(Teksto-Audio)
(Yazarı sesli dinlemek için tıklayınız)
El politiko renomado inglez, lord Palmerston antes dos siglos avia dicho:” las nasyones no tienen permanentemente amigos o inimigos. Ma tienen permanentemente interesos”. Este prensipyo de intereso devra rijar la politika de Israel en los anyos venideros enverso la Gresia, Shipro i la Turkiya. La difikulta será de poder entretener buenas relasyones stratejikas i ekonomikas kon estos payizes sin mesklarse a la inimista ke egziste dezde anyos entre las partes gregas i turka. Los konfliktos enter eyos no están para ser reglados en las kestyones konsernando la soveranita sovre las islas i sovre las aguas de la mar Ege o sovre la rekonosensya de la partisyon de la isla de Shipro entre gregos i turkos. A esto si ajustamos la probabilita de deskuvrir en las aguas territorialas de Shipro gas natural sovre el kual la Turkiya insiste al nombre de los shipriyotes turkos de ser sosyo, se entiende la difikulta de poder manovrar diplomatikamente entre estos 3 payizes.
A la fundasyon del estado djudyo la Turkiya en el anyo 1949 fue el primer payis muzulmano a rekonoserlo de yure, a ser ke la Gresia no lo rekonosyo ke muncho mas tadre en el anyo 1990. I esto, siendo obligada de rekonoser de yure Israel sovre la kondisyon de la Karta de la Union Evropea (UE), ke demanda a todo muevo miembro de azerlo. No se pode dizir ke la Gresia i Shipro eran asta los dalkavos 9 anyos amigos de Israel. Mos akodramos kon tristesa ke en el anyo 1980 la Gresia fue la ke se okupo a ke el OLP sea rekonosido diplomatikamente por la UE, i ke este movemento terroristo resiva el statuto diplomatiko kompleto en Gresia. Ademas el primer ministro de la epoka Andreas Papandreou resivyo kon onores al líder del PLO Yasir Arafat en su payis, después ke este sinyor i su banda de terroristos fueron ekspulsados en 1982 del Libano. La dependensya de la Gresia sovre su menester de petrol, la ovligo a ser antisimpatik a Israel porke kalia ke estara en buenas relasyones kon los payizes del Golfo Persiko, pretenden oy sus dirijentes. Ademas el antisemitizmo no avia peryido, a todos los niveles de la sosieta grega, su alto grado, malgrado ke kedo oy una muy chika komunidad djudia, onde la mayoriya de los djudyos gregos fueron departados i matados por los nazistos.
Las kozas oy trokan. Israel de fakto izo la pas kon los payizes importantes del Golfo. Esto lo ayudo en los dalkavos 4 anyos a ke ayga una kooperasyon jeneral i serkana entre el la Gresia i Shipro. Enteresante es de ver ke el ijo de Papandreou, George, fue el ke amelyoro la situasyon kon Israel en vijitando Yerushalayim en 2010. Por su puesto kale ver kualos son los elementos ke ayudaron a la luna de miel egzistente entre Israel Gresia i Shipro. Eyos son 2, el primer es la deskuvierta del gas en el este del Mediteraneo i el sigundo la deskonfiensa enverso la politika turka.
Es importante para Israel de azerse eksportador de enerjiya verso la UE, dunke las partidas devran lavorar mano kon mano para abasteserles el gas. Se planifia de establisir un gasoduk entre los 3 payizes, proyekto muy karo ma no imposivle a ser relizado malgrado ke la Administarsyon Amerikana no lo apruvo. De otro lado los 3 payizes se metieron de akordo para atar sus sistemas de elektrisita a traverso la mar kon un kablo yamado ‘Euro-Asia interconnector’ ke será pronto en 2024. Ansi los gregos poderan merkar la elektrisita israeliana kuando les mankara. Aparte de los akordos ekonomikos, la Gresia i Israel impesaron a kolaborar sovre kestyones de defensya i es ansi ke los gregos merkaron de la kompaniya Elbit Systems, en 2021 por 1.68 miliardas de dólares un sentro de simulasyon para antrenar los aviatores militares.
El sigundo elemento es para Israel muy delikado visto ke las relasyones entre Gresia i Turkiya no son deltodo buenas. Konfliktos ke duran dezde anyos, sea en la mar Ege kon las aktividades militaras gregas, sea en la separasyon de Shipro ke no se solusyona i si se ajusta a esto la kestyon de apartenensa de los derechos de las zonas ekonomikas del este del Mediteraneo onde egziste gas, los manaderos interesados de las relasyones Israelo-Turka se demandan kon razón komo Israel tomara de mano las dos partes.
La Turkiya aze su mea kulpa por su politika mala de los 13 dalkavos anyos enverso Isrel i mira de establisir muevas relasyones kayentes. Eya aze esforsos semejantes kon el Ayifto, los Emirates i la Arabia Saudita. Su buto es de salir de la soledad diplomatika en la kuala se topa en el Medyo Oriente. La peryoda de las revolusyones islamistas a traverso el mundo arabo paresen ke no dieron resultado i es sovre esto ke el prezidente Tayyip Erdogan mira de amelyorar las relasyones kon Yerushalayim. El líder turko al anyo vinidero afrontara eleksyones muevas i kon una inflasyon de 79 por sien en el payis no se topa en buena situasyon. El deklara ke si un gasoduk deve estar echo para trayer el gas israeliano a la UE el mijor kamino sera a traverso la Turkiya.
No se save, si Tayyip Erdogan kedara en poder i kulo sera su politika enverso Israel, en kavzo ke keda prezidente, en los anyos vinideros. Si va insistir komo en el pasado a alikodar los teroristos del Hamas i a mirar de kontinuar su politika islamista. De otro parte ser serkano de Ankara deranjara por siguro Atena. Muy difisil sera para el muevo governo israeliano de baylar en 2 bodas en mizmo tiempo.
Comments