KEN ES EL ANTISEMITA, KEN ES EL KE KRITIKA A ISRAEL?

Es ke todos los ke kritikan a Israel, por una razon o la otra, son antisemitas?

Es ke lo azen esto por ke tienen una antipatía por los Judios?

Todos savemos ke el Judio siempre se vido menospresiado, insultado, arondjado y mezmo kondanado a muerte por razones relijiozas o ekonomikas. Los yamamos a estos “antisemitas”.

No ay en la historia del Judaismo en su diáspora, kavzo ke el Judio se kijo patronar del pays onde bivyo, ni perkuro a proselitizar, azer propaganda del Judaismo. Malgrado esto siempre sufriyimos de este odio.

Oy, mezmo los defensores de Israel miran de silensiar a los kritikos en etiketandolos de ser “antisemitas”. En realidad, no todos los kke kritikan a Israel son antisemitas. El faktor dominante es kuala es la intensión y el kontenido del ke esta avlando o eskriviendo.

Los kritikos de Israel akseptan el derecho de Israel a ekzistir, mientres ke los antisemitas no.

Los antisemitas uzan doble-standardes kuando kritikan a Israel. Los derechos y las keshas de los Palestinos? Siempre las defenden. Kuando vino a las mesmas demandas de Israel, eyos no se preokupan.

Los antisemitas niegan a Israel el derecho a defenderse, y ignoran a las víktimas judías, mientras lo kulpan a Israel por luchar contra los ke vinieron a assasinarlos.

Los antisemitas rara nunka azen deklarasiones positivas sovre Israel. A la kontra, eyos deskriven a los Israelis uzando términos pejorativos, y eksprimiendo sus enimistad, kuando los akuzan de ser “nazistas” o “rasistas”.

Nathan Sharansky –ke era presidente de la Agensia Judia- avia sugerido una prueva de los "3-D" para diferensiar “la kritika legítima de Israel “ del “ antisemitismo”.

La primera "D" es la Demonizasyon : prueva de si Israel o sus líderes están siendo demonizados o sus aksiones son presentadas de una manera negativa ekzajerada. Komparar Israel con la Alemania nazi es un ekzemplo de demonizasión.

La segunda "D" es la prueva de Doble -stándardes. Un ekzemplo es kuando Israel es akuzado y es kondenado en las Nasiones Unidas por abuzos kontra los derechos humanos, kuando las nasiones que violan los derechos humanos avyertamente y sin piadad, como Irán, Syria y Arabia Saudita, nunka son kritikadas ni mensionadas..

La tresera "D" es la prueva de Deslegitimasyon. Los ke kuestionan la legitimitad de Israel, kere dizir los ke pretenden ke no tiene derecho a existir, siempre son antisemitas.

Mezmo el eskritor y politiko Israeli Ury Avneri, konosido por ser un kritiko fervente de la politika de Israel vis-a-vis los Arabes y sovretodo los Palestinos dize : "La vizion de Israel komo una entidad monolítika, kompuesta de rasistas y opresores brutales es una karikatura. Israel es una sosiedad kompleksa, que lucha kon si mezmo. Las fuersas del bien y del mal, lo ke yaman la derecha y la siedra, los religiosos y los sekulares laikos y muchas otras en el medio, estan todos los días alientro de una en una batalla diaria en muchos frentes diferentes. “

Los krítikos los mas fuertes de Israel son los Israelis mezmos ke uzan sus libertad de expression para eksplikar sus preokupasiones y desean trokar siertas kozas en el pays todos los días. Una mirada a kualkier jurnal o revista israelí mostrara un monton de artíkolos ke kestionan y kritikan las polítikas governamentales partikulares, abuzos de parte personas politikas o monopoles komersiales..

A los antisemitas no les interesa –desha de apresiar- ke los Israelis keren siempre mejorar la sosiedad : sus objektivo es de deslegitimar el estado de Israel oy, y para destruirlo enteramente en el avenir. Malhorozamente no hay nada ke Israel pueda azer para azer kayar a esta djente.

Despues de los aktos teroristos ke empesaron a espander a todo el mundo kos enemigos de Israel, y ke lpresentan a los Palestinos komo una nasyon enprisonada, sufriendo de la okupasion, maloroza, agora los antisemitas están en una kampanya yamada BDS (Boycot, Disinvestment, Sanctions).

Yaman al mundo a boykotar produktos Israelis, kortar las relasyones akademikas kon las universidades de Israel. Si la reushidad de la alta teknolojia y invensiones en Israel son atraktivos para investimientos de parte de todas las grandes imprezas del mundo, eyos perkuran ke los investores traven sus investimientos.

Y enfin, perkuran de kastigar a Israel kon sanksiones : Israel es un pays ande todos los grandes artistas de la muzika y del kante vienen a dar konsertos: los BDS’istas reushen en siertos kavzos de azer anular sus aparisyon en Israel, mezmo después ke ya empezaron vender los bilyetos , kon menazo de boykotar a estos artistas en sus payses. Invitan a no merkar produktos fabrikados en Israel, ma se olvidan ke sus medikamentos, teléfonos selulares, sus otomobiles, etc. emplean teknolojias Israelis.

Los Judíos son tanbien el úniko grupo al ke no se le permite manifestar intoleransya en los campus universitarios, sovretodo en los Estados Unidos. No se puede dizir ke los afroamerikanos no saven kualo es rasisto, ka una mujer no save kualo es ser el seksisto, , ni ke los homosexuales no saven kualo es el homofobizmo. De mezmo, los Judios ya saben muy bien ken es antisemita y ken no es. Ma vemos el kontrario: el ke no es Judio dize al Judio kualo es antisemita y ken es antisemita. Sus formula es : “Yo no se contra los Judios, ay munchos Judios ke son mis amigos, yo esto solo contra Israel “