(Teksto-Audio)
(Yazarı sesli dinlemek için tıklayınız)
El diya del voto, asentado en kaza, mi preokupasyon fue de pensar ken komo va vinir al poder en Israel, visto ke deviamos eskojer un partido politiko, al kual davamos muestra preferensya. Verso midi pregunti a mi mujer kualo pensava sovre los partidos politikos i a ke oras ivamos al klup del moshav en el kual moramos para votar. Eya me respondyo ke seria mijor de ir verso la tadre i entremientes pensar una dalkavo ves a ken dar muestro voto.
El kampo de la derecha paresiya muy bien unido entre la derecha relijioza i la ekstremista en teniendo a su kavesera el Likud ke kon determinasyon purfiava otra vez a obtener la mayoriya en la Kenesset. Por kontra la siedra ke se avia ajuntada en el dalkavo governo a siertos partidos de la derecha, paresiya totalmente dezunida i la eksperyensa ke tuvieron durante un anyo no les avia dado dinguna vizyon de esperensya sovre sus futuros al seno de la Kenesset. Dunke me demandi kualo azer? Pensi sovre esto i dechidi de demandar sus avisos a 10 personas mis mas serkanas. Las repuestas me konvensyeron ke devia votar por el Likud visto ke 5 de eyas dieron sus preferensias a Binjamin Netantahu (Bibi), 3 a Lapid i 2 a Gantz. Ansi voti por el Likud.
Mi voto fue el 5en en tres anyos i medyo i oy esto kontente de ver ke la dechea kito 64 deputados, lo ke permetra a Bibi de toparse una otra ves en la kavesera del payis por los 4 anyos vinideros. La siedra peryo muncho de sus sempatizantes i mizmo el Meretz desparesyo de la shena politika del payis. La dezunyon de los politikos arabos servyo a la derecha donde los votos ke peryeron se hueron en favor del Likud i ansi muestro chiko payis sovrebivira finalmente sin nesesita de ir por un largo tiempo a votar.
EL prezidente Herzog, ombre vinido de la siedra israeliana malgrado sus konviksyones se topo enfrente de 64 rekomandasyones demandandole a ke Bibi sea nominado primer ministro i sovre la ley en vigor es lo ke izo. Solo, una grande parte del elektorado laik mira esta nominasyon kon suspisyon visto ke el 10 por sien de los elidos de la derecha fueron o egziste la probabilita de ser kondanados por la djustisya. No son deltodo kontententes i esto diviza la sosieta israeliana en dos, los relijiozos nasyonalistos sionistos de una vanda i los non relijiozos progresistos de la otra. La Diaspora amerikana malgrado ke se topo embabukada en las eleksyones del parlamento amerikano seguiyo kon atansyon las eleksyones israelianas i demostra ansi sus sospechos enverso la mueva koalisyon onde los relijiozos fondemantalistos okuparan postos de ministeryos importantes. Koza ke Israel será visto komo un payis antidemokratiko i mizmo rasisto.
De mezmo la administrasyon amerikana no ve kon un buen ojo a ke su aliado Israel kayga en manos de responsables sin kompetensias en el kampo de defensya. Eya mira ken se va azer el ministro de la defensya, kon el kual no dezea tener entrompesos. La razón es simple. Detrás el primer ministro, el ministro de la defensya es la persona ke tiene lo mas de kontaktos kon la administrasyon, en soma, sovre los sujetos los mas sensitivos entre los dos payizes. No olvidar ke Israel es el ke resive miliardas de dólares de ayudo tomados sovre las taksas del sivdadino amerikano, teknoljiya militar ultra avansada i el mas alto nivel de intelijensya. En despartes de esto el ministro de defensya kontrola la administrasyon de los territoryos administrados de Yehuda i Shomron, el dirija los kontaktos kon la Administrasyon palestiniana. Nada de nada se aze en estos territoryos sin su aprovasyon. Dunke el personaje para los amerikanos es mas de importante. Bibi no pode permetirse de nomar ministro de la defensya sin pensar 2 vezes visto ke el devra tener en tino la reaksyon amerikana, sovre todo el ayudo militar i el veto en las Nasyones Unidas. De mi punto de vista penso ke Bibi guadrara el portofolyo de este ministaryo importante por lo menos 6 mezes a vinir en su seno o dándolo a un miembro del Likud fin ke la Kenesset pasa las leyes ke lo aravya. Una ves esto echo si Gantz achetara, lo mirara de introduizirlo en el governo en dándole la direksyon del ministeryo de la defensa. Entonses el podera formar ansi un governo kon la partisipasyon del sentro derecho, lo ke kalmara el negativizmo egsistente oy en dia.
Por las oras en el muevo governo partisipan solo los partidos de la derecha a saver: El Likud, el Shas, el Siyonizmo relijiozo, Otzma Yehudit, Djudaizmo de la Tora i Noam. Las pretansyones de los dirijentes de estos partidos son grandes tal el sinyor Besalel Smotrich ke demanda a ser ministro de la defensya, Arie Deri del Shas ke ser ministro de la ekonomiya i mas..
Veremos kon pasiensya komo Bibi maestro en politika politisyana se va aranjar para tener todos estos partidos relijiozos debasho de su kontrol i kontinuar su politika ke konosemos. No, a un estado palestiniano, integrasyon de siertas rejiones de Yehuda i Shomron debasho la lejislasyon israeliana, mentenir la tregua kon el Hamas i mirar de defenderse kontra el Iran, sovre todo de impidirlo a ke tenga la bomba atomika. Al interno del payis mirar de kontrolar la inflasyon, amijorar la infrastruktura de transporto i todo en apoyando la alta teknolojia a dezvelopar fondos ke ayudara a la povlasyon prove ke puja de anyo en anyo.
Comments