TANGO

El enverano pasado, tuve el onor de partisipar al konserto de tangos Turkos ke organizo” ADALAR KÜLTÜR DERNEĞI”.

Los enveranos yo i unas kuantas kampanyeras partisipamos al koro de la büyükada, tomamos lisyones de musika Turka en esta asosyasyon. Las lisyones kontinuan i invyerno.

El enverano pasado, el direktor ke mos da lisyon, tomo una desizyon i izo un repertuar de Tangos Turkos. Veramente la musika Turka es una kultura muy profonda ke no ay fin. Seya los kompozitores, seya las palavras de las kantikas, komo se fondaron, por ken se eskrivyeron, todas tyenen enformasyones i sinyifikasyones diferentes. Las palavras de los Tangos Turkos son yenas de amor, de pasyon ke tokan al korason.

A mozos los koristos, mos dyo muncho plazer de kantarlas en la shena, en la plaza de “Çınar meydanı” en medyo la kaye, aviya kaji 1000 personas, a la fin del konser, tomimos munchas palmas i rengrasyos, .

El tango nasyo en las kayes de Buenos Aires en Arjentina, en el anyo 1800 en medyo del siglo XIX. i kontinuo por Eropa i el mundo entero en el siglo XX.

El tango es una forma de emosyon ke se mostra kon la musika. El enstrumento de la musika del tango es el “bandoneon” ke es paryente del akordeon. El akordeon es un invento Almano ma se dyo a konoser kon el tango Arjentino, ke es un bayle konbinado kon la musika de Buenos Aires Arjentina, Montevideo’i Uruguay.

El tango orijinal se konose komo “Tango Arjentino” por el nombre de la tyerra ande nasyo. En baylando ay un sentimyento dramatiko, ay la pasyon del amor, la melankoliya i el erotizmo.

Tango vyene de la palavra “tangere” ke sinyifika tokar en la lingua latina.

A la fin del XIX. En siglo, munchos emigrantes de Evropa i de Afrika vinyeron a Buenos Aires. Estos emigrantes se sintyeron muy solos en este muevo pais, bushkaron remedyos para sentirsen orozos i toparon un muevo stilo de musika.

Ritmos afrikanos, ritmos amerikanos i ritmos latinos, konbinados kon el ritmo de la musika Arjentina, en esta manera se formo el tango.

Este bayle primeros tyempos se baylava en las kayes i en lugares arebashados. Los ke baylavan eran ombres borachos, i mujeres de vida. Por esto primeros tyempos no era rekonosido. Kon tyempo se izo popular, entro al sentro kultural i se izo bayle de salon. Sovretodo en la kapital de Fransya en Paris, tuvo un grande sukseso en los anyos 1940.

El tango es dirijado por el ombre, es un bayle ke se bayla kon musika dramatika, por esto los ke baylan no riyen syempre estan seryozos.

Alora el tango kuando entro a Turkiya?

El tango entro a Turkiya, en mezmo tyempo ke la Evropa en el siglo XX. kon palavras etranjeras.

Dospues, syertos kompozitores Turkos, komo Fehmi Ege, Necip Celal Andel, Necdet Koyutürk, kompozaron tangos, siguro kon palavras turkas i se konvirto a la musika Turka.

El primer Tango Turko es:

“mazi kalbimde bir yaradır”

“el pasado es una yaga en mi korason”

Syempre ke estesh alegres porke si vozos estash alegres i mozos estamos tambyen.

Apretar al boton para ver todos los eskritos