LAS ELEKSYONES EN LA ASSOSIASYON DE LOS ORIJINARIOS DE TURKIYA EN ISRAEL

Son 80 anyos ke los orijinaryos de Turkiya vieron el menester de tener una assosiasyon, entonses en la Palestina basho el mandato Inglez, y mas después en el Estado de Israel. La “Itahdut Yotsei Turkiya” es la forma ofisiala de esta Assosiasyon, ‘’Aguda’’ desde el anyo 1960, rekonosida por el Governo de İsrael y representando los Judıos de Turkıya.

De la kurta historia ke aparese en este sitio, se ve ke durante los anyos okuparon el puesto de Prezidente varios nombres, kada uno de eyos transmitiendo su tarea a otro a la fin de sus kadensias. Esta vez, el 21 de Enero 2018 los orıjinarios de Turkiya van a eskojer nuevos miembros a la (Moatsa), ke es el Komite de Konsejeros, ke kon los ke representan las diversas sukursalas y sosiedades, juntos los administradores del pasado, van a elijir al nuevo presidente/o presidenta de la Assosiasyon.

Kada presidente y sus kollavoradores tuvyeron, a traverso los anyos, de okuparsen de los temas prinsipales por los kualos ekziste la Itahdut : Ayudo a los nuevos imigrantes de Turkiya y sus adaptasyon al nuevo pays, mantener el patrimonio kultural de los Judios de Turkiya, kontribuir a las buenas relasyones entre Israel y la Republika Turka.

Según el tiempo, las aktividades fueron mas intensivas en un tema o el otro. Ma siempre el Ole de Turkiya, su estabilisimiento, los estudios de los jóvenes de orijin de Turkiya fueron de primera importansa. Kuando no uvo munchos olim y las relasyones kon Turkiya no estavan buenas, las aktividades kulturalas, konferensias, teatros, konsiertos karakterizaron mas muncho la Itahdut.

Si se pensa ke todos los ke son aktivos en esta assosiasyon son benevoles, eyos meresen mas grande apresyasyon. Eyos tienen ke dar de sus tiempo para reprezentarmos de la mijor manera, de resolver el problema finansiario para akumplir las funksiones de la Itahdut : las bekas (burses), el mantenimiento del lokal y de la sekreteria, publikasyones diversas ,etc.

La Itahdut supo siempre eskojer a los mijores komo presidentes. Kada uno desho su imprenta digital durante su kadensia. Desde 2012 por la primera ves una sinyora fue la Presidente : Zali de Toledo, kon su vicepresidente Nesim Güveniş y sus ekipa ızyeron un lavoro tremendo para los olım, ke este anyo pujaron de 300 %.

Esta ves se espera ke de los ke imigraron a Israel durante los kavos anyos, jóvenes ıntellektuales en majoridad, partisıpen y seygan eskojidos a la Moatsa, y mezmo ke seygan kandidatos a la prezidensya. El mundo troko : en muchos payses del mundo mezmo chefes de governo están eskojıdos entre los jóvenes. En los timpos pasados era la eksperiensia ke es importante, agora es el dinamızmo de la persona mas manseva ke tomo su lugar. Sin olvidar bien ententendido ke no importa ken viene, los experimentados a su deredor no le mankaran.

Ay un problema del kual sufre la kollektividad de los orijinarios de Turkiya en İsrael : es ke no somos una kollektividad homojena.

Verdad ke vinimos todos de Turkiya, ma no vinimos todos en el mezmo tıempo. La Alıya de los anyos 48-50 no parese a las Alıyas de 1970-80, y la de los anyos 2000 es ayinda mas diferente. Los primeros no avlavan el Turko o lo avlavan poko, los segundos avlavan bıen el Turko y eran de un nivel sosyo-ekonomıko mas alto, los de después de 2000 por lo mas son intellektuales kon kriaturas chikas. Kada grupo tanbien tiene sus dıferensyas: los ke biven en el sentro, en otras sivdades, los ke arivaron mansevos y ağora están aedados, los ke biven en kibutsim-moshavim, etc. Mezmo en tiempo de la internet, no es fasil de komunikar kon todos los ke no biven en el sentro del payıs.

Esta es la razón ke pudo salir en el anyo 2003 otra sosyedad yamada Arkadaş, ke supo attirar akeyos olim de los anyos 48-50 kon las ekskursiones a Turkiya, las noches kantadas, las tadradas de moabet (muhabbet), lisyones de Ladino, y obtuvo un lokal en Yehud en el kual empeso a kolleksıonar objetos y muebles ke los olim trusheron de sus kazas en Turkıya. Y en metiendo el busto de Ataturk y la bandiera Turka perkura de aserkarse de los diplomates Turkos en Israel.

En akel anyo, la Itahdut perkuro de tener un dialogo, sin reushidad, kon el fundador ke ayinda kontinua ser el presidente dizde 15 anyos. Ma los Turkanos de 48-50 ke lavoraron duro todas sus vida parese ke estan kontentes del ke les da tadradas muzıkales y de los vıajes ke se les organiza. Solo el Ebreo es la lingua ke emplean.

En dizyendo esto, kero apuntar a una difikultad ke espera a la nueva administrasyon de la İtahdut. Por seguro ke no kale entrar en kompetisyon kon el Arkadaş o azer lo mezmo. Ma ay ke mirar de tener informados a estos buenos Judıos Turkanos de lo ke aze la Itahdut : ke sepan ke la jenerasyon de olim de Turkiya aktuala es dıferente, no se engrandesyo kon siyonizmo, ma esta pronta a bivir komo Judio en el Estado de los Judios, y engrandeser y edukar sus ıjos aki en Israel. Kontrarıamente al Ladino, el Turko es la lingua de los Judios de Turkiya oy, y por esto ay ke emplear la lingua Turka en este sitio, en el BÜLTEN, se publika Diksionario Turko Hebreo, y se avla en Turko en varios grupos de Turkanos. Ma tanbien az de dar importansa mas grande al uzo del Ebreoö en favor tanbien de los ijos de Turkanos, ke no konosen ni el Turko ni el Ladino.

Es para los nuevos olim ke se organizen tadradas kon representante del Bituah Leumı, se selebran las fiestas, se aze la traduksion del (Madrih laOle) del Mınısterıo de la Imigrasyon . El Ladıno es importante para mozotros ansi ke el Hebreo, y somos mozotros los ke kolavoramos kon la Autorıdad Nasyonala del Ladıno y su kultura en Israel.

Y kuando es nesesaryo ay ke aserkar a los parlamentares y vısıtantes Turkos para mostrarles kualo es Israel el verdadero y ayudar a la hasbara.

La Assosıasyon de Turkanos de Israel nunka tuvo ke defender a los ‘’derechos’’ o luchar contra diskriminasyon. No por esto fue kreada. El buto fue siempre de ayudar al ole, de mantener nuestra kultura sefaradi, y de provar ke no semos menos ke los otros Judıos ke vinieron a fraguar el Estado de Israel. Al vermos el 21 Enero en Rehov Mohre Sigariyot 7 Bat Yam.