SOVRE LA KONTRIBUSION DE LOS SEFARADIS AL ESTADO DE ISRAEL

• Para mi son Sefaradis unikamente los ke son de desendensia de los ekspulsados de Espania, ke

avlaron durante nunchos siglos el Ladino ( o Djudeo Espaniol). Kon todas sus valor, no mesklaremos kon los Irakianos,el Djudaismo Norte Afrikano o de Yemen i de Iran. Eyos son Mizrahim..

Dunke Sefaradim son los Yerushalmis i los ke bivyeron siempre en Eretz Israel en el tiempo

Ottomano, los de Djudios de la Turkiya oksidentala, los de Gresia, de Bulgaria, de la Yugoslavia

de antes, i una partida de la Romania.

No ay menester de akodrar ke golpe fue la Shoa a los Djudios de Gresia i de Serbia-Kroatia- Montenegro etc., ke eran Ladinoavlantes i ke solo los sovrebivyentes entre eyos podyeron vinir a Israel..

Lo ke kero dizir es sovre los Sefaradim orijinarios de Turkiya i un poko de los Selaniklis i los Bulgaros en Israel, bazandome sovre mis konosensias ke son tambien las de munchos de vozotros. Esta kontribusion es importante, sovretodo si se konsidera ke estos sefaradis nunka fueron un grupo grande en la populasyon de Israel.

• Los Bulgaros ya savemos ke tuvyeron Ministro , deputados, grandes musikantes (komo Yitzhak Graziani, Shemtov Levi)), munchos aktores i direktores de teatro en Israel.. Tanbien entre los Djudios de Salonika en Israel muzikantes importantes (Yehuda Poliker).

En la polisiya, el komandante del Mishmar haGvul i de la Polisiya del sentro (Tel Aviv) el Jeneral David Tsur, nasido en Kuzguncuk. Oy David Tsur es deputado en la Kneset.

En la Knesset segunda, Moshe Sardinas, ke fue tambien reprezentante del Tnuat haMoshavim i vice-prezidente de la Knesset, Izmirli. No ay munchos otros, es verdad, ma. por ke no ay mas?

es sujeto ke merese de ser tratado..A estos nombres podemos adjuntar Avraham Elmaliah, Avraham Recanati, Binyamin Arditti, de las dos primeras Knesset, i al deputado de Shas, Yitzhak Saban, nasido en Istanbul. Viktor Shemtov, nasido en Bulgaria, ministro de la Salud minchos anios.

• Tanbien las deputadas en la kneset pasada, Dr. Rahel Adato i Ruhama Avraham Balili.

En Institusiones nasyonalas : Prof. Hanukoglu, konsejero del Primer Ministro Netanyahu (Istanbulli), Shmuel Abuav ( Direktor Jeneral del Ministerio de Edukasion, del Ministerio de konstruksion, el pasado Mayor de Kiriat Tivon). Berti Brudo era Direktor Jeneral del Minhal Mekarkaey Yisrael).

Patrones de Bankas : Sefaradis de Salonika, la Famiya Rekanati, la Famiya Karaso. De Turkiya salyeron munchos direktores de Bankas en Israel. La Banka Valero era la primera banka de Yerushalayim.

Premios Nobel : Verdad ke los Turkanos no tuvieron, i Elias Kanetti de orijin Bulgara no kontribuo a Israel kon su premio Nobel, sinon ke al Djudaismo i eskrivio en lingua Alemana.

En el kampo de la ekonomia, la Keter Plastics de la famiya Sagol tiene un shifro de vendidas de 1,25 milyardos de dolares, es una sosiedad Israeliana de importansa mundiala ke da parnasa a miles de famiyas. Su presidente Sami Sagol es Izmirli, i obtuvo el premio de Ekonomia i Doktorato de la Universidad de Tel-Aviv Sin kontar los institutos universitarios ke yevan el nombre Sagol.

• Uvo entreprenores (kablanim) Turkanos grandes, ke fraguaron sienes de kazas. La kompania Alaluf es muy importante en el kampo de la navigasyon. Beni Gaon z.l tuvo grande kontribusyon a la ekonomia.

• Prinsipales (o Mayores) de Sivdades : Aparte de Shmuel Abuav mayor de Kiryat Tivon i oy direktor jeneral del ministerio de la edukasyon ,Avraam Altalef z.l Izmirli, fue el primer mayor de Yehud.

Premios de Israel : En el anio 2004 Yehoram Gaon resivio el premio de Israel. Son los primeros 65 anios. No tuvimos presio Nobel ke es Turkano, ma esperamos ke un dia el sefaradi A.B. Yeoshua lo podra resivir komo eskrivano.

Tenemos tantos universitarios sefaradis, Profesores de Arkeolojia (Jak Yakar), de Sosiolojia (Viktor Azarya), de Medisina (, Almog, Kalderon, Kaneti, Barki, Tovi. Barishak. kon los defuntos Benaderet, Aygen’ i el ke izo el primer transplante en Israel, Dr. Moris Levi), de Agrikultura ( S.Navarro), nasidos en Izmir, Istanbul, Edirne i en Bulgaria. La Profesora de historia Aliza Giniyo-Meyuhas es de Yerushalayim i ladino avlante.

