Keridas i keridos profesores, onoravle asistensia, amigos del Instituto i kerida vice presidente de Bar Ilan la doktoresa Merav Galili.
Buenas tadres.
Tenemos el grande plazer de alikodar por la sigunda ves en Bar Ilan i la primera ves en el Instituto Salti la konferensia internasyonala sovre la kultura sefaradita, organizada por mozotros enjuntos kon la CSIC de Madrid. En 2004 avia dicho en okazion semejante ke los amorozos del judeo-espanyol deviamos luchar kon determinasyon para ke la lingua de muestros antepasados no se konsume en Israel, porke eya nesesita ser perena i biva para pueder sovreguadrar la kultura sefaradí ke egziste dezde milanyos. Repeto oy, una vez mas esta idea, eya persiste en mi penseryo,ke me fue inkulkada en mi manseves por 2 editores a saver: Eliezer Menda i Avram Leyon, fondadores de las gazetas la Vera Luz i el Shalom , el kual dainda aparese en Estambol, ke fueron mis maestros. No devemos en dingun kavzo aflosharmos en muestras aktividades espesialmente akademikas. El futuro de esta kultura será konservada solo en Israel el payis en el kual la mayoriya de los ladino-avlantes kontinuaran a bivir. No se si en los anyos vinideros egzistara una diaspora sefaradita importante porke aktualmente no keda a la eksepsyon de la Turkiya una komunidad sefaradita ke depasa diez mil miembros.
Keridos amigos,
Es kon grande kontentes ke rengrasyo a las ekipas del Instituto i del CSIC por la organizasyon de este kongreso. Penso kon amistad al profesor Shmuel Refael i a la doktoresa Sussy Grus del Instituto, a la profesora doktora Elena Romero i al doktor Aitor Garcia Moreno, de la CSIC ke se enkargaron del komite siantifiko i del komite de organizasyon de esta konferensia. Un regransiamento a la segunda jefatura de la Ambasada de Espanya donna Alejandra Del Rio Novo ke este aki presente kon mozotross Kon la Ambasada de Espanya i kon el Instituto Cervantes de Tel Aviv tenemos muy buena kolaborasyon i esto mozda muncha kontentes.Komo no agradecer por el apoyo ke mos da su ekselensia el ambasador de Espanya don Manuel Acebo a muestras aktividades. Ademas rengrasyo a Yaffa, Liora i al personal del Instituto por sus kontribusyones a la organizasyon del kongresso.
Aze un anyo ke el Sentro Salti fue transformado ser Instituto. Oy estamos testigos del trokamiento del paradigma. Avansimos en un largo kamino en el Sentro el kual decho su lugar al Instituto, el kual es uniko en Israel i todos los enteresados saven el lavoro presiozo ke se aze en esta institusyon. El tiene el equipo el mas grande de profesores, de investigadores i de estudiantes del payis. Una grande biblioteka de libros, de jurnales, de dokumentos istorikos en Ladino ke se esta enrikesyendo de dia en dia grasias a las donasyones ke estamos resiviendo de todas las partes del mundo. Somos se puede dizir unikos de punta de vista performansa. No fue fasil de alkansar este estado , el kamino fue abastansa difisil.
Grasias al lavoro duro i a la pasyón de muestros kollaboradores kontinuaremos sin falta a dezvelopar muestros estudyos siantifikos i a la formasyon de muestros estudiantes. Esto konvensido ke juntos kon la administrasyon de Bar Ilan i kon el apoyo resivido de la parte de los responsables de la fundasyon Salti el instituto va tener un buen porvenir yeno de sukseso . Mi vizion espero es justa i ansina muestra kultura i su lingua non van a despareser nunka. Kero ajustar ke mi dezeo para los anyos vinideros será de ver institusyones akademikas de valor ajuntarsen a este siklo de konferensias para pueder dar mas satisfaksyon a los investigadores. En serka lavoraremos a este sujeto al seno de la direksyon del Instituto.
Enfin dire la bienvenida a todos los participantes a esta konferensya ke son nombrozos i ke vinieron de una grande variedad de sivdades evropeas. De Madrid, Sevilya, Barselona,Granada, Basel, Estambol, Salonika, Paris, Aberdeen,Londres, Frankoforto, Amsterdam i Lisbon a ajuntarsen a los de Yerushalayim i Tel Aviv.
Keridos partisipantes en terminando mis palavras, vos oguro un buen lavoro fruktuozo, i reuchita buena ansi ke anyada buena yena de sanedad. Pas en los korasones, grasias.