EL "PIDYON SHEVUYIM" ONDE LOS SEFARADIS

La solidaridad fue desde siempre una de las karakteristikas mas importantes de los djudios - no solo al interior de sus komunidades sino ke tambien kon djudios de otros paizes i komunidades.

Esto se reflekta entre otras en la mitsva de Pidyon Shevuyim,(arezgatamiento de kativos), ke mos enkomenda de azer todo esforso posible afin de arezgatar del kativerio a los djudios echos prezioneros por pirates o soldados de armadas enemigas. La importansia de esta mitsva puede ser vista, entre otras, de lo ke fue eskrito sovre esto por Arambam, el Maimonides. En uno de sus livros el eskrive a este sujeto ke "la mitsva de Pidyon Shevuyim akonanta a la mitsva de sedakaa a los proves".

Uno de los kavzos mas konosidos de esta mitsva, en la istoria del puevlo djudio, es atado a la memoria de Don Yitshak Abravanel – el ilustre rabino, finansiero i konsejero de los reyes de Portugal i de Espanya ke fue tambien el lider de los djudios ke preferaron salir al exilo i no renegar sus relijion. En 1492 el abandono su kaza i su pozision en la korte real i salio de Espanya, en konformidad kon el edikto de ekspulsion firmado por el rey Fernando i la reyna Isabela ke el avia servido kon fidelidad durante largos anyos.

El kavzo del kual avlamos akontesio en 1471. En este anyo la armada del rey de Portugal Alfonso, al servisio del kual se topava entonses Don Yitshak Abravanel, konkisto la sivdad de Arcila, en Afrika del Norte i tomo komo prezioneros de gerra, 250 djudios de esta sivdad, djuntos kon munchos arabos ke kayeron eyos tambien en kativerio.

Los kativos djudios fueron trayidos a Portugal onde Don Yitshak se okupo imediatamente de krear un Fondo de Pidyon Shevuyim al kual fue el mizmo, el primero a kontribuir jenerozamente. Despues ke fueron arezgatados estos djudios, Abravanel tomo tambien sovre si de abasteser todos sus menesteres durante 2 anyos enteros, asta ke eyos pudieron aresentarsen i tener sus propias kazas i lavoros.

Se puede,pensar ke esta mitsva fue kumplida solo asta la fin de la epoka medievala, kuando era ainda uzo de tomar kativos, de entre las povlasiones de paizes vensidos en las gerras, i venderlos komo esklavos. Ma la verdad es ke este uzo se kontinuo munchos anyos despues de la fin de la epoka medievala tambien.

Me pudi dar kuento de esto en bushkando mas informasion sovre el tema de "pidyon shevuyim", despues ke yego a mis manos un manuskrito de serka de 300 anyos atras, sovre la kreasion de un Fondo de Pidyon Shevuyim por uno de los rabinos de Izmir en Turkia.

El manuskrito, eskrito i firmado en el anyo 1807, tratava de lafondasion de un "ekdesh", fondo konsakrado a una sierta ovra de bienfezensia, en este kavzo djustamente la mitsva de Pidyon Shevuyim.

No avia aki un yerro? me demandi. Es ke en el anyo 1807, al prinsipio del siglo 19, ainda avia el uzo de vender a los kativos komo esklavos? Ainda avia menester de arezgatar djudios ke se topavan en kativerio?

La repuesta me fue dada en konsultando el termino Pidyon Shevuyim, en la Ensiklopedia Judaica. Ayi topi, despues de una definision de este mandamiento i de sitasiones sovre la importansia ke le es akordada en muestra relijion, algunos enshemplos muy interesantes del kumplimiento de esta mitsva a lo largo de muestra istoria.

Uno de estos enshemplos es partikularmente interesante para los ke se interesan de la istoria de los djudios sefaradis i de sus relasiones kon las otras komunidades djudias de Evropa. Ayi es kontado ke en segito a los pogromes echos en Polonia, entre los anyos 1648-1649, los djudios de Turkia embezaron sovre la triste suerte de miles de djudios ke avian kayido en kativerio i ke estavan en peligro de ser vendidos komo esklavos.

Imediatamente se organizo un komite ke, visto la muchidumbre de personas ke devian ser arezgatadas, bushko a asigurarse el ayudo de otras komunidades tambien i embio para esto shelihim, emisarios, a las komunidades sefaradis de Venezia i Amsterdam ke eran nombradas por la rikeza i la jenerozidad de sus miembros.

Kon sus ayudo, i kon los fondos arekojidos en Turkia mizmo, este komite reusho a arezgatar i salvar del kativerio unos 20 mil djudios!...Klaro ke para esto uvo ke pagar sumas fantastikas, ma esto fue echo kon el sintimiento ke no se podia azer otramente. "Ken salva una alma, dize uno de los preseptos djudios, es komo si salvara un mundo entero" i para salvar 20 mil almas, no avia menester de dizir ke todo esforso era djustifikado.

Este sintimiento ke tenemos ke kale azer mizmo lo imposible afin de salvar a todo djudio ke esta en kativerio eksplika tambien los esforsos, a vezes sovreumanos, ke azemos aki en Israel para asigurar la liberasion de los soldados muestros ke kayeron en manos del enemigo, indo a vezes asta el ekstremo de liberar sienes i miles de soldados i mizmo de teroristas arabos para obtener la liberasion de unos kuantos israelis, prezioneros de gerra o arrevatados por organizasiones deterror.

El kavzo mas konosido es el de Gilad Shalit,el soldado israeli arrevatado por teroristas arabos de la rejoin de Gaza, i ke fue detenido ayi durante unos kuantos anyos, asta ke fue liberado, despues de largas negosiasiones a la fin de las ualas el governo de Israel aksepto de liberar unos 1000 teroristas ke tenia aprezados, despues de aver sido djuzgados por sus sangrientes aktos de terror i kondanados a largas penas de prezo.

Este kavzo dio lugar a una muy fuerte polemika al seno del puevlo, entre los ke demandavan del governo de kumplir kon su dover de arezgaratar todo soldado ke fue embiado a la gerra afin de defendermos a mozotros, i los ke opozavan a pagar un tal presio, iliberar un tan grande numero de teroristas, saviendo ke munchos de entre eyos kontinuarin a ataarmos i kavzarmos mas viktimas. En fin de kuento prevalio la opinion de los ke akseptaron de pagar este presio, konformandosen ansi a una de las onorables trradisiones del puevlo djudio.