Benyamin Natanyahu (BIBI) el shabat pasado se izo el mas largo servidor, primer ministro de Israel.
El depaso a David Ben-Gurion el kual kedo buen kadar en la kavesa del governo , rekor viejo de dirijir el payis después de su establisimiento Eyos solos dirijeron el payis mas de el trenta i siete por siento del tiempo de su independensya. No ay duvda, la istoria los deskrivera a las jenerasyones vinideras komo los mas importantes dirijentes de Israel.
El primer komo fondador el sigundo komo dezvelopador del moderno estado djudio. Ben-Gurion kedo al poder 13 anyos i 127 dias , tiempo bastante largo onde lo marko de su estampa de líder, de su ideolojia i de su personalita. Su influensia en la filosofía de dirijir el payis kontinuamente durante vente anyos.
BIBI marko i puedeser ke kontinuara a markar estos aktual ultimos anyos de Israel kon su manera de dirijirlo. Grasias a estos dos lideres diremos ke Israel se fraguo i se enfortesyo militarmente i ekonomikamente. Ademas en los ultimos 15 anyos grasias a BIBI i a la politika del governo enkavesado por el partido Likud la nasyon israeliana se transformo en nasyon de alta teknolojia.
El payis oy se enrikesyo, tiene una armada fuerte de defensa i dezde 10 anyos bive en paz yelada kon su deredor, malgrado sus inimigos palestinianos i iranyanos i el antisemitizmo pujado, sovre todo en el mundo muzulmano.
Israel en los anyos 1950 i 1960 reflekta el komporto duro, pragmatiko, sosyalista i de vida de’ poko komer’ de su líder Ben-Gurion, por kontra Israel de los ultimos diez anyos reflekta la manera de governar de BIBI, su komportamiento duro, pragmatiko, ardiente kapitalisto i de tener una semejanza de plazer de una buena vida.
Ben-Gurion bivyo su vida de retirado en Sde Boker en una chika kaza kon un mínimum de konforto, Netanyahu kuando se meterá en pension se ira a bivir por siguro a Kesarya en su villa luksuoza. Esto mos da una idea sovre la diferensya ke egziste entre estos dos personajes importantes del Israel moderno i la diferensya de ideales ke se dezveloparon kon los anyos.
El largo tiempo pasado en la kavesera del estado no da a entender todo. Los istoryadores djuzgaran el tiempo ke BIBI paso al poder i komo lavoro durante este peryodo, lo ke fue kapache de krear i la konfiyensa ke el puevlo le dio. Sin duvda esto va ser un debate bivo i largo.
Los oponentes diran ke el gasto el tiempo en baldes, desho pasar las oportunidades de alkansar a un akordo kon los palestinianos , fue reaktivo al lugar de ser proaktivo, de no lavorar para unar ma al kontraryo de uzar una retorika de dezunyon i enfin permeterse de kerer depasar las linyas de kriminalita en dando golpes morales al fondamiento de la demokrasia de la nasyon.
Sus suporteres i amigos diran el kontraryo, ke el paso su tiempo a azer pujar la ekonomia del payis a niveles bien altos, de lavorar kon entelijensia para dar a konoser Israel i ansi establisir relasyones internasyonalas kon los grandes de este mundo i mizmo kon los payizes arabos.
Este lavoro permetyo a ke el debate sovre el konflikto Israelo-palestiniano tenga un realizmo muevo i ke el Iran no podra fabrikar la bomba atomika. No ay duvda ke la endjenyozidad de BIBI a mantenerse en la sima de la piramid governante de Israel, provara una ves mas ke su testamento politiko sera kontado kon grande admirasyon i respekto’ ad vitam.’
Por otro lado, la enkapachita suya de no pueder formar un governo de la derecha despues de las eleksyones del mez de Avril pasado, mos provo ke su politika majisyana tiene sus limitos.
Komo se eskaparan las muevas eleksyones de Septiembre vinidero, es demprano de pronunsyar un diagnostiko djusto. Ma ke la opozisyon del partido Blu/Blanko grande konkerente del Likud, enkavesado por los viejos komandantes de Tshal, ke lavoraron anyos debasho de BIBI i ke ofresen un program no muy differente de la koalisyon de derecha, azen la menasa de no formar un governo de la derecha i del sentro derecho kon una majorita en el parlamento. .
Mizma situasyon se ve en el partido de Liberman ke refuza de unirse kon el Likud. La siedra israeliana, muevo en la shena elektorala Ehud Barak, los partidos arabos kedaran en la opozisyon komo los anyos pasados. Lo ke auna estos todos partidos sea de siedra komo de derecha es la idea de no kerer adjuntarse kon el Likud en un governo nasyonal tanto ke BIBI kedara primer ministro.
Se entiende de las deklarasyones politikas de estos partidos ke por lo mas miran de eliminar BIBI. Es verdad es ke BIBI esta debasho de akuzasyones de malisyas i de rovo, ma nada fue provado o djuzgado por las oras. En los últimos sondajes la mayoriya de la povlasyon israeliana le aze konfiyensa a 62 por siento i munchos pensan ke una persona de su kalibro sera difisil de remplasar.
No kale olvidar ke en los dos anyos vinideros Israel deve mirar de reglar sus diferentes de gerra kon el Hamas i el Hezbollah i ayudar los Estados Unidos a solusyonar la kestyon del Iran, sovre todo de mirar de likidar el sistema de los Ayetollahes ke se asemeja al de los Ermanos Musulmanos , dos entitades inimigas a murir del kristyanizmo i del judaizmo. Dunke el primer ministro israeliano devra ser una kavesa fuerte i bien ekilibrada.
Imponderable komo las kozas se dezveloparan en Israel i en el Medyo-Oriente en los mezes vinideros, ma las eleksyones del 17 de Septiembre mos daran a konoser la dechizyon ke dara el puevlo israeliano sovre BIBI.