SALONIKO EN FLAMAS: EL FUEGO DEL 18-19 AGOSTO 1917

Saloniko, uno de los mas grandes sentros de la Diaspora Sefaradi, era al empesijo del siglo pasado, una sivdad klaramente “djudia”. En efekto, en el anyo de 1900, de entre una povlasion total de 173.000 almas, los djudios kontavan serka de 80.000 - kaje la metad. Oy dia en Saloniko biven apenas 1000-1500 djudios. Las dezgrasias ke, djuntos kon la eksterminasion en la Shoa, trusheron este eskayimiento, empesaron kon el Grande Fuego de Saloniko ke ezbrocho el 18 Agosto 1917.

Segun el testimonio de Gedalia Alaluf, de entre los ke bivian en Saloniko kuando akontesio esta desgrasia, el fuego salio un dia de Shabat, a las 4 de la tadre, en el mez de Agosto. Komo de uzo despues del almuerzo de Shabat, los djudios se repozavan de la kalor, sovre todo ke todo estava serrado. El fuego salio en el kuartier San Dimitrios, en la kaza de una grega ke estava friyendo merendjenas. La sarten se le abolto i el azeyte ke se enflamo se espandio a la kaza ke era de tavla i de kanyikas.

Los tulumbadjis djudios tenian pompas de mano para luchar kontra los fuegos. ma eyos no parvinieron a amatarlo visto ke era Shabat i ke todos estavan desparzidos, kada uno en su kaza, kon su famiya. Fina ke fueron informados por dos golpes de kanon travados de Yedi Kule, el fuego ya avia tomado proporsiones alarmantes.

Si las otoridades de Saloniko avian tomado las mizuras menesterozas, es posible ke el fuego uviera podido ser amatado. Ma sigun el Sr. Alaluf uvo razones politikas ke empidieron esto, de manera ke la munisipalita. ke tenia tambien sus pompieres, no los embio a amatar el fuego.

En desparte de esto, se pensa tambien ke los paizes aliados de Gresia en la I Gerra Mundiala, ke tenian munchas naves de gerra en el porto de Saloniko, estavan preokupados por la posibilidad ke la sivdad kaiga en manos de los bulgaros o almanes; a la vista, eyos no kerian deshar ke esta sivdad enfloresiente kayga en manos de los inimigos, kon sus magazenes yenos de komania i merkansias, De toda manera, no uvo nigun esforso seriozo para amatar el fuego ke se espandio rapidamente asta ke se apozo a la Torre Blanka.

Akeya noche de Agosto 1917, unos 50.000 djudios kedaron sin morada i pedrieron sus butikas i sus merkansias. Los ke retornaron al dia de despues toparon una sivdad kaje destruida, komo si avia sido bombardeada. Todos los magazenes yenos de bienes se avian echo siniza.

Miles de famiyas arastaron por los kampos en un estado lamentable, sufriendo de la ambre, de la kalor durante el dia i del frio durante la noche. Semejante dezgrasia no se avia abatido sovre Saloniko dezde su fondasion.

De todo el briyo i la gloria de la famoza komunita djudia no kedava ke montones de siniza. Todo se avia pedrido, desparesido. La mizeria era temeroza. Miles de muestros dezgrasiados ermanos tuvieron ke bivir en chadires, en los kampos i en los deredores de la sivdad. Ezbrocharon hazinuras de todas sortes i malgrado todos los ayudos embiados de Evropa i de Amerika no se parvinia a alivianar ni una chika parte de la grande dezgrasia.

Komo lo apunti al prinsipio del artikolo, el fuego de 1917 fue el empesijo de una seria de dezvelopamientos ke afektaron negativamente a la situasion de los djudios de Saloniko. Pokos anyos despues, en 1922, el governo kito una ley proklamando al dia de alhad komo dia de repozo ofisial, en el kual no se devia lavorar, mientres ke para los djudios el dia de repozo, kuando no se lavorava, era el shabat. Komo konsekuensa de esto pujo la kriza ekonomika i uvo munchos de entre los djudios de esta komunita ke emigraron a otros paizes.

Todo esto ayudo a las otoridades gregas a aplikar sus politika de “elenizar” a la sivdad, de dar un karakter grego dominante a Saloniko, onde de antes prevalia la atmosfera i la influensa djudia, al punto ke era yamada “La Chika Yerushalayim” i “Sivdad-Madre en Israel”. El golpe final vino kon la Shoa, kon la deportasion, por los nazistas ke okuparon a Gresia, a los kampos de eksterminasion de onde retornaron muy pokos solo.