ESKE EL BUEN GIZADO TRAYE ATRAS LA AMISTAD?

(Teksto-Audio)

(Yazarı sesli dinlemek için tıklayınız)

Alhad pasado la Unyon de los Turkanos de Israel (IYT) enjuntos kon el reprezentante de la Ajensiya del Turizmo de Turkiya en Israel, organizaron un “festival de gizado turko” en los lokales del Terminal, en Batyam. Dezde 15 anyos por la primera ves un evenimiento semejante fue organizado por la IYT a la demanda de los repzentantes de la diplomasiya turka en Israel. Eya se kargo de azer partisipar en diferentes standes 5 firmas israelianas spesialistas en este kampo i organizar la festivita ke duro dia entero.

Un filmo dokumentaryo sovre los diferentes foburgos de Estambol onde bivian los djudyos, aparejado por el miembro de la IYT Kemal Levi fue dekontino prezentado. El Dr. Yosef Sibi prezento en su ekspozisyon sus miniaturas de kazas viejas otomanas. La ekspozisyon de tablos de konsepto turko de Leyla i Nesim Haras fue vijitado kon grande intereso por muncha djente, el kual tuvo sukseso.

Oras de tadre en la atolye de gizado, la sinyora eskritorya Adel Kohen i el shef Loni Tavashi gizaron kada uno un djenero de plato turko. Adel Kohen en su livro ‘Las komidas de Gaziantep’ prezenta formulas de gizado del sud este de la Anatolia. El shef Tavashi es muy renomado en Tel Aviv, por su lahmacun (pita de karne pikante) i su pastirma (un djenero de pastrama pikante).

De otro lado el grupo de mansevos de olim turkos ‘Isratef’ baylaron bayles folklorikos israelianos i el grupo instrumental israeliano Harel Scachal & Ottomans diyeron un konserto de muzika turka, muy reushido. Sienes de partisipantes no mankaron de baylar i de aplodisarlos.

En la seksyon de los eskrivanos, la eleva doktorante en el Instituto Salti, la sinyora Michal Moskovich avlo i konto sovre el livro ‘la Sinyorita de Izmir’ i los sinyores Aaaron Baruh, Yakup Barokas, Robert Schild, Yosef Sibi i Michal Moskovich afirmron sus livros ke se vendieron al profito de la IYT.

Dezde las 11.00 de demanyana fin a las 18.00 de la tadre miles de israelianos donde la mayoriya eran de orijen turkana pasensyaron en la kola de entrada i delantre los standes ke vendían sus espesialidades. Personalmente despasensiado de asperar en la kola de los lahmacunes me kontenti de un sutlach (puding) solo. Imposivle de poder kreer ke los vendedores kedando sin ropa fueron obligados de serrar los standes antes la serradura. Malgrado esto el dia paso kon alegriya i amistad i munchos enkontros entre los vijitadores fueron “topaduras de kos.huegros”.

El presidente de la IYT Ovi Roditi Gulersen (Gulershen) en su diskorso de bienvenida avia dicho ke el buto de este jenero de evenimientos es de mirar a mijor azer konoser la Komunidad de los djudyos turkanos de Israel ke son serka 80.000 miembros si no mas. Lo ke mos aze plazer es de dar a konoser la kultura i la gastronomiya de la kuzina turka a los Israelianos i ansi ayudar al turizmo turko.

De su parte el shef de la diplomasiya turka el sinyor Mehmet Sekerci (Shekerdji) a la okazyon en su avla disho: “Rengrasyo a la IYT por aver organizado este festival de la kuzina turka, la kuala esta fiestada a traverso el mundo en 200 lugares diferentes, ansi darla a konoser. Grasyas a este evenimiento esperamos krear diálogos i amistades kon los puevlos”. La inisyativa del proyekto fue pensada por la sinyora Emine Erdogan, espoza del prezidente turko Recep Tayyip Erdogan.

No ser kontente de la mueva amistad ke el governo Turko esta mostrando después de 15 anyos de inimista mos enkanta. Todo en estando kontente, la diplomasiya israeliana devra echar atansyon, a ke la prezensya de los teroristos del Hamas en Turkiya, la kuala organiza matansinas en muestro payis no devra ser achetada. Ademas la Turkiya devra arestar de mesklarse del statuto de Yerushalayim, la kapitala istorika del puevlo djudyo. De no mirar de meter intrompesos entre Israel i la uma araba. Jerusalem ahuera del puevlo djudyo no fue nunka la kapitala de dingun payis independiente dezde 2000 anyos. Esta realita el Prezidente Erdogan devra entenderla.

Yazarın tüm yazıları için tıklayınız