UNYON I TOLERENSYA

(Teksto-Audio)

En Israel en estos dalkavos 2 mezes se azen nombrozos komentaryos sovre la unyon de la uma djudia, sovre la toleransya entre las diferentes tendesyas relijiozas i se pensa ke diyas eskuros mos asperan. Kon el muevo governo de Netanyahu ke inkluye la derecha relijioza i mizmo elementos ekstremos de la derecha, la vieja eskola sosyalista sekulara ke representa un poko mas de la mita de la povlasion del payis se siente en perikolo de diktatura. Sale a las kayes manifesta, echa sloganes ke no están de akordo kon los prensipyos de los partidos relijiozos, los kualos miran de trokar las leyes fundemantalas del estado ke sovre eyos no respektaran el prensipyo de la espartisyon kategorika entre la egzekusyon, la lejislasyon i la djustisya. Ademas dar el poder al governo i a la Kenesset de eskojer los djuzgadores del tribunal supremo i de nomar los djuzgos de los ministaryos no pode ser konsiderado demokratiko, esto destruyera la unyon entre los sivdadinos i ke la opozisyon en el parlamento no esta de akordo a trokar el sistema egzistente. Ansi dinguna tolerensya se akordara a la aplikasyon de las muevas leyes, si se votaran en trokando el statuko.

De sus partes los partidos politikos en poder ke representan la majorita de los votos de las dalkavos eleksyones, insisten ke la manera de eskojer los djuzgos donde sus lavoros son de konsejar los ministeryos i de mirar de impedir todo modo de dechizyon antidemokratika, no devran ser nominados por un komite afuera de los ministaryos por elementos ke son mizmo eyos nominados i non votados. Ademas los djuzgadores del tribunal supremo ke son nominados por un kolejyo afuera del sistema egzekutivo sovre eyos no es demokratiko i pretenden ke semejante prosedura no egziste en las demokrasiyas oksidentalas, dunke kale trokarla o a lo menos adaptarla a ser mas justa. Los partidos de la derecha relijioza a la unanimita keren ke el prensipyo de igualidad entre las 3 fuersas demokratikas sean mentenidas en ekilibro. Impidir a ke la djustisya tenga el derecho final de anular una ley votada. Israel es la sola demokrasiya liberala onde la djustisya es la sola i unika arbitra de su eskopo sovre su otoridad ansi dando al tribunal supremo una fuerza ke no se pode kontrolar.

Komo se ve en estos diyas el biervo ‘toleransya’ se izo muy popular komo los biervos ‘pluralizmo’ ‘demokrasiya’ i ‘unyon’. Se izo moda de uzarlos porke la djente keren darles sus propriyos entendimientos, koza ke es lechos de la verdad i ke los rende difisil a entenderlos. La mayoriya de los politikos pensan ke son tolerentes ma en realita no dan dinguna importansa a las ideas de sus opozantes. Ademas no se puede achetar a tener tolerensya enfrente del inyego de los prinsipyos morales, relijiozos i nasyonales; del antisemitizmo, de la diktatura, del rasizmo, de los krimes seksuales sovre las mujeres i las kreaturas. Muncha djente se konfonden kuando avlan al sujeto de la tolerensya porke aboltan sus egos en vertud. De otra parte se avla de pluralizmo sin permeter a ke el defrente diga kualo el pensa. Se dize ke la valor de la demokrasiya es la libertad kuando esta mizma libertad dezaze la unyon de una sosieta i mizmo de un puevlo.

Si echamos atansyon a la sena djudiya,vemos ke todos avlan de ser unidos, ma kontinuan de otra parte a akuzarse entre eyos de mankar sus promesas a la unyon. No ay duvda ke ser unidos para los djudyos, oy en dia es mas de importante i ke egziste la menasa de espartisyon. Serra danjorozo i embarasente de divizar la unyon de los djudyos, el futuro de Israel i mizmo el del judaísmo depende. Esta realitad deve ser achetada por los laikes, los relijiozos, los ashkenazes, los djudyos orientales, los sefaradim i mizmo por las minoridades relijiozas i etnikas biviendo en pas en Israel. El governo muevo sovre la hiba(presteza) de Netanyahu sin mas tadrar deve purfiar a topar un akordo sosyal para ke muestra unyon, muestra ekonomiya i el pluralizmo kontinue en los mezes vinideros. La opozisyon de su parte deve meter unas kuantas gotas de agua en sus vino i si son sinseros ke aman sus patrias i el sionizsmo (lo ke kreygo), deve achetar kompromizos politikos, ke ayudara la nasyon israeliana en su adelantamiento sosyo-ekonomiko.

Yazarın tüm yazıları için tıklayınız