MIRIKIYA I ESPERANSA

Empesamos el anyo 5780 bastantemente kon mirikiya. El Medyo Oriente onde mos topamos esta buyendo, la Turkiya mira de okupar el sud- este de su frontiera kon la Siria en atakando para repushar a los Kurdes ke biven en esta zona. El Iran mira kon el apoyo de Bashar el Asad de avrirse un kamino a traverso el Irak i la Siria para vinir atakarmos direktamente kon su proksi Hezbollah en el Golan. Los Seudianos en el sud de sus payis son atakados por los shiites Yemenites ke les azen muncho danyo material en bombardando juntos kon el Iran sus instalasyones de petrol i mas. La lista de los konfliktos i la inimista ke egzisten entre los vizinos arabos del deredor de Israel no se eskaparan en serka i la impresyon ke tenemos es ke perduraran siempre.

Israel en este konteksto esta kalmo, ma su armada esta 24 oras al dia espierta para responder a todo modo de atako ke le viendra. De punto de vista nasyonal en Israel el puevlo es determinado a defenderse solo sin la ayuda de sus aliados, komo se komporto siempre en las gerras del pasado. Ademas el payis esta en una kriza de governo ke no se save komo se topara la formula para elijir el muevo governo. Situasyon kritika ke premura ser atakanada en urjensia.

Enfrente de este tablo triste de oy en diya dire ke malgrado todo ay surprizas agreavles ke mos azen plazer. Ansi vos informare ke los payizes arabos del Golfo Persiko estan kaji prontos a kambiyar sus politikas enverso Israel malgrado ke el konflikto palestiniano persiste. Finalmente los reyes, prenses i dirijentes de los payizes de la rejion entendieron enfrente la menasa del Iran, ke el mijor remedyo es de kolaborar kon Israel. Ansina ke una vida mueva inflorese para los djudios en esta parte del mundo.

Los lideres del Golfo estan konvensidos i mizmo optimistos de saver ke Israel va prezentar muevas oportunidades para eyos, una vez las relasyones diplomatikas establisidas. Aktualmente kuatro razones prinsipalas egzisten para ke este proseso desidado por los dirijantes arabos veyga el dia.

La primera i la mas importante es el Iran. El inimigo komun menasa Israel komo los payizes del Golfo. Una kolaborasyon kon Israel para afrontar este payis los ayudara a defendersen.

La sigunda son los benefisyos ekonomikos i el poder de alkansar a la alta teknolojia israeliana.

La tresera es ke esta relasyon los ayudara a aserkarsen de la Administrasyon Amerikana . Los del Golf se renden kuento ke en aserkandose de Israel eyos toparan sus lugares en los objektivos de la politika amerikana lo ke fasilitara el dialogo kon los Estados Unidos.

La kuartena i ultima razon es ke los lideres del Golfo keren senseramente a ke los djudios i los musulmanos esten i bivan en djuntos komo en los siglos pasados i para arivar a esta fin el remedyo prinsipal es de rekonoser i de tener relasyones diplomatikas kon Israel.

El anyo pasado vimos vijitas istorikas de los dirijentes israelianos en el Golf, el primer ministro Benyamin Natanyahu vijito Oman, La ministra del spor Miri Regev vijito Abu Dhabi lugar onde de tanyo la’ Hatikva’ por la primera ves en un payis del Golf, el ministro de los transportos Israel Katz vijito Oman, el ministro del komersyo Eli Kohen vijito Bahrein i finalmente el ministro de la komunikasyon Eyup Kara se adreso a la reunion enternasyonal de las telekomunikasyones en Dubai.

Bahrein es el solo payis ke tiene djudios otoktonos, el rey Hamad bin Isa Al Khalifa en desembre del anyo pasado deklaro ke esta pronto a resivir mas djudios i ansi azer kreser una vida ancha djudia en su payis. Koza normal, los vijitadores en Bahrein pueden fasilmente ir a la sinagoga onde egziste minyan.

El Katar alikodeara en decembre 2022 la kopa del mundo de la Fifa, okazyon para los djudios i israelianos de vijitar este payis chiko ma riko. El sekreter jeneral de la organizasyon de los renkontros de futbol Hassan Al Thawadi deklaro en pasadas ke komidas kasher i produktos kasher seran a la dispozisyon de los djudios i a esta okazion invito los israelianos a ke vengan nombrozos para los maches de futbol.

United Arab Emirates(Los Emirates Unidos) empeso a tener una ancha povlasyon de djudios ke vinieron a bivir en Dubai, la kapitala. Ijos de amigos miyos djudios se transferaron de Ingletierra para lavorar aya i estan kontentes de sus vidas. La sinagoga de la sivdad moderna es el sentro de la vida djudia. Dubai se vijita mizmo por plazer visto ke la sivdad se izo un sentro de ‘shoping’ uniko mondialmente famozo en mediyo del dizierto. Tiene restoranes kasher i la vida djudia se organiza normalmente.

Keridos lektores espero, asperando kon pasensia i sangre fria los evenemientos de los mezes a vinir,a ke Israel no sea forsado a partisipar a una mueva gerra. Ma de otra parte mirar a azerlos amigos los puevlos de Golf Persiko, sera un grande plus para la diplomasiya i la ekonomia israeliana, ke mos alegrara..

SUKKAT SHALOM.