El gato ande está?&Djohá al restorante

El gato ande está?

Un día Djohá, antes de irse a su echo, se fue al kasap, merkó dos kilós de karne i los trusho a su kaza. Le disho a su mujer: "Toma esta karne i gízala, porké a la noche vo retornar ambierto. Me kero gozar la komida."

La mujer le disho: "Bashustuné! (Kon grande plazer)"

Djohá se fue a su echo, entonses la mujer yamó a sus amigas para pasar el tiempo, i djugaron i kantaron i les vino ambre.

La mujer de Djohá kitó la karne ke gizó i izo pranso grande. I se komieron toda la karne.

A la noche tornó Djohá ambierto. Le dize a la mujer ke apronte la meza, ke está ambierto.

Eya no save komo dizirle ke no ay karne. Le dize: "No demandes!... En aziendo yo los echos de kaza, el gato se komió la karne!"

Djohá bushkó el gato, lo apanyó i lo pezó. El gato pezó dos kilós.

Le disho Djohá a la mujer: "Si akí está la karne, el gato ande está?"

Kontado por YOSEF NEGRIN en la

Djohá al restorante

Una vez Djohá se fue al restorante. En la puerta del restorante estava eskrito:

"Kada uno paga sigún el dinero ke tiene".

Djohá entró al restorante, ordenó a komer, i komió i komió i komió...

Kuando eskapó de komer se alevantó i se dirijó a la puerta de salida.

Le disho el patrón del restorante: "Ey! Paga por lo ke komites! I komites muy muncho!"

Djohá kitó una moneda de una lira ke tinía en la aldukera i la dio al patrón del restorante.

Le disho el patrón del restorante: "Kualo es esto?! La komida ke komites kosta muncho mas de esto!"

Le respondió Djohá: "Enriva de la puerta está eskrito: Kada uno paga sigún el dinero ke tiene, i éste es el dinero ke tengo yo!"

Kontado por ISHAY AHARON COHEN