KUALO SIGNIFIKA EL MUEVE DE NOVEMBRE PARA LOS ALMANES

Kada anyo, el 9 de Novembre aze akodrar a los almanes, dos evenementos de la istoria. Este dia es el ‘Dia de alegriya’ i el ‘Dia mas triste’ para eyos.

En el 9 de Novembre 1938, sinagogas fueron kemadas durante el pogrom de Kristallnacht. En la mezma data, 33 anyos antes, la Pared de Berlin fue derrokada. Este dia es el ‘Dia del destino’ para el pais.

En este dia, Berlin fiesta la unifikasion de las dos Almanyas. Konsertos delantre la Puerta de Branderburgo, ekspozisiones en toda la sivdad, konferensias i programas en la televizion, son unas kuantas de estas aktividades.

Ma, kada anyo, la komemorasion de Kristallnacht asombra las selebrasiones. Kristallnacht es mensionado en los diskorsos, i en los sermones de la media. En medio de esta alegriya, no kale olvidar el pogrome de 1938.

Este anyo aze 94 anyos del shapitro el mas aliskuro de la istoria almana. Kristallnacht fue un masakro sistematiko ke aze averguensar los almanes. Este evenemento no deve ser olvidado. El 9 de Novembre mos aze akodrar ke la libertad es una koza ke kale gerreyar para obtenerla i para defenderla.

Es verdad ke Almanya troko muncho.

Almanya, oy, es un payis riko, i djuga muy grande rolo en las dechiziones de la Union Evropea.

La komunidad djudia de Almanya tambien troko muncho. Kon 220.000 miembros, oy se izo una de la mas grandes komunidades de Evropa. En el anyo 1989, munchos djudios emigraron de la Rusia. Komo rezultado, muevas komunidades se establiseron, i muevas sinagogas fueron konstruidas i ansi los rabinos pujaron. Dos eskolas rabinikas fueron establisidas tambien.

Antes ke los emigrantes vinieron, la majoriya de los djudios de Almanya eran sovrebivientes del Olokosto i refujiados. Munchos de eyos no estavan siguros si ivan a kedar en Almanya. No tenian rabinos en la komunidad, i por esta razon, no podian tener una vida relijioza. Despues de la emigrasion, muevas komunidades fueron formadas. Munchos rabinos fueron emportados de Israel, ma i munchos fueron edukados en Almanya mizmo.

Los djudios almanes estan aziendo grandes esfuersos para poder alkansar a la djuderia almana de anyos antes. El establesimyento de una universitad djudia, kon munchos elevos djudios i non-judios, es el empesijo de estos esfuersos.

Mezmo ke paso trenta i tres anyos de la unifikasion de los almanes, no se pode dizir ke la djente del este i del oveste se entegraron kompletamente. Se pode dizir la mezma koza por los djudios. El rezultado de sesenta anyos de opresion i de ateizmo dainda tiene su trasa. Los emigrantes djudios dainda se sienten serka de la identidad judia. Munchos almanes del este tambien no estan muy kontentes. Los almanes del oveste tienen mas altas ganansias i mijor echos. Ma, i las dos partes son kontra el rasizmo i el antisemitizmo.

Kristallnacht no pode ser olvidado. Esto es emposivle. Kada elevo esta al koryente de este chapitro de verguensa de la istoria almana.

Yazarın tüm yazıları için tıklayınız