Madre intelijente

Mi madre un día se hue al bakal.

"Haberes buenos!" disho el bakal.

"Saludozo i rezio!" respondió mi madre, i se metió a deskojer guevos, metiéndolos en una bolsa de papel.

Kuando vino la ora de pagar, mi madre kitó de la chanta la pará i le dio al bakal de kontar los guevos deskojidos.

"Amán!" gritó el bakal, "Ke me fizites, madam Miriam! Te tomates todos los guevos grandes i me deshates los chikitikos!"

Mi madre lo miró maraviyada: "Ke te pasa, musiú Arón? Tú, si eras a mi lugar, kualos ivas a tomar?"

Musiú Arón, el bakal, se kijo fazer del intelijente, i kon ayre de guerkería le disho: "Ke kere dizir kualos iva a tomar? Sierto los chikitikos!"

Entonses mi madre kon facha triunfante le kantó: "Ke keres, musiú Arón, no te deshí los chikos?" i salió de la gruta, kontenta de eya mizma, kon los guevos grandes, deshando musiú Arón a boka avierta.

Kontado por SARA YOHAY – 1992 , Atena

Redaktado por MATILDA KOEN-SARANO