EL PUEVLO DEMANDA PAN

(Teksto-Audio)

(Yazarı sesli dinlemek için tıklayınız)

Las dalkavo menasas echas kontra Israel por Hassan Nasrallah el sekretaryo jeneral del Hezbollah de atakar los pozos de gaz, no son vistas seryozas por todos los manaderos politikos del Medyo Oriente. Palavras dichas en el aver, visto ke Israel save sovreguadrar sus aguas i sus establesimyentos de perforasyon en el Mediteraneo, i ke una aksyon semejante kavzara grandes danyos en el Libano.

Antes de amenazar a Israel i amostrarse komo el uniko protektor del Libano i de sus manaderos naturalos, es ke el se puede demandarse de si para si, deke su partido politiko- ke no es mas ke el ramo de las Guardias Revolusyonarias del Iran- aze todo su posivle i mira a ke el payis del cedro kayga en una povredad grande, onde su povlasyon es muhtach a un bokado de pan.

El sivdadino demenesterozo libanezo demanda ayudo urjente de su governo para pueder merkar pan i yevarlo a kaza, no le enteresa ke el se okupe de mirar de kitar gas de la mar. Ademas este sivdadino prove save muy bien ke si mizmo el governo será kapache de arankar el gaz del fondo de la mar esto tomara anyos antes ke trayga azlaha para el puevlo.

Por otro lado, probabilmente el sivdadino libanezo save lo ke se esta pasando sovre el konflikto territorial entre Israel i el Libano i ke en unas kuantas semanas vinideras Israel ampesara a pompar el gaz del pozo de Karish para venderlo a la Evropa, la kuala se topa en una situasyon dezesperada despues del ambargo Ruso. Esto ya esta savido i aprovado sea por los payizes vizinos arabos de Israel sea por la burokrasiya de Bruksel. El Ayifto, los payizes Evropeos i los Estados Unidos enkorajan a Israel a pompar el gaz de Karish i no achetan de kual ker manera a ke el Iran a traverso su proksi se meskle de las operasyones, en amenazando de bombardear el sitio.

Komo se save Israel pompa gaz de otros pozos en su posesión, lechos del Libano el kual será en parte vendido a los evropeos en haveransya kon el Ayifto ke tiene unidades de likefaksyon lo ke permete a pueder transportarlo kon naves. Esto kere dizir ke el gaz israeliano se azera en serka parte de ‘la doktrina de seguridad de la Evropa’. No ay duvda kon las 100 miliardas de metro kubos de reserva de Karish ke se topa serka de la frontiera marítima del Libano Israel va dublar la kuandidad de vendida a los Evropeos.

Entremientes el Libano kedara espektador a este evenimiento muevo sin pueder profitar en el futuro del gaz ke eventualmente se topara en la zona de konflikto en el mar Mediteraneo entre Israel i el Libano si no se topa una solusyon de partaje de la aguas de esta mar, koza ke el Iran mira de impedir. El governo libanezo kon su politika de avestruz(devekushu) enkashando su kavesa a la arena en deklarando kozas komo ‘ser orgoyozo’ ‘tener dinyita’ ‘la importansya de la rezistensya al inimigo’ i mas, no azera por seguro nada de bueno para su puevlo. Nasrallah kontinuara a azer deklarasyones de inimista en el ayre en inventando sloganes de amenazas, nada mas.

Ma la realita es ke el puevlo libanezo kontinuara a azerse mas prove i mas desnudo. Munchos entre eyos no puederan merkar pan o pagar la elektrisita. El sistema edukativo i de sigurita sanitarya kontinuaran a kayer i mizmo a despareser. El komporto de Nasrallah i sus menasas no trayera nada de bueno al payis ke de aflakarlo mas. Seve oy en dia ke este payis un tiempo yamado la ‘Suissa del Medyo Oriente’ se esta derokando desi para si i en vista no ay dinguno ke lo puedera salvar. Los payizes del oksidente miraron de ayudar, ma en vano.

Kuando Israel apuyado por la komunidad internasyonala esta determinado a profitar del gaz de Karish, el Libano kontinua a seguir su lojika non rezonavle a abrasar kon fuersa el Iran, lo ke kere dizir ke en un serkano futuro Beirut peryera toda su otoridad. La inyorensya i la korrupsyon de los dirijentes un dia aparejaran la sentensya de la muerte del Libano. Pekado de ver la indiferensya de los otros payizes arabos enfrente la sufriensa de sus ermanos libanezos i de no ajuntarse kontra el Iran para ke los mollas kiten sus manos de este payis. Parese ke la eksperyensa negativa ke tuvyeron en ayudando a los arabos de Palestina en 1948, en 1967 i en1973 kontra Israel les desho una boka amarga ke los impide de trayer asistensya esta ves a los libanezos. Pekado.

Yazarın tüm yazıları için tıklayınız