomia neerlandeza, i mas espesialmente a su komersio internasional, en el kual gozavan de un avantaje muy importante. Eyos tenian en efekto kontaktos de grande valor kon los komersantes djudios ke se avian aresentado en otros paizes i mas espesialmente en el Muevo Mundo. Aprovechando la konfiensa mutual ke reynava entre eyos, los sefaradis de Amsterdam reusheron a dezvelopar el komersio internasional de Nederland al punto ke depaso al de Espanya i otros paizes evropeos. Se kreo ayi una sosiedad onde las klasa mas apresiada no era la aristokrasia, komo en los otros paizes evropeos, kon sus barones, kondes i dukes, sino ke los komersantes, munchos de entre eyos djudios, ke reushian en sus echos i akumulavan grandes fortunas. Grasias a estos alkanses, los djudios de Amsterdam, i de otras sivdades tambien en Nederland, se ganaron una yena igualdad de derechos kon los otros sivdadinos, i mizmo sus respekto i admirasion.
Esto sovresale, entre otras, por el importante lugar ke los djudios i la relijion djudia okupan en la ovra del ke es konsiderado komo el mas importante pintor de Nederland, Rembrandt . Su ovra inkluye no solo portretos de algunas personalides sentrales de la komunidad djudia de Amsterdam, komo Menashe Ben Israel i el mediko Efraim Bueno, sino ke tambien munchas pinturas sovre temas biblikos. Son muy famozas, entre otras, sus pinturas sovre el Sakrifisio de Yitzhak, Yosef i Putifar, la Eskalera de Yaakov, el Kombate de David i Goliat”, el Festin de Baltazar i mas. En las figuras de estos personajes biblikos, kon sus vistimienta de rikos kolores i sus grandes turbanes, kaje siempre ornados de piedras presiozas, se nota una sierta maestad y nobleza i un aire de lukso i splendor.
A ke era devida esta remarkable simpatia de Rembrandt por los djudios? A sus aire oriental ke los konvertia en modeles ideales para sus pinturas sovre temas biblikos? O se tratava simplemente del dezeo de akontentar a los klientes rikos de su profesion de portretista?
Una de las razones por las kualas Rembrand iva bushkando entre los djudios de Amsterdan, las figuras ke podian servirle de modelo para sus kompozisiones sovre temas biblikos era. muy probablamente, ke el bivia serka de eyos, en la Kaye de San Antonio ke fue yamada despues Kaye Ancha de los Djudios (Jodenbresstraat).
El bivia en un mundo libre de predjudisios. Sus temas estavan ayi, en la kaye, entre kalvinistas, katolikos i djudios. Esta konvivensia entre lo kristiano i lo djudio, en una atmosfera de respekto i toleransia, fue algo de uniko ke se dezvelopo en Amsterdam, en los Paizes Bashos, komo konsekuensia del kamino partikular ke avian eskojido los ‘holandezos en el kampo de la relijion. La familiaridad de los temas biblikos era fondamental onde los ombres de la Reforma Protestante ke tornavan al Antiguo Testamento, bushkando sin miedo la libre interpretasion de sus tekstos.
Amsterdam fue, entonses, la Yerushalayim ‘holandeza onde los djudios, libres de restriksiones relijiozas, pudieron desvelopar sus kapachidades komersiales, kontribuyendo a la prosperidad de sus komunidad i de la sosiedad al seno de la kuala bivian, despertando tambien la kuriozidad i el intereso de Rembrandt - vizino, amigo i portretista de munchos de eyos. El mesaje de konvivensia ke reflekta su ovra tiene vigor para todos los puevlos i todos los tiempos. El aze sovresalir ke oy mas ke nunka, a la dinyidad i al respekto mutual se yega solo por los kaminos de la toleransia.