ISRAEL KOMBATE LA SIEDRA I EL ULTRA LIBERALIZMO

(Teksto-Audio)

Dezde ke Israel se fondo el fue observado kon lupa por la mayoriya de los muvementos politikos de la siedra internasyonala i por los ultraliberales ke no se arestaron fin oy en dia de kritikarlo por kualker razon i de no achetar a rekoneser su egzistensya mizmo si eya fue votada por la Asambleya de Las Nasyones Unidas. Mi papu me diziya, los goyes nunka mos darán sus apoyos por ke somos una uma unika i diferente de las otras. 75 anyos de la egzistensya de Israel no les emporta, eyos simpre meten en duvda su egzistensya i el konflikto Israel-palestiniano es una buena okazyon para enkorajar el antisemitizmo sovre sus diferentes fachas.

Komo azer, para impedir esta situasyon ke perdura dezde miles de anyos. Israel aktualamente tiene el poder de defenderse i devra mirar grasias a su fuerza politiko- sosyala a kombatir esta inimista ke krea muncho danyo a la posibilita de poder topar un reglamento del konflikto kon los palestinianos.

Kon el establisimiento del muevo governo Netanyahu, Israel troko su governo de raises sentro-sieda a uno de una koalisyon de pura derecha. Komo savemos Netanyahu dirijo el payis munchos anyos i konosemos su manera de ovrar. Entonses se aspera ke el muevo governo azera en su kamino, muevos pasos komo atakanar el konflikto kon los palestinianos.

Munchos istoryanos mansevos dan sus puntos de vista sovre este sujeto i enkorajan a Netanyahu a ser mas realisto en sus tratos de la kestyon de rekonoser kon ozadia una isla independiente (si se puede dizir ansi) palestiniana al seno de Yehuda i Shomron tyerras biblikas ke dingunos de la derecha achetaran. Bien entendido ke esta independesya en dingun kavzo no deve ser armada i ke su ekonomiya komo su defensya interyor devra ser kontrolada por Israel. En otros termos los palestinianos devran peryer kon umilde sus sonyos de destruyir Israel i por lo mas achetar ke no tienen mas dinguna esperanza de venser a los djudyos. En el momento ke dechizeran de achetar ke peryeron sus luchas, Israel será el vensedor i la gerra se terminera. Es alora ke el antisemitizmo de la kaye palestiniana podera ser kontrolado i amejorado. Ma la realita de oy es ke la fanteziya de destruyir Israel egziste en mayoriya no solo entre los palestinianos ma en una grande partida de los arabos ke mizmo sus governos tienen akordos de pas o de rekonosimiento kon Israel.

La utopia araba es mantenida por los antisemites i anti israelianos del oksidente komo del oriente, basta de ver la manera ke Israel es kondanado en Las Nasyones Unidas i en las kanchilerias diplomatikas. Ni el Iran, ni la Korea del Norte, ni la Rusia i ni mizmo payizes de la Amerika del sud no fueron i no son kondanados tanto komo Israel. Netanyahu devrea okuparse de este estado i provar ke Israel es la sola demokrasiya en el Medyo Oriente, fuerte en sus prinsipyos de respekto de los derechos umanos. No es koza fasil, ma es posivle de realizarla grasyas a una diplomasiya i a una informativa bastante aktiva en este tema. No permeter a ke konsejikas falsas, sin evidensyas sean kontandas en la prensa eskrita i televisada, kombatir fina ke la kaye muzulmana abandona la idea de poder venser a Israel i mirar de empidir a ke esta esperanza kontinua a egzistir.

No amostrar djenerozita en dingun kavzo en la vida de kada dia, no dar kontentes al inimigo son kozas provadas en la istorya. Los inimigos de oy miran a ambreyar, a kortar la enerjiya i la agua a fin de venser. Tenemos a bastante modeles, La Rusia, La Korea del Norte, el Iran i mas oy son debasho de ambargo ekonomiko. ¡El eskopo es de meterlos en kuklias! Si se puede. La politika israeliana devra tomar lesones de estos estados prekaryos i no fasilitar la vida de sus inimigos.

Ma, mos viene al tino, ke Israel en 1967 avia vensido kon una viktorya ekstraordinerya en la istorya de la umanidad, los inimigos arabos i sus partizantes. Efektivamente munchos de eyos entendieron ke peryeron i achetron la prezensya de Israel en el Medyo Oriente komo payis djudyo. Ma no los palestinianos por ke no fueron a mi avizo aharvados bastante. Eyos fueron i son persistientes en sus ideal de destruyir Israel, magrado ke no tienen la mizma fuerza de los payizes arabos. Para eyos la eliminasyon de Israel en una kestyon de identidad. Sus ideolojia empeso un siglo antes kon sus líder Amin al-Husseini, el kual en sus prensipyos avia aronjado i inyegado todos los aspektos del djudaizmo, del sionizmo, de la prezensya djudia i de Israel en ‘Eretz Israel’. Aktualmente sea el Hamas sea la Otoridad Palestiniana konservan el mizmo konsensus, tienen taktikas diferentes ma el buto es el mizmo: la destruksyon de Israel. Esto prova ke todas las konsesyones de Israel no tienen i no teneran dingun efekto.

Imajinaremos un momento, lo imposivle, ke los palestinianos trokaron de ideolojia i se asentaron al doredor de una meza para diskutir de una pas sinsera, alora kualo va ser el komporto de la siedra i del ultra liberalismo oksidental? Por seguro ke se arezvalaran de sus siyas i se toparan en estrecho para enjenyar muevas konsejas de animista kontra el djudaizmo!

Yazarın tüm yazıları için tıklayınız