MAS KONSEJAS DE ESTAMBOL

Visto la situasion dezagreavle en Turkia enverso los djudios, mozotros djudios turkanos entendemos las razones del antisemitizmo egzajerado del estado republikano mas fasil. En poko palavras entendemos ke el governo turko aktual no mos kere mas, komo nunka mos kijo en los dalkavos 60 anios. No se kuantos kedaran fin 2023 en el país, ma una koza es siguro los mansevos se irán , koza ke kreera una vida mas difisil para los aedados ke no puederan meneyarse de ayi. Mi konsenja es dedikada a akeos ke me meldarán lo espero kon kontentes en akodrandosen de sus rizas inosentes de chikes i en alvilandose el prezente triste..

“ Mordehay i Salvo eran 2 ermanos jovenes muy atados el uno ken el otro, no se espartian ke de echar a echar, paseavan siempre enjuntos. Salvo era el grande i se dizia mas savido ke de su ermano, todo alvilandose ke el chiko kuando kaminava kon fortas, kon la raketa de tenis debasho el braso , era muy admirado de las muchachikas, ke les kaiva las bavas, sea djudias sea gregas , las kualas se enamoravan del ayre sportivo ke tenia.

Un dia de otoño , dechizaron de irse a Prinkipo, (a la Buyuk Ada) i arivaron ayi dospues de medio dia para pasear i darse a ver por la chikas de la isla. I ken save renkontrar una buena novyizika djudia rika ke les traira una buena dota, eyos sin echo i provecho. Ma verso la tadre a las oras de tornar i tomar el vapor ampesa una luvya i una furtuna ke no permetio a las naves de navigar. Los povretikos mojados no savian kualo azer, i empesaron en oras pretas, a bushkar remedio para topar un lugar onde pasar la nochada. Ansina asperar fina ke se kalme la mar i el lodos ke soplava kon fortaleza del sud.

En kaminando por una de las kalejas ven una ermoza kaza donde la guerta dava al kamino. La puerta de la guerta estava a media avierta, sin otro remedio entraron i vieron ke avia una otra kaza mas chika serka de la kaza prensipal. Kon estrechura i apretamiento de korason baten la puerta. Una madam un poko godra , blondeada, les demanda lo ke kerian. La esplikasion fue kurta, ma la proprietaria, dama henoza, i muy kom il fo, les dicho ke su marido se avia murido 2 mezes antes, i ke no seria apropriado de resivir ombres en su kaza, para no dar de avlar a la djente, i guadrar su rango en la sosieta. .A esto los dos ermanos no savian kual responder i justo ke se ivan a ir la dama se ajideo de eyos i les disho ke si kerian puedian kedarse en la kaza chika de la guerta, koza ke achetaron kon alegría. Ansina eyos pasaron la nochada i la demania se alevantaron presto i sin aturvar a la patrona de kaza i profitando del tiempo ke se enderecho se suvieron al vapor i se tornaron en sivdad.

Pasando 8 mezes de tiempo dospues de este vijita a Prinkipo, Salvo resivio una letra de un noter/avogado. La meldo munchas vezes para entenderla i se rendio kuento ke venia de la dama ke los avia alikodado en su kaza en Prinkipo. Enriva de esto supito se hue i lo topo a Mordehay i le demando:

‘Mordehay te akodras de la patrona grasioza de la kaza de Buyuk Ada?’

‘Si’ disho Mordehay.

‘Dizeme te alevantates la noche ke estuvimos ayi i te fuites a la kaza grande, ande la dama.’

‘Si” disho Mordehay entero chapeteado i averguensozo.

‘Uzates mi nombre al lugar del tuyo?’

Mordehay no supo kualo responderle a la bovaneska le disho ‘Si, afedersin(pardon). Porke me lo estas demandando?’

“Porke eya se murió, i me decho toda su erensia a mi!!!’ “

Nota:Esta konseja me fue kontada anios antes por un amigo ke bive en la Suissa.