Las Nasyones Unidas desidyeron sovre sus desakordo a la desizyon del Prezidente Amerikano Donald Trump, de rekonoser Yerushalayim komo la kapitala de Israel , y de transferar su Embasada a Yerushalayim. 128 votaron kontra la desizyon Amerikana (por la propozisyon de la Turkiya y Egyto), 9 en favor y el resto se abstenieron.
El defonto Ministro de los echos extranjeros de Israel Aba Even avia dicho sovre la Asamblea Jenerala de las Nasyones Unidas, ke “ si la Algeria uvyera propozado una resolusyon ke el mundo no es un globo snon ke una tierra plana, y ke Israel es responsable de esto”, se iva akseptar kon una mayoría de 164 votos contra 13 kon 26 abstensiones. Aba Even avia entendido klaramente, ke basta ke una desizyon de la UN seyga kontra de Israel , la grande majoria la akseptaria otomatikamente.
Trump ekzekutio una desizyon del congreso Amerikano ke data del 1995, y no deklaro ke la sivdad entera de Yerushalayim deve de apartener a Israel. La resolusion prinsipala y akseptada por el Konsejo de Seguridad de las Nasyones Unideas es : “ El estatuto final de Yerushalayim –sivdad santa- sera determinado kon negosyasyones kon Israel, bazadas sovre las resolusyones anteriores de la UN en este sujeto”. Se olvidaron ke los Etados Unidos es un pays ke puede desidir onde tener su embasada.
La realidad historika es ke los ke refuzaron de negosiar kon Israel en baza de” tierra konra paz” son los Palestinos. Kuando se trata de voto en la asamblea generala en la UN, 57 miembros apartienen al mundo Islamiko, . El resto son los ke ven las kozas según la realidad (pokos), i los ke tienen interesos en los payses Arabes. Estos son la majoridad.
Se los propozo a los Palestinos , durante el konflikto kon los Judios ke kijeron fondar sus estado independiente, formulas diferentes para ko-ekzistir, y ke tengan, si es esto sus dezeo, un estado Palestino independiente. La kriza empeso kon los Judios aze serka 90 anyos, me eyos refuzaron a kada una de estas propozisyones .
1-La Komisyon Peel de 1937 para una solusyon de 2 estados, sus repuesta fue No!, 2- El plano de partisyon de 1947, de nuevo los Palestinianos disheron No. 3- La guerra de 6 dias en 1967, Israel gano la guerra y les propozo de darles tierra contra la paz, de nuevo la repuesta fue No. 4- En el anyo 2000 el Primer Ministro de Israel Ehud Barak le izo, en Camp David , a Yasser Arafat una propozisyon tan jeneroza ke mesmo en Israel estuvieron en shock.Por ensemplo, de render 92 % de los teritorios, la parte Este de Yerushalayim. Lo ke no aksepto Israel es ke vengan a bivir en Israel Palestinos ke se refugiaron en otros payses en 1948. Ma el Sr. Arafat se aparto de la konferensia sin mezmo azer una contra-propozisyon. 5- En el anyo 2007 el Presidente de la Autoridad Palestiniana Mahmud Abbas después de aver tenido 36 konversasiones ke estaban serka de finalizar a un akordo, refuzo la ultima propozisyon de Ehud Olmert, el Primer Ministro Israeliano, i se abolto atrás.
La okupasyon de la parte Este de Yerushalayim por Israel en la guerra de 6 dias en 1967 –ke era una guerra defensiva- kavzo ke 12 estados Arabes tomen en Hartum la famosa desizyon de efasar a Israel de la karta geografika. El General Moshe Dayan, ke era el komandante de la armada viktorioza de Israel en 6 dias , espero resivir un teléfono del rey Hussein de Jordania para diskutir un kambio de tierra contra Shalom. Esta yamada nunka vino. En Junio 19, 1967 (9 dias después de la guerra) Israel ofresyo al Egypto y Syria en mezmo tiempo la península de Sinay i el plato de Golan en kambio a la paz. Ma estos dos estados Arabes refuzaron.
Ay ke repetar y dizir ke malhorozamente las nasyones Arabes bushkaron siempre komo anihilar y efasar a Israel , Israel gano las guerras, les izo ofres para tener la paz kon ellos, y la repuesta de los Arabos fue No. Desharemos esto. Otra koza ke no se sabe bien es ke imediadamente después de su viktoria Israel aksepto la desizyon 242 del Konsejo de Seguridad de las Nasyones Unidas, de render las tierras kea via okupado : esta era la prima desizyon en la historia, onde la parte viktorioza en una guerra defensiva fue demandada de retornar los territorios ke okupo.
