DESPUES DE MANAMA

Importante la reunión de Manama sovre el futuro dezvelopamiento de la ekonomia de los arabos palestinianos inisiada por la Administrasion Trump. Kushner propozo el plano de ayudo a esta entitad ke sozde dezea ser independiente i sobrebivir al lado de Israel, si bien entendido este es i sera su buto. Por las oras las administrasyones ke dirijen kon una mano de fierro , sovre todo Abu Mazen, mizmo sin ke se publiko el plano, lo refuzaron, koza ke no mos ambeza nada de muevo. Dezde 100 anyos los arabos de palestina refuzaron sistematikamente todo kompromizo de achetar un payis djudio reestablisido en la tierra de sus padres.

Por tanto la Tora komo ‘tapu’, para los ke kreyen en D., El mo la dio, en la kuala bivimos dezde milanyos i malarozamente fuimos forsados de egzilarmos durante dos sieglos. Oy Israel de fakto egziste, payis uniko djudio, importante, fuerte i respektado.

Porke los arabos en jeneral no keren achetar esta realita i avlan siempre de destruyirlo? Malorozamente el mundo arabo achakes de la propaganda politika de siertos manaderos palestinianos ke se inchen las aldikeras en kreando un mit nasyonalisto el kual durante los ultimos anyos mira a traverso su propaganda de arebashar i de boykotar a Israel, enganya el mundo politiko oksidental. Las gerras ke uvo entre los arabos i Israel no kreyo dingun trokamiento en este mito mizmo los akordos en desfavor de Israel de Oslo no ayudaron a estableser un paradigma de paz.

Ma las kozas trokan, por ke los payizes del deredor de Israel empesan a entender ke no pueden mas azer la gerra a Israel, ademas eyos nesesitan estar en buenos terminos kon Los Estados Unidos, la identitad la mas grande del mundo de punto de vista fuersa militar i ekonomika.

En el Medyo Oriente a la eksepsyon de los palestinianos no egziste oy en dia un payis arabo ke no tiene buenas relasyones kon la Amerika. Ademas los arabos sunnitos se empesaron a espantar de los mollah shiites iranianos kon los kualos egzisten viejos konfliktos relijiozos, ke los menasan dia i noche de atakarlos i de mirar a tomarles la sola industria ke tienen: el petrolio. Dunke sin otro remedyo eyos se apuyan a Los Estados Unidos. En esta partida del mundo para demandar asistensia a Los Estados Unidos kere dizir tener relasyon kon Israel, ke es el prinsipal aliado de la Amerika. A la eksepsyon de los palestinianos ,los arabos apoko apoko empesan a entender ke sin el ayudo de la potensya lokala ke es Israel, no ay alternativa de pueder defenderse kontra el Iran.

Ke lo keran bien o no Israel es inevitable. Ansina, eyos de otra parte son forsados a achetar todo modo de plano de pas propozado por la administrasyon Trump, sovre el konflito israelo-palestiniano, la kuala no se guadra de demonstrar su amista a Israel, todo el kontraryo de la administrasyon Obama, ke durante 8 anyos no kijo entender la dinamika interyora de la politika gerreadora del Iran kontra sus vizinos arabos.

Ademas ‘la primavera araba’ ke arebolto La Tunisia, El Egypto, La Libya, El Yemen i la Siria donde siertos konfliktos interyores kontinuan, kreo un presedente ancho sovre los rejimes politikos de estos payizes de los kualos siertos disparesyeron otros se mantuvieron. Mizmo el sanginaryo Assad guadro por las oras su poder.

Ma la impresyon jeneral es ke nada sera komo el pasado i mizmo la kestyon palestiniana. La reunion de Manama en Bahrain viene a konfirmar esta mueva situasyon ke troka el paradigma del rekonosimiento de Israel.

Los payizes del Golfo Persiko , La Arabia Saudita, el Egypto, La Jordaniya i el Maroko fueron reprezentatos kon delegasyones de alto nivel. El mundo oksidental i mizmo el asiatiko mandaron representantes, espesialmente lideres del mundo ekonomiko i de merkansia , djente privada onde se diskutyo un ayudo de 50 miliardas para los teritoryos palestinianos. Bien entedido los dirijentes palestinianos interesados refuzaron este ayudo por la simple razon ke esto toka sus enteresos partikulares.

Fin oy en dia eyos resivieron en forma de donasyones serka este montante en kontante i no se supo komo fue gastado, por ke no fueron ovligados de dar kuentos .

Esta vez el plano amerikano trata de proyektos ekonomikos , de investimientos en la industria i en la infrastuktura de los territoryos palestinianos, no se avla mas de ayudo kontante.

Podia ser ke siertos palestinianos ramayes i interesados a bivir kon el dinero del mundo, achetarian el akordo de pas propozado por la Amerika si el montante era doz i mizmo tres vezes mas grande, koza ke taparía las bokas de los nasyonalistos i de los teroristos inimigos de Israel, a los kualos no les interesa la situasion dezmizeriada de la povlasion de Gaza.

El dinero una ves investido dara lavoro a la povlasyon a sinkuenta porsiento inaktiva de Gaza i de los teritoryos i ansi la prosperita pujando la idea de un payis independiente desarmado palestiniano podra estableserse al lado de Israel, kon frontieras dechizadas kon el tiempo.

En todo kavzo de agora en delantre kuando se tratara del konflikto israelo-arabo los politikos del mundo komo se referan a los akordos de Oslo, se van a referar a las propozisyones de los proyektos de Manama, bien entendido, si ven el dia. La situasyon trokando se avlara dunke de una perioda de antes de Manama i de despues de Manama. Bivir i ver…