SEREMOS PRONTOS PARA 5783

(Teksto-Audio)

(Yazarı sesli dinlemek için tıklayınız)

SHANA TOVA, oguro alegriya, sanedad a todos mis keridos lektores, amigos i miembros de la asosiasyon IYT. Tuvimos una anyada pasada kon munchos evenimientos donde siertos mos alegeraron i otros mos atristaron. Munchos muevos se asperan, rogo a ke eyos no serán difisil para la uma djudiya. Sin ser muy pesimisto vos dire keridos lektores ke la mueva anyanada no será muy fasil para los Israelianos i mizmo para los djudyos de la diaspora. Mira lo ke enkontraremos en los diyas vinideros:

1- Kriza enflasyonarya mondiala. El governo Israeliano devra tomar todas las prekosiyones para ke la vida no enkarenska muncho, sovre todo kontrolar los presyos de los nuevos edifisyos. La banka Federala de los Estados Unidos visto la presyon inflasyonista pujo, en estos días, su tipo de entereso de 0.75 por sien, koza ke alarma la ekonomiya mondiala, las borsas i el komersyo internasyonal. Veremos lo ke desidera la Banka de Israel a este sujeto. En kavzo de no kerer pujar los enteresos de la mizma manera de los ke pujaran en la ‘zona dólares’, el shekel peryera de su valor, lo ke kere dizir el enkaresimiento de los produktos importados, sovre todo los ke son de prima nesesita.

Ademas, el konflikto Ukranyano, por seguro forsara el euro de peryer mas de su valor enfrente de un dólar bien fuerte el kual pagara un intereso muncho mas alto. El mundo se rejira para topar remedyos a la kriza enerjika de la Evropa i Israel kon Misrayim serán en este kampo los pionaryos en los meses vinideros.

2-Eleksyones. Israel vota por la sinkena ves en tres anyos i medyo, koza ke no se vido en la istorya de este payis. 22 partidos partisiparan a los votos de los 120 deputados de la Kenesset. Anormaliya ke no tiene remedyo si el sistema elektoral no troka. Difisil de krear una majorita en la Kenesset si los grandes partidos de la siedra komo los de la derecha no achetan las demandas de los chikos partidos ke partisiparan al governo. Komo se ve, ke un chiko partido todo en azyendo parte de la koalisyon kon solo sinko deputados, refuzando de votar kon el poder, abastese a ke el governo kayga.

Esta demokrasiya muy manseva no podera kontinuar si los politikos, los ombres de sensya, los istoryanos no se desidan a inspirarsen de las grandes demokrasiyas komo la Ingleza, la Franseza i la de los Estados Unidos para aparejar una mueva ley elektorala ke se someterá al puevlo su forma de referandum. Difisil de poder djuzgar la elit de la intelijensya de este payis de no kerer topar remedyo a esta grave situasyon onde el politiko aze su politika solo por el entereso de sus ideas.

Kon regreto se ve en las dalkavos deklarasyones elektoralas de siertos kandidados de la siedra de akuzar el partido Likud de ser ‘sefaradi’. Primo ke no es verdad, sigundo mirar a krear inimista entre los sivdadinos de este payis a mi opinión es una traisyon ke se deve kastigar.

No savemos el dia de la votasyon kualo va salir de las kashas, ma no me enkantare de ver ke ni Lapid ni Netanyahu saliran viktoryozos, lo ke kera dizir una vez mas votasyones.

3-El konflikto palestiniano, la lucha kontra el terrorizmo. 100 anyos de inimista, de gerras i de terrorizmo palestiniano no van a despareser de un diya al otro en 5783 en favor de una paz justa. Israel ofrese una pas de vensedor lo ke es justo visto ke el fue siempre atakado i es el ke siempre gano las gerras. Los palestinianos no achetando de dinguna manera la egzistensya de Israel, kontinuaran de mirar de todos los modos posivles de atakarlo esta ves kon el grande ayudo del Iran. El Iran poko antes deklaro al mundo de la tribuna de Las Nasyones Unidas ser el inimigo de Israel i kerer su destruksyon. El arma sus proksis, a saver, el Hamas de Gaza, el Hezbullah del Libano, la Siriya de Asad ke esta en estado de gerra kon Israel i mira por mas enfuerteserse militaramente para poder produizir su bomba atomika. Situasyon alarmante para el puevlo de Israel el kual djuro de defenderse i si demenester será de atakar el Iran direktamente para impidirlo de posedarla.

Durante el anyo vinidero visto la flakeza de la otoridad de Abbas en Yehuda i Somron i su konflikto kon el Hamas de Gaza se aspera, komo el anyo pasado ke una volonta agresiva kontra el djudyo kontinua a dezveloparse en las sivdades komo Jenin i mas. La mueva taktik del Hamas en estos territoryos es de armar la mansevez para ke kometan aktos de terrorizmo individuales afin de matar lo mas posivle de soldados de Tsahal i sivdadinos israelianos. Les ambezan a ser shahid i les prometen una rekompensa ke los paryentes la resiveran despues de sus disparesyon. Una grande partida de los budjetos de la Otoridad komo las de las organizasyones terroristas palestinianas desde anyos van a estas famiyas lo ke enkoraja siertos mansevos a azerse shahid.

4-Muevas relasyones kon payizes arabos. Israel kontinuara a mirar a azer paz kon otros payizes arabos, espesiyalmente kon la Arabia Seudita i la Endonezya, a dezvelopar ekonomikamente relasyones kon los vizinos tal Misrayim i la Jordaniya. Se espera ke el proyekto finansado por los Emirates de krear un espasyo en el dizierto jordano destinado a abasteser elektrisita solarya a Israel i de la otra parte de establisir una uñita de desalar la agua de mar ke dará 200 milyones de metro kubos de agua dulse a la Jordaniya, vera el dia.

Ademas el futuro governo devra mirar de mejorar la situasyon ekonomika de los arabos israelianos sovre todo los de Yerushalayim, komo lo disho el primer Lapid, la integrasyon de la minorita araba en dezvelopandose eya se sientara amiga de Israel.

Yazarın tüm yazıları için tıklayınız