LOS DOS PILISHTIS

Keridos lektores

Visto ke mis konsejas de djoha vos plazieron i ke resivi enkorejamentos nombrozos para ke kontinue a eskrivir, aki vos do un otro kuento , esta ves ke no es de djoha, ma de dos pilishtis .

Al prensipio del siglo pasado avia una madre bivda kon dos ijos de diez i tredje anios , ke bivian en uno de los foburgos de Estambol, onde la mayoría era djudia: el foburgo de Haskoy.

La povereta iva en las kazas komo kuzindera a la journée i pormo de esto no pudia durante el dia okuparse komo se deve de sus ijos.

Eyos , sintiendosen liberos,korrian por las kayes i no se artavan de azer las negreguras las mas grandes, komo arevatar los djugetes i las bilyas de los ijos chikos, marear a las damas viejas en kamino del banyo,para arevatarles el bogo de banyo i dezazerlo en medio de la kaye, echando su kontinido en basho, en burlandosen .

Un dia ke el vizindado los akuzo de aver rompido los vitros de la adelantera de una butika de panyos, el muhtar turko del lugar verso la tadre del mismo dia batio la puerta de la dezdichada madre i le demando “Deke tus ijos son tan malos?” No saviendo kualo responder, la povereta le prometio ke se los va yevar al sinyor haham Avramachi, mare de atra de Haskoy, ombre importante i muy respektado, para ke los amoneste . El muhtar kontente de su vijita, en saliendo de ayi so hue presto i informo al sinyor haham de lo ke se pasava.

El haham sintiendo esto, yamo a unos kuantos yahides konosidos del foburgo i les pregunto sovre los ijikos Yaakov i Yuda de mala fama. En kurto el fue informado ke toda la malisia i la negregura de este lugar era el lavoro de estos dos pilishtis, mismo si siempre no era el kavzo,

No paso muncho tiempo ke Yaakov i Yuda se prezentaron a la kaza del sinyor haham kon sus madre. Los chikos avenguersados i espantados,estavan en pies, la kavesa abokada en frente del haham, kuando el se adreso a sus madre i le disho de tornarse a su kaza, porke keria estar solo kon los ijikos. A sigun la madre salio, el haham kon boz alta i otoritaria demando de Yuda, el chiko de asperar ahuera de la kamareta,en las eskaleras de la kaza. Yaakov el bohor, topándose solo en frente del haham, malgrado su koraje, se sintió en apretó i kon espanto miro sin alevantar la kavesa al haham , ke dava tornos ariento de la kamareta en silensio, sin avlar durante un largo momento. En realita malgrado su edad i su prestasion el haham no savia de ande ampesar a avlar i konsejar el kamino djusto a este chiko ke no le paresia tanto malo, i ke tenia mizmo un ayre simpatiko.

Dospues de aver asperado buen karar, el haham sin pensar mas, se metio enfrente del chiko i le pregunto kon boz alta: “Dime Yaakov ande esta el D. Baruhu?”

Esto ke oyo Yaakov kon grande espanto, no saviendo kualo responder, avrio la puerta de la kamareta, se echo en las eskaleras, lo aferro a su ermano de la mano i sin mirar atrás se metio a korrer a su kaza. Arivando a sus kaza los dos pilishtis, komo uzavan siempre kuando azian una negregura, se guadraron debasho de la kama de sus madre para ke no los topen.

Una vez aya, Yaakov tapo la boka de su ermano ke no entendia porke este asigo i le disho”Sus kayado estate, no seas torpe, esta ves tenemos la kavesa en grande bela, porke el D. SE PERIO, no saven onde esta, i al sinyor haham le parese ke somos mozotros ke mo lo arovimos”.