ELEKSYONES

El 9 de Avril 2019 el puevlo Israeliano votara los muevos 120 miembros de la Knesset (el Parlamento Israeliano). Aktualmente no ay ora ke una mueva deklarasion o una mueva sorpreza no sean anunsiadas por los politikos de muestro payis ,porke eyos keren i purfian ganar lo mas de lugares en la unika kamareta de reprezentantes del pueblo.

Sovre la ley elektorala los deputados son eskojidos por los partidos politikos en forma de lista preferensyal dunke los israelianos votan por un partido ma no por los kandidatos .

En este artikolo me permeto solo de darvos a entender la lucha entre la siedra, los sentristas i la derecha israeliana i el motivo prinsipal de la nominasion del futuro primer ministro

Kuando Israel fue fondado la povlasion israeliana era serka de 600.000 almas, oy esta povlasion es serka de mueve milyones , malgrado esta puja deinda .vamos a votar por la mizma kuantitad de deputados, koza ke me parese estranya mizmo si siertos de mozotros topan esto normal.

Dunke la batalya politika entre las 16 formasyones politikas ke se afrontan miraran en todos los modos de konvenser a todas las klasas sosyales del payis a votar por sus formasyon. La lucha empeso i kontinuara fin el dia d’alkavo, antes del voto konfontrasion entre los kandidados i sus sunportadores. Sovre los ultimos sondajes echos por el Maariv el 2 de Febreo 2019 los 3 primeres partidos serán el Likud kon 31 mandatos,Hosen Israel junto kon Felim 20 mandatos, Yesh Atid 12 mandatos.

Todos los otros 13 partidos politikos no podran tener mas de 8 lugares en la Knesset. Esto prova ke de la ultima siedra a la ultima derecha , a la eksepsyon de los 2 partidos arabos i los partidos haredis , el resto son partidos ke miran de favorizar en ayudando a ser elidos siertos personajes ke tienen semejantes ideolojias de la siedra o de la derecha o son liberales, ma ke no fueron por diferentes puntos de vista politika inkorporados a los 3 partidos prinsipales, Likud, Hosen , Yesh Atid o Avoda ke será espero el 4en en la lista . Esto mos prova ke las eleksyones aktualas seran echas lo mas para eskojer prensipalmente el primer ministro el kual dechizara kon ken ajuntarse para krear una koalisyon por siguro de la derecha i del sentro derecho.

Los partidos de la derecha si se univan i prezentavan una unika lista kon el Likud, inkluendo los relijiozos, sovre los sondajes, ivan a tener 62/63 deputados i ansi obtener la majorita en el parlamento. Ma las ambisyones personales de munchos de los dirijentes de estos partidos por razones ideolojikas no se metieron de akordo kon el shef del Likud, i esperan ke en las diskusyones futuras de formar la mueva koalisyon obtener privilejyos mas importantes. Un muevo ma semejante governo del pasado entrara en muestra vida.

La kestyon aktuala es de saver ken va ser el primer ministro. Sovre lo ke se avla, se deklara i se eskrive en los manaderos publikos si Natanyahu komo prezidente del Likud sera nominado a formar el muevo governo riska de toparse en mala pozisyon si el sera investigado i akuzado por razones de mala versasion durante su mandato pasado. Si el devra ser djuzgado entonses no podra enkavesar el governo. El problem mayor del payis sera grave por ke no savemos ken deve de remplasarlo. Egsisten unos kuatos kandidados de su partido o Benny Gantz, el viejo komandante de Tsahal, aktual presidente del partido nuevamente fondado Hosen Israel, si el dezeara i podra formar una koalisyon sin el partido Likud?

No es posible de denigrar ke Bibi es i fue uno de los mijores primo ministro de la istorya de Israel, en otros terminos inegualado en su politika estranjera,ekonomika i defensiva. La siedra israeliana aze todo su posible para arebasharlo i manovra a ke sea akuzado djuridikamente por aver merkado entre otros, puros kon el dinero del Estado i resivido bahshishes por ayudar i favorizar serkanos suyos !! Agora no abasta esto, los konkorentes eskojeron un jeneral yeno de su persona, sin dinguna eksperiensa en kavzos importantes de la politika ekstranjera, de la ekonomia i mas. Es ke podemos ver Gantz adresandose al Kongreso Amerikano o manovrando kon maestredad un Trump imprevisible de la mizma manera de Natanyahu? Penso ke este sinyor esta konsiente de su situasyon i es por esto ke kontrola su palavra i a lo mijor espera ser ministro futuro de la defensia en aplikando la politika de defensa establizada por Bibi.

Bivir i ver keridos lektores.