RAANANA ,SIVDAD KE REMPLASA BAT-YAM

Bat-Yam fue la sivdad onde los olim turkanos bivieron en mayoriya, ma oy no es mas el kavzo. Se puede dizir, dezde el l990 los muevos arivantes empesaron a ir a bivir a otras sivdades de Israel i espesialmente a Raanana, sivdad establisida al nord este de Tel-Aviv, kreada en el 1922 por los olim anglosaksones ke vinieron de Los Estados Unidos , a los kualos se ajuntaron Sud Afrikanos, Australianos i Inglezes. Raanana oy tiene serka 80.000 abitantes onde 800 famiyas turkanas. Esta sivdad es renomada por ser konservatrisa kon munchas sinagogas, es moderna, yena de vedrura i flores, kon arvoles implantados, ke fueron trayidos de diferentes partes del mundo. Kon la mueva imigrasyon franseza una grande komunitad de frankofones se establesio aki i es ansina ke en los sentros komersiales i las butikas de lukso se oye lo mas Inglez i Fransez al lado del Ebreo.

Deke los muestros eskojeron Raanana, simplemente por razon de vida burjuaza mas trankila i komoda. Akeyos ke se pudieron pagar para merkar un apartamento o una vila (cottage) o akeyos ke pudieron pagar un alkilo entre 4500 i 7000 shekels se establesieron fasilmente. Eyos mandan a las eskolas sus ijos onde el ensenyamiento fin a la fin del liseo es mas alto i mijor. La sivdad resivyo este anyo el premio del mijor ensenyamiento segondaryo. Los ulpanes i el "merkaz klita" de la sivdad son renomados por el ayudo ke dan a los olim, ambezandoles el Ebreo. Endespartes la sivdad poseda 112 maestras, de las kualas 80 son aviertas el dia entero. La munisipalidad organiza korsos diversos para los mansevos en enverano en las eskolas de la sivdad.

Las aktividades ekonomikas i komersialas de la sivdad son prinsipalmente arekojidas en la parte industrial de la sivdad. Lo mas de las sosiedades establisidas tratan de produktos de high tech i egziste chikos atelyes de produktos teknolojikos.

Raanana es en mizmo tiempo renomada por sus aktividades kulturales i su famoso park onde fue echo un lago artifisial. En este lugar no se permete de azer ‘mangal’ mizmo el dia de la Indipendesia, koza unika en el payis. El solo punto negativo dire, es ke la sivdad no es al bodre de la mar komo Hertzlia, Tel Aviv o Bat-Yam. Para arremedyar a esta situasyon la munisipalidad fraguo pisinas publikas i egziste un komplekso sportivo privado kon pisina. Son dados konsertos de diferentes muzikas i trupas de teatro dan reprezantasyones el anyo entero.

En la komunidad turkana vos dire ke ay personas volontaryas ke se okupan de ayudar a sus ermanos, espesialmente a los olim. El "marko pasha" ke los enkavesa es la sinyora Korin Leon ke no manka de vinir i asistir a los ke nesesitan ayudo i konsejos. Ademas la sinyora Jinet Toledo enkavesa al seno de la munisipalidad el servisyo de olim turkanos. Eya es una persona simpatika i avierta a todo modo de demanda de asistensia.

Enfin vos dire ke los ermanos Selim i Dori Behar kon el ayudo de otros djudios turkanos establisieron una fundasyon poko tiempo antes i ansina krearon la unika sinagoga de los turkanos de Raanana. Esta keila ke se topa en la kaleja Bialik fue yamada Neve Shalom komo la grande sinagoga de Estambol. Ajustare ke lo ke manka a esta komunidad es un serklo de ladino avlantes para ke muestra kultura no dispareska. Malorozamente las muevas jenerasyones de olim ke vienen de Turkia no avlan el idioma i esto es pekado. La Otoridad del Ladino juntos kon los lideres de la komunidad, a mi avizo personal devran ovrar en este kampo muy presto i kon determinasyon.