Kuando avlamos de las komunidades sefaradis ladinoavlantes, las primeras ke mos vienen al tino son las ke fueron parte, un tiempo, del Imperio Otomano: las komunidades de Turkia, Gresia. Bulgaria i mas.
Pokos saven ke afuera de eyas, uvo tambien una komunidad sefaradi muy importante en la kapitala de Austria – Viena,
Aun ke en esta sivdad ya avia djudios desdel prinsipio del siglo 18, la komunidad sefaradi de Viena fue kreada ofisialmente solo en el anyo 1736, sovre la inisiativa de Diego de Aguilar - un konverso ke nasio en Portugal de onde se fuyo, yegando en primero a Inglitierra i despues a Austria. Grasias a su amistad kon la imperadora Maria Tereza, ke avia enkontrado kuando eya vijito en Espanya, unos kuantos anyos antes, el pudo aresentarse en Viena, tornando aviertamente a la relijion djudia. El resivio el monopolo del tabako en Austro-Hyngaria i tuvo muncha reushidad en sus echos, al punto ke pudo emprestar a la imperadorala suma de 300.000 dukados par la restorasion del palasio de Schoenbrun, despues de lo kialo resivio el titolo de baron.
La kreasion de la komunidad sefaradi de Viena fue tambien possible porke en akeyos anyos ya avia en Viena un numero kosiderable de djudios suditos del Imperio Otomano – konsekuensa del Pakto de Pazarovich, firmado en 1718 i en el kual el Kaiser de Austria, Carlos VI i el Sultan Ahmed del Imperio Otomano, desidieron de permeter a los djudios de Turkia de bivir en Viena i viajar libremente entre los dos paizes.
A la eksepsion de pokos kavzos, djudios de otros paizes no podian morar en Viena i a vezes djudios de Austro-Ungaria viajavan a Turkia para obtener pasaportos turkos i ansina podian bivir en Viena. Ele pakto de Pazarovich permetio a munchos djudios de de Turkia de aresentarsen en esta sivdad, de onde pudieron dezvelopar las relasiones komersiales entre los dos paizes,
La figura sentrala de la komunidad, Diego d'Aguilar es rodeada de misterio i sovre su pasado sirkulan munchas leyendas. Mihael Menahem Papo eskrive, en su livro sovre la istoria de la komunidad sefaradi, ke Diego d'Aguilar era inkizidor en Madrid. Una noche una mujer irrumpio a su palasio i le disho: "Tu kondanates una manseva djudia a ser kemada biva.
Ke sepas ke eya es tu ermana". Viendo la sanya i la sorpreza en su kara, la mujer le adjusto ke eya es su propia madre, i ke kuando era ainda bebe lo avia deshado en un monasterio para salvarlo de las manos de los portugezes ke tomavan kriaturas djudias i las exilavan a las kolonias.
Malgrado sus esforsos Diego d'Aguilar no pudo salvar a su ermana del kemadero ma revoltado por esta dura suerte el abandono lo ke tenia en Madrid i djuntos kon su madre se fuyo a Viena, onde ya kontimos komo fue resivido por la Imperadora Maria Teresa.
D'Aguilar avia tornado a la relijion djudia, kon el nombre de Moshe Lopez Pereira, ma siempre bivia kon el espanto de ser deskuvierto por la Inkizision i yevado a ser djuzgado en Espanya. Aun kon esto, intervino para empidir la ekspulsion de los djudios de Prag i kuando supo ke pensavan ekspulsar a los djudios de Viena, demando el ayudo del sultan Abulhamit I, komo protektor de todos los sefaradis de Evropa. El sultan intervino i de esta manera se pudo empidir esta ekspulsion.
Poko despues temiendo ke frente a las pressiones de la Inkizision espanyola, lo ovligarian a tornar a Espanyapara ser djuzgado ayi, el partio de Viena i se aresento en Londra, ma la komunidad sefaradi kontinuo a enfloreser i fraguo mizmo un muy ermozo kal ke existio asta ke fue destruido en la “Noche de Kristal” en 1938, kuando los nazis kemaron i destruyeron sinagogas en Almania i Austria.
Esta komunidad se dezvelopo ainda mas despues de los anyos 70 del siglo dizimueve, kuando munchos mansevos sefaradis de Bulgaria i otros paizes balkanikos yegaron a Viena para estudiar en sus universidades i aproveechar las posibilidades ke avia de topar ayi lavoro. De esta manera se engrandesio konsiderablemente la komnidad ladinoavlante de esta sivdad ke devino uno de los prinsipales sentros de la aktividad kulturala djudeoespanyola. Se krearon ayi asosiasiones kulturales djudias ansi ke klubes sefaradis komo “La Esperansa”, “La Kaza Djudia”, “La Union espanyola” i mas.
La prensa en ladino tambien se dezvelopo ayi de manera bien importante, entre otras grasias al fakto ke ya avia en Viena iprimerias i kazas de edision sefaradis, En 1803 el imperador de Austro-‘Hungaria avia defendido la importasion a este paiz de livros en ebreo, lo ke dio un grande impulso a la publikasion de este djenero de livros en Viena. Se fondaron numerozas imprimerias i kazas de edision, djudias i non djudias tambien, ke publikaron livros de orasion i mizmo Biblias en ebreo i en ladino, ansi komo piesas de teatro, poeziasi romansos, orijinales ansi komo tradusidas del alman o del idish al ladino. Fueron publikados mizmo livros sovre temas de la kultura djudeoespanyola por investigadores komo Max Leopold Wagner i Kalmi Baruh.
En lo ke toka la prensa, sovresalio el periodiko “Korreo de Viena”, fondado en 1861 por Shemtov Semo, kon Jozef Yaakov Kalvo komo redaktor. El periodiko publikava tambien dos suplementos: “El Tezoro de Kaza” i “La Politika”, ansi ke los foyetones “Guerta de Istoria” i “Ilustre Guerta de Istoria”.
El Korreo de Viena partisipo aktivamente en una de las polemikas ke despertaron mas passion al seno del publiko sefaradi en akeya epoka: si el ladino devia mantener sus tradisiones o adaptarse a la evolusion de la sosiedad moderna.
Malorozamente la intense aktividad literaria i jurnalistika de Semo i de Kalvo no turo muncho i despues de la publikasion del ultimo numero del “Tezoro de Kaza”, en 1884 ya no uvo mas ningun periodiko en ladino publikado en Viena.
La fin de la komunidad sefaradi de Viena fue komo la fin de de las otras komunidades djudias en Evropa, salvo la de Bulgaria. Kuriozamente, malgrado ke fue uno de los sentros mas prestijiozos de la kultura sefaradi entre la fin del siglo 19 i prinsipios del siglo 20, se save muy poko sovre la istoria i la kreasion literaria de esta komunidad i ainda ay muncho ke investigar.
6130