ESTAMBOL, SIVDAD ANDE NASI (1)

Istorikamento kuantos nombres le dieron a esta sivdad ke en ebreo la yamamos Kushta. Yo konosko disiocho nombres i deven de aver munchos mas, a saver : en grego antiko Vizantion, en Latino Bizantium, Nova Roma, en grego moderno Konstantinopolis, Megalipolis, Kalipolis, en slavo Tachargrad, en svedeze Miklagord, en armeno Vizant, Stimbol, en arabo Bizantiya, Kustantina-el-uzma, en selchukido Konstantiniyye, en otomano Dersaadet, Istambol, i ISTANBUL. Eya fue mas de mil i kinyentos anios kapitala de dos imperios, uno kristiano,Bizansio, el otro muzulmano Ottoma, onde reynaron emperadores romanos, despotes bizantinos i sultanes turkos. Eya fue sentro de diferentes kulturas: la kultura payana ,kristiana , evropea, la musulmana, asiatika i la djudia. Eyas se dezveloparon a traverso sieglos en esta splendida sivdad.

Sivdad yena de ermozuras es establisida sovre siete kolinas, entornada de aguas: la mar Marmara,el Korno de Oro(Halich) i el Bosfor, estrecho ke desparte la Evropa de la Asia. Los istoriadores kontan ke eya fue fraguada al imagen de Roma i en parte de Venezia. Su jeografia eksepsional,maraviya natural, el D. bindicho le dio el sol i la luvia para ke sus kolinas vedres siempre sean vedres, el ayre fresko del norte en enverano i el ayre kayente del sud en invierno. Komo no enkantarse de su ermozura, kuando la observamos en primavera, en madrugada de una de sus kolinas de Galata. El azul(blu) del sielo se reflekta en sus aguas ke entornan la sivdad i el sol kon su reflekto sentea sovre eyas. Del bodre de mar de la parte del Bosfor evropeo se ve en la demania demprano komo el sol suve i ansina las solombras ke se krean dan el sentimiento ke eya es inmortal komo Yerushalayim. En mi chikes este espektakolo era normal para mi, ma no para akeyos ke vienen a vijitarla. Eyos se maravian de ver del lado evropeo de la sivdad Uskudar i Kadikoy espertarse. Mizmo senario i mizmo enkanto de la otra parte, del Bosfor aziatiko, de la kolina de Tchamlidja ay una vista stupenda sovre la parte evropea i sovre las kolinas del Halich, onde Pierre Loti uzava morar i eskrivir. Las charas de las dos bandas del Bosfor suven verso el norte fin a la mar Preta dando una rikeza a la vista. Si a esto adjustamos los tres pontes ke son enkolgados sovre el Bosfor , iluminados la noche, tenemos una otra vista fabuloza de Estambol.

Ademas de la parte asiatika se ven en medio de la mar Marmara las izlas de los Prinses,kada una kon sus karakteristikas espesiales, djoyas de kampanya , onde la mayoriya de las minoridades non muzulmanas uzan pasar la enveranada. Entre eyas Buyuk Ada(Prinkipo), Heybeli (Halki), Burgaz (Antigoni) son frekuentadas por los djudios. La mas chika isla de las kuatros es Kinali (Proti) frekuentada por los armenos, onde bivio munchos anios i murió el erudista istoriador Prof. Avraam Galante de bindicha memoria. Mas al este del Bosfor asiatiko se ve la kosta anatoliana yena de verdura ke malorozamente oy en dia el beton esta remplasando.

A los fanatikos de Estambol no les gusta espartirse en enverano de eya por la semple razon ke les plaze gozar i savorear el klima dulse i la mar kayente. De mi chikes me akodro los pransos de ‘raki’ ke se aparejavan las tadres en enverano en Buyuk Ada en la guerta de la kaza de mis papus ke la alkilavan de Niko el grego, el kasap(Karnasero) de la isla. Me akodro además ke yamavan a tañyedores gregos i ke la nochada kontinuava fina una ora bastante tadre, kon kantes i bayles, en aziendo muncho sonete. Esto era para mi una buena okazion para saltar sin ke me veyan en la guerta del vizino Niko, el kasap, para ir fleurtar kon su ija Despina, mi primer amor. Yo tenia diisesh anios eya diisiete.

En mi proksima eskrita vos kontare de mi respektiva personal la vida djudia de Estambol.

Al vermos keridos lektores.