Los Djudios de Espanya komo Modelo para el Djudaizmo de Almanya en el Siglo 19
Verso la metad del siglo 19, la situasion de la komunidad djudia de Almanya se avia mijorado konsiderablamente, en konformidad kon la atmosfera de liberalizasion ke se avia espandido en este paiz, de mizmo ke en otras partes de Evropa.
Munchos de los eskritores, intelektuales i personalidades sentrales de esta komunidad empesaron a bushkar un muevo modelo sovre el kual podrian bazarsen, para krear una komunidad ke no tenia mas por kualo temer de las mizuras de diskriminasion, a las kualas eran sometidas asta entones, sino ke a la kontra, yegar a ser una parte respektada de la sosiedad, ke pueda kontribuir al progreso i a la prosperidad de todos i mizmo sentirse orgolioza por sus alkanses en estos kampos.
Sovresalieron de entre los ke se dedikaron a esta tarea, de krear una mueva identidad komunitaria, los eskritores i eruditos Leopold Zunz i Henrich Graetz ke apartenian a la eskola liberala, ansi ke lideres del djudaizmo neo-ortodokso (reformista) komo Phöbus Philippson i su ermano Ludwig.
Zunz i Graetz dezeavan ke los djudios puedan bivir en Almanya en yena libertad, ma manteniendo sus kultura i relijion i kontribuyendo a la vida sosiala, politika i kulturala sin sentirsen ovligados a konvertirsen; i ke mijor enshemplo, sigun eyos, ke modelo mas adekuado para esta identidad, ke los djudios de Espanya, ke todo en siendo una minoria firmemente atada a su relijion reusheron a ser un faktor muy importante en la vida sosiala, politika i kulturala de este paiz.
No solo esto sino ke eyos lograron tambien alkanses impresionantes komo mediatores kulturales entre los arabos i los kristianos: eyos fueron un faktor desizivo en la transmision de las ovras sientifikas de los arabos de El Andaluz a la sosiedad kristiana de Espanya i a toda la Evropa, pozando ansi las bazas del Renasimiento ke vino despues.
A este sujeto fue eskrito por el investigador de la kultura sefaradi Moritz M. Kaiserling, ke la kolaborasion entre arabos, djudios i kristianos en Espanya “…reusho a transformar a este paiz, ruinado por toda una seria de konfliktos internos, en un sentro de investigasiones seriozas i de pensamiento klaro i inspirado”. En baza de esta kolaborasion, adjusto el, se dezvelopo en Espanya una atmosfera kreativa ke permetio a la istoria djudia de devenir parte integrante de la kultura evropea.
Esta konsepsion sovre el djudaizmo de Espanya, komo modelo a imitar por los djudios de Almanya, no kedo en el sirkolo limitado de Zunz, Graetz i otros mas, sino ke empeso a ser difundida por medio de ovras literarias tambien: romanes, kuentos kurtos, poezias i mas.
Uno de los livros ke tuvieron mas difuzion i fueron mas populares al seno de los djudios de Almanya es el livro Die Marannen de Phöbus Philippson, ke trata no solo de los djudios de Espanya sino ke tambien de los marranos (konversos), ke bushkavan a fuir de este paiz i topar refujio en Italia, Holanda i otros lugares mas.
El deskrive tambien, komo uno de los personajes sentrales de la komunidad en akeyos dias de apreto, al filozofo, lider politiko i komentador de la Biblia, Isaac Abrabanel – ombre atado a la relijion djudia i al mizmo tiempo bankero de reyes, ombre de las Kortes Reales, lider de la komunidad djudia i mas ke todo una persona ke podia pasar libremente de la Korte del rey a las komunidades djudias i de estas komunidades a la Korte, sirviendo komo mediator entre dos mundos diferentes.
Para Philippson los djudios de Espanya reprezentan una epoka i una situasion sosiala en la kuala una minoria djudia no solo ke pudo bivir djuntos kon kristianos sin problemas, sino ke pudo tambien kontribuir de manera muy apresiable a la istoria i kultura de este paiz.
Philippson, Zunz, Graetz i otros eskritores ke bushkaron a identifikarsen kon el djudaizmo de Espanya, eran de los lideres del djudaizmo liberal i neo-ortodokso en Almanya; ma de entre los sirkolos ortodoksos tambien uvo personalidades importantes ke, yenos de admirasion por los alkanses de los djudios de Espanya, bushkaron a aprovecharsen de sus eksperiensa para.la sosiedad ideala ke dezeavan krear.
El mas importante de entre eyos fue Marcus Lehman (1831-1890), autor de tres romansos i vente otros livros sovre temas djudios, entre eyos el livro Die Familie Aguilar, sovre los djudios ke se avian konvertido al kristianismo.
Mientres ke el livro Die Marannen de Philippson trata de los marranos ke se fuyen de Espanya para poder kedar fideles a la relijion djudia, el livro de Lehman es una kritika muy dura a los djudios ke preferaron abandonar sus relijion afin de no tener ke sakrifikarsen por el Kidush ‘HaShem, o tomar el kamino del exilo, sigun lo izieron munchos de sus ermanos. Lehman aze un paralelo entre los djudios de Espanya en el siglo 15 i los de Almanya en el siglo 19, para atakar a la asimilasion, muy populara entonses en siertas partes de la klasa djudia mediana en Almanya, i ke segun el amenaza la identidad djudia.
En konkluzion podemos dizir ke sea los liberales komo los neo-otodoksos i mizmo los ortodoksos de Almanya bushkaron entre los djudios de Espanya, sus inspirasion para la mueva identidad del djudaizmo alman en el siglo 19, apuntando tambien entre otras, la importansia del orgolio por los alkanses de esta komunidad en todos los aspektos de la vida – alkanses ke no tuvieron sus igual en dinguna otra komunidad djudia en akeya epoka.
5458