Israel es uno de los 10 mas orozos paizes del mundo

El puevlo de Israel esta biviendo en una jeografia difisil, entornado de enemigos. La kareza en el pais esta muy alta. En kada kaza kale ke marido i mujer lavoren para ke puedan mantenersen. Ijos i ijas kale ke se vaygan a la armada, no es posivle de pueder fuyir de este dover. La teror los esta enfasyando. Malgrado ke los relijiozos eksesivos no se keren ir a la armada, el governo esta kontinuando a ayudarlos. La politika esta entrefikada. No son solo estos problemes. Tienen munchos mas problemes ke no puedemos saver en mirando de enfrente.

Un pais kon este karar de difikultades esta elijido komo el mueven orozo pais del mundo. No es una surpreza. Kada ves ke demandas a los israelianos komo estan, te responden ‘Baruh Ashem’!

Israel esta okupando el mueven lugar en el raporto mondial de la Felisidad 2022 emitido por las Nasiones Unidas, en el 18 de Marso. En los tres anyos pasados, Israel okupo el dodjen lugar ke fue la pozision la mas alta ke tomo fin agora.

Los paizes en el "Top10" son: Finlandia, Danimarka, Izlanda, Suiza, Paizes Bashos, Luksemburgo, Suesia, Noruega, Israel, Mueva Zelanda.

Este anyo marka el diezen aniversario del raporto mondial de la Felisidad. En este raporto ay datos ke mos informan komo las personas de 150 paizes estan evoluando sus proprias vidas. Aparte de las evoluasiones de las personas sovre sus proprias vidas, en las kestiones ay variantes ke inkluyen el apoyo sosial, la esperansa del governo por la salud, i las persepsiones sovre la libertad, la jenerosidad i el abuzo.

Lo ke es enteresante es ke Israel esta klasifikado entre los 10 paizes dalkavo por los ke partisiparon a la anket ke preferan una vida trankila en lugar de una vida emosionante.

El informativo mondial de la Felisidad 2022 revela una luz briyante en tiempos obskuros. La pandemia trusho no solo dolor i sufriensa sino una pujita en el apoyo sosial i en la benevolensia. Mientres, luchamos kontra los males de la enfermedad i de la gerra, sera esensiel rekordar el dezeo universal de felisidad i la kapasidad de las personas para ayudarsen unos kon los otros en tiempos de grande nesesidad.

Yazarın tüm yazıları için tıklayınız