Institutos Universitarios : El Turkano Selim i Naime Salti, la Famiya Gaon de Yarushalayim, ke sin eyos no uvyera Ladino en las Universidades de Israel. Moshe David Gaon fue uno de los primeros edukatores de Israel.

Embasadores:Gabi Levi, el ex-Embasador de Israel en Ankara es nasido en Bergama, al lado de Izmir. Moshe Kanfi, Istanbulli era Embasador en Kazakistan-Turkistan, i Konsul Jeneral en Istanbul, Yaacov Barsimantov z.l ke fue matado en Paris en 1982 por los teroristos, era Izmirli.

Los ke sirvieron en la Defensa de Israel, el Komandante de las Naves de Tsahal el Aluf Avraam Ben Basat, Sgan Aluf Shlomo Altun ke perdyo su vida en kortandoles el kamino de los tanker Sirianos en 1973, i otros ofisieres altos Turkanos ke son numerosos. Lo nombraremos al shefe del estado Mayor de Tsahal David (Dado)

Elazar z"l desendiente de una famiya sefaradi de Yugoslavia . David Shaltiel fue el primer komandante de Yerushalayim en la guerra de independensia. Ay ken sirvio sekretamente en el Mossad, donde su ex-prezidente Tamir Pardo es de famiya de Izmir. Eliahu Hakim i Eliahu Bet- Zuri, ke fueron dos martires ke murieron en Ejipto, eran sefaradis. Existe una larga lista de kombatientes sefaradis en la Hagana, en el Etzel i el Lehi.

Tenemos nuestra kontribusyon en el mundo del Djuzgo en Israel : Dalia Dorner, djuzgo durante anios en el Alto Tribunal (Bagatz), Daniel Beeri (Behar) fue el chefe prosekutor de Tsahal i oy Djuzga en Tel Aviv.el juzgo Dan’el Beeri, ansi ke Raffi Arania en Rishon Lezion, Istanbullis ..

Bien konosida es a la veterana i aristokrata famiya yerushalmita, la famiya Elyashar ke uno de sus miembros era el Rav Yaakov Shaul Elyashar, Gran rabino de Israel. Yitshak Elyashar fue miembro en el vaad akeila Yerushalmita, en la kamara de komersio, en la adjensia djudia,i muy aktivo en la munisipalidad de la kapitala; David Benveniste, maestro, eskritor i investigador fue aktivo en diversas organizasiones publikas en el buto de azer adelantar los sistemas de edukasion en las eskolas en Israel, miembro del konsejo de la munisipalidad de Yerushalayim; ;

Moshe Kastel sefaradi i uno de los mas famozos pintores de Israel ke se gano grande fama en diversos paizes del mundo tambien, entre sus mas famozas pinturas el "Kotel Tehila la Yerushalayim" "megilat haZaav" en la sala de resepsiones en le rezidensia prezidensiala en Yerushalayim i la pintura de pared "Shir Tehila le Yerushalayim" en la Kneset.

• El Yerushalmi Yitzhak Navon , sekretario de Ben Gurion, prezidente del Estado de Israel, deputado, ministro, diplomat, eskrivano, es de mensionar en la lista de los Sefaradis verdaderos ke kontribueron a los 70 anios del Estado. El kantador Avraam Perera z.l kontribuo a la musika de Israel kon su boz muy espesiala. Yitzhak Levi z.l fue el ke enrejistro i eskrivio en notas muzikalas sienes de kantes judeo-espanioles i enkaveso durante munchos anios las emisyones de Kol Israel en Ladino. Sin olvidar a Yehoram Gaon, artista i kantador ke tiene el merito de

• avansar la muzika del Ladino i resiviente del premio de Israel.

I un otro Istambulli, sionista, luchador para el renasimiento del ebreo i la fondasion del estado de Israel fue Marko Baruh, ke el kuartier de Tel Baruh yeva su nombre. Ken son los ke se esforsaron 70 anios para tener bivo al Djudeo-Espaniol i su kultura, no son Yitzhak Levi, Moshe Shaul, Kamelia Shahar, Alegra Amado, Zelda Ovadia - Turkanos, Yehoram Gaon el Yerushalmi, i Matilda Cohen Sarano de famiya de Izmirlis? El Prof. Shmuel Rafael es de famiya de Salonika.I naturalmente el Sr. Yeoshua Selim Salti ke kon su vision i ardor fundo el

Instituto del Ladino en Bar-Ilan, oy de fama mundiala.

;El Sosiologo Amerikano-Djudio eskrivio un livro sovre los Djudios de Turkiya en Israel, i lo yamo (The Unseen- los ke no se ven) : Porke mozotros no estamos embezados a azer bruido i tantanas..

• Por esto no estamos en la politika, i en kada funksion azemos nuestro dover de una manera kalma i diskreta..

Esto seguro ke viendra el dia ke avra un bienazedor Sefaradi ke fraguara la kaza del Sefaradizmo en Israel. Ansi veremos i konoseremos todos los sefaradis ladinoavlantes ke kontribuiron al estado i a la kultura Judeo-Espanyola.

Estamos solo en los primeros 70 anios.