EL PROBLEM IRANIANO

(Teksto-Audio)

Por el Dr. Selim Salti

“El ke kere gerra deve en primero kalkular su koste” dize el proverbo chinezo.

Del espanto de ser matados mizmo por su puevlo los zealotes iranyanos, los ayetullahes, miran de krear un imperio shiito en el Medyo Oriente en dominando el Irak, la Siriya, el Libano, el Yemen i puede ser la Arabia Seudita en okupando la Mekka, lugar santo del Islam. Ademas purfian de fabrikar bombas atomikas ke pensan ke eyas los protejaran de un atako viniendo del oksidente, inimigo del rejimen diktatoryal aktual. En mizmo tiempo eyos deklaran ke en los 5 anyos vinideros serán kapaches de destruyir Israel, inimigo de la uma islamika, establisido en tyerra muzulmana, la Palestina, kon el ayudo del oksidente.

Ali Khamenei guido supremo del rejimen no pensa kualo esto reprezenta, siendo siegado de inimista i de sanyo enverso la uma djudiya israeliana. No le gusta pensar las konsikuensas ke si un diya ataka Israel kual será el koste de esta aksyon? Poko lo importa lo ke pensa la kaye pasivista iranyana, ke se siente en dezakordo kon la manera de rijir el payis kompozado de iranyanos, azerís, arabos i mas.

Israel dezde su kreasyon se topo menasado por el mundo muzulmano. Durante munchos anyos los sunnitos miraron de eliminarlo, ma no parvinyeron i agora los shiitos keren provar a sus tornos de derokarlo. Kualo ke Israel aga, esto es la kestyon ke preokupa los governos israelianos i sovre todo el aktual. Israel apoyado por los Estados Unidos deklara de la boka de su primer ministro Benyamin Netanyahu ke nunka permetera a ke el Iran poseda la arma nuklearya. Komo impedirlo kuando se save ke el payis tiene las personas savidas i kompetentes para la fabrikasyon del armamento sofistikado ke es nesesaryo para esta bomba.

Anyos durante, lideres en Washington, en Yerushalayim i en otras kapitalas deklararon ke no permeteran a ke la bomba atomika iranyana veyga el diya. Penalidades i ambargos ekonomikos i komersyales le fueron aplikados afin ke los ayetollahes se esvacheyan de produizir la bomba. Akordos fueron sinyados a este sujeto ma los Estados Unidos en el tiempo de Trump dechizyeron de travarse de eyos. Despues dos anyos enteros pasaron en enkontros sin resultado dando ansi la okazyon al Iran de enrekeser su uranyom. Los tiranos de Teheran kaji arivaron a sus butos de ser miembros del klub serrado de los possesores de la teknolijia nuklearya.

Ademas malgrado todos los akordos echos en los anyos pasados sovre los kualos el Iran no podera enrikeser el uranyum mas de 5 por sien, en los 2 dalkavos anyos el fue kapache de arivar a 83.7 %. Lo ke kere dizir ke kon muncha fasilidad los iranyanos ariveran a tener elementos de 90 % nesesaryos para la fabrikasyon de la bomba. Israel sovre esto devra tomar la dechizyon de bombardar las unitas de fabrikasyon de armamento i de enrekisamiento del uranyom enjuntos kon los Estados Unidos. Ma la administrasyon Biden dezde ke esta en poder mira a ke el Iran retorne a la meza de negosyasyones i se mostra flosha a atakar las instalasyones de uranyum. La prova es ke todo en apoyando una intervansyon militar kon la partisipasyon de Israel, de la Evropa i de los Estados Unidos, el porta boz del Departamiento de Estado Ned Price deklaro en pasadas en dizyendo “Keremos ver una rezolusyon pasifika, duravle para el program nuklearyo del Iran i ke los Estados Unidos están prontos azer todo el nesesaryo para parvenir a eya. Kontinuamos a pensar ke la diplomasiya es el mas efektivo kamino para alkansar a un akordo”. Dunke al dia de oy Israel es solo a poder intervenir militarmente kontra el Iran.

Igualmente las remarkas echas por el kapo de la IAEA (el bekchi, guardyan, del nuklearyo) Rafael Grossi ke no será achetavle ke Israel bombarde las instalasyones nuklearyas del Iran, koza ke no será legal de punta de vista las leyes internasyonalas, mete Israel en estrecho de no saver kualas serán las konsikuensas diplomatikas de un atako ke kreera por seguro un konflikto militar al nivel mundiyal. Pekado ke este sinyor ke no es otorizado a azer deklarasyones politikas se permetyo en su dalkava vijita en Teheran a tener un langaje pro-iranyano. Todos estos faktos mostran en ora aktuala ke los dirijentes iranyanos se sientes liberos de azer lo ke keren, sin espanto de tener reperkusyones seryozas. Bien entendido la situayon aktuala krea tansyones en el Medyo-Oriente i mete en perikolo la rejyon i el mundo. No es difisil de profesiar ke se puede asperar un konflikto militar durante estos dos anyos vinideros.

Yazarın tüm yazıları için tıklayınız