Donald Trump, presidente de los Estados Unidos, la unika potensia mondiala, en este fin de anio 2017 mos iso la supreza de deklarar ke la ambasada de su país va ser transferada lo mas presto posible de Tel Aviv a Yerushalayim kapitala eternela del estado djudio , koza ke reboltoneo a los vizinos arabos i a los ipokritos dirijentes goyes por lo mas evropeos, los kualos no se arestan de gritar i soslevantar a sus puevlos i amenasar a Israel.
Ekskuzame, en mi lingua se dize aharva k.. ke no p…. Los Amerikanos son liberos de establisir sus ambasadas en las kapitalas de los países amigos sin demandar otorizasion de las Nasiones Unidas o kual ke ser país estranjero. Deke kritikarlo, i demadarle a ke anule esta desizion.
Penso ke el antisemitismo politiko-relijiozo no esta para despareser mismo en el 21 sieglo, malgrado ke los djudios en mayoriya oy en dia biven en Israel i Los Estados Unidos. Muestros antepasados regalaron a la umanidad a traverso la biblia el monoteizmo, la libertad individuala de darse a entender i de ser liberos.
En los tiempos modernos el djudio kontinua a ayudar a ke la umanidad se dezvelope de diferentes modos para tener mijor vida i por lo mas’ pas’ en los korasones. No es posible de entender deke miliones de djente ke no renkontraron ni una ves en sus vidas a un djudio tengan prejudisyos de inimista kontra eyos. A los inimigos de muestro pueblo no se les esta aresentando ke Israel en pokos anios de su egzistensia si izo una potensia ekonomika importante entre las 193 nasiones endependientes i durante 70 anios fue kapache i será kapache de defenderse kon fuerza i determinasion.
Israel es el uniko pais en el mundo aktual a mayoriya djudia, unido i kompozado de una mozaika de diferentes kolores, tradisiones, uzos i kulturas. Grasias a sus inovasiones teknolojikas pensamos ke el país será en pokos anios una chika potensia mondiala, onde todos los países kereran ser representados kon sus ambasadas. Porke ke no se establisen en Yerushalayim sivdad santa, prinsipalamente kapitala de los reyes djudios i de la republika moderna djudia. Los kristianos i los muzulmanos ke la okuparaon durante sieglos nunka la konsideraron komo importante i no la dezveloparon fizikamente. Spiritualmente los goyes oy pretenden tener derechos istorikos por lo mas por razones relijiozas, ke les serve de lei motivo para azermos la guerra.
Israel en 1967 konkisto la Yerushalayim del este, la sangre djudia koryo i por esta razon dinguna fuerza no mos puede kitar de eya. El ke pensa tener la fuerza de derokarlo una ves mas ke no se atriva por ke el avenir de esta sivdad esta entre las manos de la armada de defensa israeliana, una de las mijores armadas del mundo pronta a defender su kapitala eternelamente.
Me pensi i dishe le preguntar a mi amigo imajinario djoha kuala será la solusion para ke ayga pas en esta sivdad tanto kontroversada. Se pensó djoha i me respondio:
“ Karo amigo, kualo de mas fasil. la sivdad es abastante ancha. Dizeremos ke los árabes keren azerse i eyos una kapitala ariento de la sivdad . Bueno achetaremos a darles una partida del este kon la kondision irrevokavle ke eyos rekonosoran a Israel komo país djudio en sus frontieras siguras de oy en dia. Ademas ke achetaran a una munisipalitad sin frontiera libera para todos los sivdadinos. Ay de demandar a Bibi de trasar una mueva avenida entre las 2 kapitalas i de dar permiso de fraguar los edificios de la ambasadas aya kon 2 entradas, al este para los arabos i al oueste para los isrelianos.”
I ansina keridos lektores, djoha ya avlo i ya espajo el konflikto de Yerushalayim.