LA AKADEMIA TALMUDIKA DE CORDOBA

De entre todas las sivdades de Espanya ande prospero i enfloresio la vida djudia en la “Epoka de Oro” de los Djudios de este paiz, Cordoba okupa un lugar espesial. Fue el primer i uno de los mas importantes sentros de estudio, investigasion i kreasion en el kampo de la kultura djudia, en Espanya. Ayi, en efekto, es ke nasieron i se dezveloparon las primeras Yeshivot, Akademias Ebreas de Espanya, ke fueron fundadas despues en otras sivdades tambien de este paiz i arelumbraron kon sus luz no solo al Djudaizmo espanyol sinon ke a las otras komunidades djudias tambien i mizmo a algunos importantes kampos de la sivilizasion oksidental.

La primera de estas Akademias Ebreas fundadas en Cordoba, es atada al nombre de Rabi Moshe Hanoh sovrel kual mos yego una leyenda de las mas interesantes, kontada por lbn Daud, en su livro “Sefer Hakabala”.

Segun esta leyenda, el amiral de la flota de Abdel Rahman III, el sultan de Cordoba en el siglo X, aferro en medio de la mar una nave ke estava indo de Italia a una sivdad en el Oriente i tomo en kaptividad a todo su ekipaje ansi ke a sus pasajeros. Entre eyos se topavan kuatro savios djudios ke estavan indo a Babilonia, para asistir a una de las reuniones de la “Kalla”, una manera de kongresos djudios de akea epoka. En estas reuniones se tratava -dos vezes al anyo- de las prinsipales kestiones sometidas por las komunidades djudias de la Diaspora a las akademias de Babilonia, ke eran entonses los prinsipales sentros de la saviduria djudia en el mundo.

Uno de los kuatro savios djudios ke kayeron en kaptividad, Rabi Moshe Hanoh, fue resgatado por la komunidad djudia de Cordoba. Kale apuntar aki ke en la epoka del sultan Abdel Rahman 3, los djudios de Cordoba gozavan de una muy buena situasion ekonomika, devida entre otras a las relasiones de amistad i respekto mutual entre el sultan i el ke era su mediko personal, ministro i konsejero, Hasday Ibn Shaprut.

Esto permetio a la komunidad djudia de Cordoba, de sovresalir por la solidaridad ke manifesto enverso los djudios ke eran kativados, en akeos dias, sea por pirates ansi komo en las gerras ke avia kontinualmente entre un paiz i otro. Ibn Shaprut personalmente salvo del katverio a sienes de djudios ke avian sido kativados en Maroko, i tomoa su kargo todos los gastes por sus mantenimiento, asta ke pudieron aresentarsen i mantenersen de sus lavoro.

Rabi Moshe Hanoh se aresento en la sivdad de Cordoba. ma sin revelar, sea por modestia o sea por kualkera otra razon, ke era un rabino i ke konosia a fondo los diversos aspektos de la relijion djudia i de sus enkomendansas.

De mizmo ke munchos otros djudios de Cordoba, Rabi Moshe uzava ir a eskuchar las lisiones sovrel Talmud ke eran dadas por Rabi Natan. Un dia afito ke Rabi Natan no pudo eksplikar uno de los mas difisiles pasajes del Talmud i es solo entonses ke Rabi Moshe Hanoh tomo la palavra i se djunto a la diskusion. El dio la eksplikasion del pasaje del kual se tratava, deshando maraviyados a todos los prezentes. Rabi Natan el mizmo, rekonosiendo su valor, le dio su lugar i le rogo de tomar a su karga, de akel dia en delantre, las lisiones de Talmud i la eksplikasion de sus pasajes mas difisiles.

Este evenimiento, ke sigun lbn Daud tuvo lugar verso la fin del siglo X, puede ser eksplikado komo el prinsipio de la Akademia Talmudika por la kuala, entre otras, devino selebre la sivdad de Cordoba.

Esto no kere dizir ke de antes no avia, en esta sivdad i en otros lugares de Espanya, estudios talmudikos. A la kontra, ya se save oy ke dezdel prinsipio del siglo VIII avia en Espanya yeshivot, sentros onde la djente se arekojia regolarmente para estudiar la Tora i el Talmud. Ma estos sentros dependian de las Akademias Talmudikas de Susa i Pumpadita, en Babilonia a las kualas embiavan todas las kestiones i los problemas, del kampo de la relijion, ke eyos no podian rezolver de manera satisfaziente.

Es solamente despues ke Rabi Moshe Hanoh empeso a ensenyar, ke se puede avlar de la existensia en Cordoba de una Akademia Talmudika ke yego a devenir independiente de las de Babilonia i a remplasarlas komo sentros de estudio i investigasion ansi komo autoridad en lo ke toka la interpretasion del Talmud.

4220