top of page

EL RABINO I EL SHOFOR DE TAKSI




Un rabino esta kontando ke una vez tuvo una konversasion kon un shofor de taksi ke era katoliko. Le demando al rabino si los rabinos se kazan. El rabino le disho ke no solo son permetidos de kazarsen, sino ke son ovligados de kazarsen. ‘Multiplikar’ es un orden del Dio para todos, no emporta de ke kariera o de ke pozision sos en la komunidad’

‘En esto, los judios pensaron mijor ke los kristianos. En mi komunidad, kuando uno esta saliendo kon una manseva, i esta konfundido, o si esta pasando de una situasion difisil en su kazamiento, o si tiene menester de konsejo sovre komo disiplinar sus ijos, a ken devemos de adresarmos? A muestro papaz selibater? El no tendriya dinguna idea de lo ke sinyifika peleyar kon su mujer, siguramente no tiene una kreatura fuerte. Si tengo una kestion relijioza, o si tengo menester de saver kualas orasiones devo de azer, siguro ke devo de irme al papaz. Ma los problemas de la vida de kada dia, en esto, el papaz no puede ayudarme’.

‘Los komentarios del shofor me akodraron de una verdad emportante’ disho el rabino. ‘El judaizmo no aze dinguna diferensia entre “ombre de relijion” i “avokato”. Seyga ke sos un rabino o un shofor, kale ke bivas una vida “normal”, gerreyando kon los problemas de kada dia, i tomando plazer de las kozas ermozas ke la vida mos prezenta’.

La santidad i la moralidad no son solo por los ombres de relijion. El ideal de la Tora es krear una sosiedad de personas kon moralidad, i atados a sus relijion. Kada persona deve de bivir en el mizmo nivel i kada uno de mozotros puede tener un dialogo direkto kon el Dio.

El rabino ayuda a las personas a sovrepasar las realidades de la vida, i instilar el espirito. El tiene de azer la mizma koza tambien en su propria vida.

Komo puede el papaz entender los problemas de un marido, i de un padre? El no tuvo dinguna eksperiensia en esto. Ma, el rabino puede entenderlo. El rabino es kazado i tiene kreaturas. El es una persona komo tu i yo, i bive la mizma vida. El rabino no es el gardian de la savidura espritual.

Todos puedemos bivir una vida relijioza. Bivir una vida relijioza no detiene dingunos de ir al lavoro kada dia. La vida tiene munchos problemas. Kuando es menester, el rabino ayuda a su mujer en los echos de kaza, se okupa del bebe. El ombre de relijion, komo todos mozotros, puede tener problemas kon su famiya, dias tristes o dias alegres. Sino, komo puede entender los problemas de su puevlo. Los rabinos dan konsejos sovre la edukasion de la famiya, i si es menester, gerreyar kon los problemas de la famiya.

El judaizmo es una forma de bivir, no es solo una relijion. El rabino es semplemente una persona ke konose la ley i las praktikas judias. El es profesor de relijion. La relijion judia es bazada en la kaza, en el shabbat, i en las fiestas, El fokus del judaizmo es la forma ke bivimos muestra vida: dar emportansa a la edukasion, ayudarmos de unos a los otros, partisipar en la komunidad, i azer buendad. La forma de vida en el judaizmo es mas emportante de las orasiones de kada dia.














Comments


Bizi Takip Edin
  • Facebook Basic Square
  • Twitter Basic Square
  • Google+ Basic Square
bottom of page