EL REYNADO DJUDIO DE LOS KAZARES

A la diferensia de las 2 otras grandes relijiones monoteistas, el Kristianizmo i el Islam, la relijion djudia no enkoraja las konversiones i esta es siguramente una de las prinsipalas razones por las kualas el djudaizmo no se espandio en las diversas partes del mundo en la mizma mizura ke las dos otras relijiones.

Un kavzo eksepsional de este punto de vista es la konversion de los Kazares, un puevlo de rasa turka ke vino de Asia sentrala i se aresento en un grande teritorio entre las muntanyas de Caucasio (Kafkaz) i el grande rio Volga. Eyos formaron un imperio muy fuerte i reynaron del sinken al dodjen siglo. Ma ya se save ke sus periodo de mas grande vigor i fortaleza fue entre los siglos VII i X.

En la epoka del rey Bulan, los kazares ke eran idolatros empesaron a onbertirsen al djudaizmo ma no por la fuersa sino ke por konviksion. La istoria de esta konversion es kontada en detalio en el livro "El Kuzari" del grande eskritor i poeta djudio Yeuda Alevi, ke nasio en Espanya en el anyo 1075 i murio en Yerushalayim en 1140.

En este livro Yeuda Alevi mos konta sovre la letra embiada a Yosef, rey de los kazares, por Hasdai Ibn Chiprut, mediko i ministro del sultan de Cordoba Abdel Rahman III. Ibn Chiprut, famozo por su rolo en el dezvelopamiento de la kultura djudia en Cotdoba, eskrive, entre otras, en esta letra

"El paiz onde moramos se yama Sefarad. Los ismaelitas (los arabos) son los patrones del paiz i su kapitala es Cordoba. El rey, Abdel Rahman es patron de munchas rikezas en oro, plata i mas ke estan todas debasho de mi kontrol porke yo se el konsejero i el ministro del rey. Yo uzava demandar a los embasadores ke vinian a Cordoba si saven una koza de la situasion de "mi puevlo los djudios" en el mundo. Los ke vinieron de Korasan me kontaron ke ay un estado, de los Kazares, ke apartiene a los djudios.

Si es verdad ke ay en el mundo un tal reynado djudio, yo esto pronto a deshar todos mis onores i todo lo bueno ke tengo aki en Sefarad, a deshar mi famiya aki, pasar las muntanyas, los kampos i las mares para ver el rey djudio ansi ke su paiz, sus ministros i su puevlo."

En repuesta a esta letra de Hasdai Ibn Chiprut el rey kazar Yosef embio una letra de la kuala tambien damos aki un kurto rezumen.

"Semos de los desendientes de Yafet (uno de los tres ijos de Noah) por su ijo Togarma. Mozotros vinimos de Kuzar, uno de los ijos de Togarma. Uno de muestros mas famozos reyes, Bulan, kijo salvar a su puevlo del paganizmo. Los reyes kristianos i muzulmanos embiaron a Bulan embasadores suyos para konvenserlo ke aksepte sus relijion. Ma el rey insistio para ke ayga tambien reprezentantes de los djudios para poder ver kuala de las tres relijiones es la mijor.

El rey Bulan demando al saserdote: "Entre la relijion de los muzulmanos i la de los djudios kuala es preferable?" El saserdote respondio ke a su pareser la relijion djudia es mijor.

Adresandose al kadi, Bulan le demando, a el tambien, kuala de las dos relijiones, la kristiana o la djudia es la mijor. A esto fue respondido por el kadi ke seguramente la relijion de los djudios es preferable. Entendiendo ke los kristianos i los muzulmanos akseptan ke la relijion djudia es mijor ke las otras, el rey Bulan se konvertio al djudaizmo i fue segido en esto por su puevlo. El Dio de Israel estuvo siempre en su ayudo i le dio muncho bien, a el i a su reynado”.

La konversion al djudaizmo no fue impozada por la fuersa i una parte de los kazares kontinuaron a ser paganos. Ma aun kon esto, el echo ke el reynado Kazar era konsiderado komo djudio es konfirmado por el estoriador muzulmano Ibn Fadlan, ansi ke por la deskuvierta de monedas kon simbolos djudios, uzadas por los kazares.

El rey Ovadia, ke vino despuess de Bulan, izo fraguar sinagogas i eskolas djudias. La Tora, la Mishna i el Talmud fueron sus livros mas importantes.

En el anyo 860, Santo Cyril bushko a konvertirlos al kristianizmo, ma no reusho.

En el siglo X los kazares ya eskrivian en ebreo i arameo i los dokumentos kazares mas importantes de esta epoka estan eskritos en ebreo.

En fin de kuento este reynado eixstio un poko mas de 500 anyos, del siglo 5 al siglo 10, kuando los kazares fueron atakados por una aliansa de trivos slavos ke venian del norte, muncho mas fuertes i a los kualos no pudieron rezistir