La desizyon 242 no demanda ke Israel retorne todos los teritorios ke okupo, porke ya aksepta ke siertos teritorios son indispensables a la defensa de sus frontieras. En mezmo tiempo, la rezolusyon de 1967 deklara ke a Israel se deve de darle “el dercho de bivir en paz, en frontieras rekonosidas y sin ser menazada por aktos de fuerza”.
Ma komo respondieron los Arabes a esta resolusyon en la konferensia de Hartum en Sept. 1967 ¿ Los payses Arabes adoptaron sus famosa deklarasyon de los tres NO’s. “No a la paz kon Israel, No a las negosiasyones kon Israel, No al rekonoser a Israel!”.
Los Palestinianos revizaron tanbien sus konstitusyon (chárter) , deklarando en su artikolo 19 ke Israel es un estado ilegal .
Ay ke repetar ke los Arabes deklararon una guerra para eksterminar a Israel, Israel salyo viktorioza y aksepto la rsolusyon 242 del Konsejo de Seguridad. Ma los Arabes refuzaron la paz , y deklararon a Israel komo un estado ilegal (lo ke es una violasyon direkta del 242).
Por esta razón es interesante de demandar a la jente ke van kada minuto kondanando a Israel: Ke forma de propzisyon kale ke Israel aga a los Palestinianos? O, kualo es lo ke eyos verdadmente keren?
Devemos akodrarmos ke en el anyo 2000 an la reunión de Camp David en los Estados Unidos, el primer ministro de Israel Ehud Barak izo konsesyones muy grandes ke fueron sorpresa para los Israelis, les dyo kuaje asta los sielos. El ofre de Barak era : Un estado Palestino kon su kapitala Yerushalayim del Este, y control de los lugares santos del Islam (el Harem-u Sherif) y retornar kuaje 95 % de la parte oueste del rio Yarden (Yehuda y Shomron) y la banda de Gaza, aksesion de la Palestina a Gaza por un porte alto independiente. Y aparte 30 milyardas de dólares para indmnizar a los refugiados de 1948. Ma Arafat se fuyo de ayi sin mezmo dar una contra-propozisyon.
Los ke siempre apoyan a los Palestinos generalmente responden de una manera non klara. Parese ke keren ke Israel restorne TODA la tierra a los Palestinos. El bruido ke azen en el mundo entero, los aktos de terrorismo, las potos mal intensionadas o fabrikadas de los soldados de Israel ke miran a reestablisir el orden en los kazales Arabes,están resushendo a azer la mala propaganda contra Israel.
En otros biervos, para eyos la sola solusyon es ke Israel ke no ekzista mas en la tierra yamada Palestina (Filistin). Este deseo es dos vezes mas estranyo, es leshos de ser realista, y es ekzaktamente lo ke dize Hamas y mezmo las kontstitusyones de los Palestinos.
La konkluzion es: Los Palestinos no mostran ke keren la paz kon Israel, eyos keren ke Israel se vayga de aki. Si esto es la unika koza ke eyos akseptan, se entiende por ke se komportan según lo vemos. . El konflikto terminara kuando tendrán una administrasyon rasyonala, en el bien de sus pueblo. Lo esperaremos en el anyo 2018
Nota 1 – Los biervos mostran ke es la parte ke uno toma kuando avla: Si Trump amenaza de kortar el ayudo de moneda a los payses ke votaron contra su desizyon, lo yamamos “chantage”, y si Hamas enbiya roketas a los sivdadinos de Israel lo yaman “rezistensia”.
Nota 2 –Israel NO okupo el territorio de "los Palestinos" en 1967; kapturó territorio de Egipto (banda de Gaza) y de Jordania (Cisjordania,ke inkluye Yerushalaim Este). ¿ Ma en manos de ken estaba la Palestina (Cisjordania), en manos de la Jordania., la ke se apatrono de la parte Palestina (del Plan de Partisyón de la ONU de 1947), durante la guerra de 1948 en la ke Egipto, Syria, Jordania, Irak y Líbano (kon la ayuda de Arabia Saudita, Yemen y Libia) intentaron ─ todos juntos ─ destruyir y efasar a Israel de la karta geografika.
Nota 3: Según la kava declarasyon de Trump en Yerushalayim, es difísil exagerar la importansa de esta parte del plan de Barak: los palestinos podrían obtener a la parte Este de Yerushalayim komo kapitala de sus estado en 2000, ma Arafat no tuvo el koraje de akseptarlo. Pensa bueno sovre esto.
===========================================================================