REKUERDOS DE MAESTRAS

Esta semana esto eskriviendo sovre los livros de mi kerida amiga Reneta Sibel Yolak. Mis rekuerdos de maestra tambien estan en estos livros. Reneta eskrivyo dos livros: Dostluk Köprüsü (Ponte de Amistad) i Öğretmenim Canım Benim (Maestra mi alma).

Traduizi el artikolo ke me embiyo Reneta:

Esto aziendo la profesion de profesora dezde muncho tiempo. Ansenyar i ambezar es una forma de vida para mi. Kualo esto ansenyando?

Praktikamente todo lo ke se . Pode ser una lisyon de un livro ke esto meldando, una istoria o linguas ke konosko, komo ingles, espanyol, franses, ebreo, arabo i de otro lado folklor, raketbol, squash, tenis, todo lo ke me ambezi en los kursos ke tomi. Es komo si la palavra "nasida para ansenyar" fuera para mi. En esta filosofia de vida, so a la vez profesora i eleva. Esto tomando muncho plazer i de las dos. Tambien me plaze partajar saverisyo. Durante muncho tiempo tuve la idea de eskrivir mis memorias de profesora.

Ma komo? Deviya de ser un livro tal ke fuera diferente de los otros rekuerdos de maestras. Devia de ser un livro ke se iva poder meldar muy presto, kon saverisyo valorozo i ke iva dar plazer en meldando. Despues de pensar durante muncho tiempo, avli kon mis amigos ke konosi i ke ansenyan a mi dorredor, desidi de inkluirlos en mi livro. Kuando empesi mi investigasyon, me apersivi ke aviya maestras en munchos ramos en mi entorno. Pensi ke konosko solo profesoras de ingles komo mi, ma kuando miri a mi dorredor kon mirikiya, vide ke ay munchas profesoras ke se okupan de munchos diferentes sujetos. Me trusheron o me rekomendaron algunos maestros de mi ramo i otros maestros amigos. Por lo tanto, aviya una armada de maestros a mi doredor. En mi filosofia de vida yo kreo ke todos tienen alguna koza de ansenyar. Esto es, absolutamente ansina. Podes saver muncho, ma por seguro ay un otro ke save mas de ti. Me aze muncho plazer de propajar lo ke se. Si alguno save kozas ke yo no se, imediatamente demando i me ambezo o investigo.

Kuando desidi de eskrivir un livro, me se izo dos livros komo resultado, de tantos maestros amigos ke kerian eskrivir. Esto me izo grande plazer.

Ansi, los livros de las memorias de las maestras se publikaron en dos vezes. Personas de diferentes relijiones eskrivieron en el primer livro, al kual kije darle el nombre "Ponte de la amistad". Porke independientemente de muestras relijiones, todos eramos amigos i kompanyeros. De la profesora de ingles a la profesora de espanyol, de la profesora de bale a la profesora de piano, de la profesora de klasa a la profesora de edukasion espesial, de la profesora de sensyas a la profesora de matematikas, de la profesora de bayle a la profesora de fransez, del profesor de dezvelopamiento personal al profesor de konditura, del profesor de istoria al profesor de sensyas sosialas, del profesor de kontabilidad al profesor de administrasion de kaza, del profesor de kustura al profesor de broderiya, los profesores kaji de todos los ramos eskrivieron sus memorias. Esto me enkanto.

Antes de ampesar mi ofisyo djuri komo los otros amigos, lo ke me izo riyir. Los maestros djuran komo los medikos. Por su puesto es dover de un maestro de tratar a todos de manera igual i kon amor, independientemente de su reijion, idioma, rasa o pais. Inkluso en la gerra, el maestro deve amar a kada kreatura i no diskriminarlo. En este livro, maestros i edukadores djudios, musulmanos, gregos i armenios eskrivieron sus rekuerdos independientemente de la relijion, la lingua o la rasa. Porke independientemente de la rasa, de la relijion i la lingua, el maestro es un maestro i el elevo es un elevo.

Kije meter en orden estos livros, un mozaiko de kolores muy ermozas. Esto pujo la valor de los livros visto ke en dingun pais no se eskrivyo un livro de esto tipo. Estos son los primeros de sus djenero.

Ay mas en este livro ke lo aze espesial. El ampesa kon Atatürk i eksplika la valor ke le dio al maestro. El Dia Mondial de los dochentes se selebra el 5 de Oktobre ke diferramente ande mozotros se selebra en el 24 de Noviembre. Esto no egziste en dingun otro pais.

Ademas, keriya inkluir maestros ke no estan bivos, ma ke sus nombres nunka se olvidaran. De esta manera, sus nombres van a ser rekordados por siempre. Ansi estos livros son enteresantes por ke kontienen los rekuerdos, eskritas valorozas de los maestros de diferentes ramos, a saver Israel, Estados Unidos, Suissa i de sivdades turkas komo Malatya , Adana, İskenderun, Sinop, Ankara, Estambol i Izmir. Maestros de kazales, de eskolas privadas, de eskolas publikas, universitarios, todos partajaron sus diferentes eksperiensias.

En el otro livro maestros de diferentes relijiones partajaron sus ermozos i emosyonantes rekuerdos en este livro yamado “Mi maestro Canım (alma) Benim(mia)”. El punto komun de los maestros en el livro es ke aman muncho a sus elevos i los enfluensan i los aparejan para la vida. Devemos saver ke no todos poden ser maestros. Ay ke kerer muncho, muncho a los estudiantes. Sovre todo, es nesesario ser devuado . Ay ke ser pasensiozo i tener veluntad. Kale ke afekte chikos korasones i vidas. La edukasyon es muy sakragada.

Yazarın tüm yazıları için tıklayınız