ATESTAMYENTO DE LA APARTENENSYA DE ISRAEL

Finalmente kon kaje 20 anyos de retardo se dechizio de Yure ke Israel es el payis del Djudaizmo mundial. La Keneset, el parlamento israeliano, malgrado una opozisyon interna voto la ley fundamental, diziendo ke la Republika Israeliana apartyene a los djudios en jeneral, Yerushalayim es su kapitala i el Ebreyo su lingua nasyonala. Estos prinsipyos no son kozas muevas para el Estado de Israel ke fue fondado 70 anyos antes, ma la derecha israeliana al poder dezde muncho tiempo kijo ke el nasyonalizmo israeliano sea protejado de toda manera i izo votar esta ley kon muncha difikultad. No mos olvidaremos ke Israel no tiene una kostitusyon eskrita ma leyes konstitusyonalas. Esta mueva ley de dinguna manera no trokara los prensipyos de las leyes demokratikas del payis. Israel es i será uno de los payizes mas demokratikos del mundo . No ay de preokuparmos por este sujeto.

Los inimigos de Israel ke malorozamente son munchos, mos akuzan siempre de rasizmo, de kerer praktikar el ‘aparthaid’ de las minoritades musulmanas i kristyanas de nasyonalidad israeliana. Kon el anunsyo de esta ley no supieron mas komo desfrenar sus akuzamientos i mensyonar kon todo modo de malisya al sujeto de Israel, no kedaron de dizir ke los israelianos somos komo los nazistas i ke praktikamos leyes rasistas komo mos fueron praktikadas por el governo de Hitler en Alemanya, i mas. Esto es una situasyon trajikomika, por ke los akuzadores lo mas no konosen el ‘a i b’ de la demokrasiya, lo mas son tiranos musulmanos ke tienen entereso de avlar mal de Israel deklarandolo ‘la kavra preta’ para tapar al interno de sus payizes el deskontentamiento de sus sujetos. El mijor egzemplo es el presidente turko Erdogan i su klik en Turkiya.

De otro lado munchas nasyones ke fondaron sus republikas basadas sovre sus nasyonalizmos, toparon la desizion israeliana muy naturala i refuzaron de kritikarla. Dezde 150 anyos ke esta manera de governar al model de la revolusyon franseza se praktika en el mundo i no vemos mozotros israelianos de no azer koza semejante.

Esta ley a mi perspektiva personal digo va enkorajar la imigrasyon, la aliya, de los djudios a Israel i la prova es ke kuantos diyas antes en este anyo de selebrasyon del 70ene aniversario de la independensia ,700 olim arivaron de diferentes partes del globo para vinir establisirse aki .En el aeroporto internasyonal de Ben Gurion en un mismo dia se resivyo sientos de djente viniendo de Fransia, Rusya, Arjentina, Brazil i Turkiya. Esperamos ke estos muevos arivadores se aklimaten presto i topen un medyo favorozo i kayente para fondar sus nidos i bivir una vida oroza en Israel. El anyo pasado Israel resivyo mas de 28.000 imigrantes i es ansina ke dezde 1948 despues de la fondasyon del estado 3.5 miliones de djudios suvieron al payis, lo ke representa el 42 porciento del total de la povlasyon. En 2018, 70 anyos despues de la Shoa la mas grande povlasyon djudia bive en Israel. Este shifro representa 43 porciento del montante total del Djudaizmo mundial.

Enfin vos dire ke todo djudio ke no se siento siguro en kualker payis de la diáspora tiene el derecho de vinir i estableserse en Israel. El será resivido kon alegria i ayudo a su establesimiento en el payis. La Ajensia Djudia lo apuyara a ke se vayga a un ulpan para ambezarse el Ebreo, el Ministario de Absorsyon lo ayudara finansiariamente los 6 primeres mezes de su establesimiento. En el kavzo de los turkanos La Itahdut Yotsei Turkiya esta para dar asistensia administrativa a todo ole ke viene de Turkia. En dingun payis del oksidente, en dinguna demokrasiya verdadera el djudio no topa tanto apoyo, esto es a mi modesta opinion uniko en el mundo.