Muy buenos dias keridos. Pasimos una otra semana, kreyo la pasimis kon sanedad i alegria.
Oy va provar a kontar, sovre los Efforsos ke tuvimos, bushkando detras de plata. Montante ke mos dara el poder, a realizar un tiatro en Ladino.
En el renkontro ke tuvimoz kon la direksion; desidimos ke antes ke todo, devemos de topar un sponsor. El ke va akseptar a ayudar (seya kon su moneda o su kredito) anke seya limitado. Ansi puedemos desidar sovre todas nuestras demandas.
Mos adresimos, a los Onoravles ke estavamos seguroz, ke tienen el poder. Deklarimos delantre de eyos el nuestro projekto. Siendם ke estavamos en anyo; ke egzisten aparejamientos i programas diferentes, para kumplir "500 anios salida de la Espania". El projekto fue bien resivido. Tanto; ke en vista telefonaron a los direktores de Bankas nombradas. Entre las bankas, uvo ke akseptaton un renkontro. Estavamos kon alegria i esperansa pozitiva…. Pasando tres o kuatro dias, arrivimos a la banka. El direktor mos resivyo kon una kara riente. Enteresante ma mos trataron i kafe kon biskuchos.
Siendo ke fuimos invitados de el direktor de la banka, por esplikarle la nuestra idea; seguro ke devia de avrir la kesion i enpesar la avla uno do nozotros; esta onor era de el onoravle, el uniko ke kon su poder arrivimos a el renkontro.
El sinior direktor, sintio asta el fin sovre el projekto. La verdad dizir, el projekto era grandiozo. Desorte ke le plazio, i demando si pudemos meter la bandiera i reklamar el nombre de la banka, kon puntos grandes en la shena... Akseptimoz en vista.
La segunda demanda fue (mijor si nunkua ayegava a vinir esta demanda) la kantidad de espektatores, se asperan a vinir!!!....
Komo se pude dar un shifro a esta demanda? No egziste uno, ke sera patron de la experiensa sovre la kesion. Uno de nosotros echo de kavesa el shifro de “tres mil” ....
Frankamente, en todo el tiempo ke me okupi de el Teatro Ladino, nunkua arrivimos a este shifro. Ma ke se aze; ya salyo de boka, no avia mas ke retifikar el shifro. Ansi pensimoz ke puedemos resivir el ayudo de la banka…. Andee! La repuesta de el direktor, fue kurta i klara "pardon ma; ne es konvenivle para la banka, de kitar kualkuna suma por tanta poka cente". I mos metyeron en la puerta, kon onor.
Pasimos una otra semana keridos, kreyo kon todos sanos i alegres.
Despues ke salimos de la banka, kon bavas eskuriendo en boka; ke tanto estavamos kon esperansa de salir kon manos yenas. Tornimos a pensar kualo i komo azer. Grasias a el koraje de los miembros en la direksion. Desidimos de adelantar kon el projekto, seya lo ke seya!
Unos de los miembros; tomaron la ovra de bushkar kaminos, ke kavzaran a una entrada, anke sera de suma chika. Por ekzempio, adresar a las firmas, ke akseptaran a dar reklama en la programa ke tenemos aparejar, O ke donaran siertas kozas ke vamos a tener menester. Ansi avansamos de los gastes. I provar a demandar donos en kontrario de bilietos de el jugo, la ora ke seran aparejados.
El sonyo, de meter en shena el jugo en el tiyatro "ABIMA" Kedo komo un sonyo solamente. Deviyamos de avansar kada grosh, para arrivar alo ke dezeamos. Lo ke kero dizir; estaremos kontentes, si mos daran a meter en shena el jugo afilu en Yafo.
Enpesimos a preguntar por voluntarios, ke ayudaran i les viene de la mano kualsiker koza. Komo, kostumes, amatores ke les viene de la mano fondar dekoratsia, unos ke pueden ayudar en makiaj. Ext.ext…
Al lado de estas problemas, deviyamos de perkurar; i no dar a konsintir a los jugadores las difikultades. Sino; de kontunear kon las provas. En serka tiempo, deviamos de tomar mezuras de shena, para enpesar provas kon muvimientos.
Al vermos kon sanedad i alegria. (a kontunear)
Albert Anah
Comments