La entelijensia del Rambam

Este es un kuento del Rambam en su mansevés.

En la sivdad ande él morava avía un doktor famozo ke azía vijitas en las famiyas rikas i en la kaza del rey. Tinía muncho talento.

Disho el Rambam: "Vo ir ande él i vo ser su dishiplo. Vo yevar su chanta i lo vo ayudar. Vo ir kon él ande va él."

Ma kuando fue ande él, el Rambam era flako i de aspekto mizerable.

Kuando se prezentó delantre del doktor, éste le disho: "Yo no tengo demenester de un dishiplo komo ti."

El Rambam se ofensó, ma kedó firme en su idea. El kería el posto, sea lo ke sea. El fue, tomó emprestados vistidos onorables, se arrapó, se izo la barva i tomó un aspekto plaziente. Toda su imaje se trokó, i después de un poko de tiempo fue de muevo ande el doktor, se prezentó i le disho: " Yo estó bushkando lavoro ande ti komo ayudante, komo dishiplo, lo ke keres tú."

Vido el doktor ke él tiene un aspekto plaziente i onorable i le disho: "Bueno, ven amanyana."

Al día los dos empesaron a azer las vijitas en las kazas de los hazinos. Uno de eyos era rikisísimo. El se izo hazino de una hazinura rara, ke no le estavan topando milizina: komo kalmar las muy fuertes dolores ke tinía en la parte derecha de la tripa.

Mientres ke estavan ande él, el doktor desidió de azer una indriz en el lugar de la dolor, para bushkar su razón. Akel tiempo no avía CT i no MRI. En el minuto ke el doktor avrió la tripa del hazino, salió afuera la kavesa de un guzano El doktor bushkó de aferrarlo, ma el guzano se entró de muevo adientro. El doktor bushkó i bushkó, ma no reushó.

Ensupitó el Rambam se desparesió.

El salió afuera, vido el ovrero de la kaza i le demandó ke le arranke tres ojas vedres del arvol.

"Vate de akí!" le disho el ovrero, "Es defendido de arrankar!"

"No! Tú me las deves arrankar! No me emporta kualo va dizir el patrón. Yo devo azerlo… Las vo arrankar yo mizmo."

El ovrero se konvensió i le dio tres ojas.

El Rambam fue a la kama del hazino. Kuando vido ke el guzano kitó afuera la kavesa, le prezentó una oja.

El guzano se aserkó, ronjó la oja, se arrodeó a su derredor i avagar avagar salió entero afuera.

El doktor estava loko de la alegría. Apanyó un pedaso de ropa, aferró el guzano i el hazino empesó a sintirse mijor. Ansi se milizinó.

El hazino dio al doktor todo lo ke le prometió…dukados de oro… munchos bienes.

El doktor se kedó a boka avierta por la prezensia de ánimo del Rambam.

Le disho: "Komo te vino la idea de azer una koza semejante?"

"Izi esto, porké kiji salvar la vida del hazino. Esto es todo."

Le disho el doktor: "Si es ansí, te reviene una parte de los bienes, ke resivi komo paga. De oy tu serás mi ayudante i mi sosio en el lavoro. Ansí mis klientes van a topar provecho en tu lavoro."

Kon el pasar de los anyos el Rambam adelantó muncho i se izo doktor del rey, i no lo deshavan salir del paíz, porké era muy emportante para el rey mizmo.

Kontado por ESTER HANANIA - 2013

Redaktado i traduizido del ebreo por Matilda Koén-Sarano