top of page

BASKET DJUGO DJUDYO?




(Teksto-Audio)










En mi chikes biviendo en Estambol, no devia tener mas de 11 anyos kuando mi ermno el grande (agabey) me avia yevado al salón de spor de la YMCA para ke ampese azer jimnastik kon los chikos miembros del Betar, organizasyon sionista revizyonista. Me iva una ves a la semana onde renkontrava munchos de mis amigos de eskola i de la maale. El mas grande plazer muestro era de ver, despues de muestra seans, de asentarmos al bodre de la pista de basketball (basket) para ver los miembros mas grandes de mozotros, los djovenes de18/20 anyos, antrenearsen en forma de dos ekipas ke djugavan kon la pelota kaji una ora.


No se komo fue, una tadre los dirijentes eskojyendo de entre mozotros unos 20 chikos para ambezarmos a djugar el djugo ke mos gustava, el basket; me tomaron i a mi. No podesh imajinarvos mi alegría de ser eskojido i el plazer ke tomava en los antrenamientos.


Anyos pasando me ambezi a bien djugar komo ‘guard’ en la ekipa del liseo visto ke no era alto del todo, 1 metro 70 de talia. Ma era kapache de pasar kon una prestor remarkavle mis adversaryos i markar el punto. Ademas era un buen ‘shutor’ a 3 puntos de los 2 kantonos paralel a la ‘pota’. Dezde de akea epoka ke ay mas de 61 anyos nunka no manki a enteresarme a este ramo del sport i poedo dizir ke so un fanatiko de el. Es ansi kuando ize parte de los fundadores del klub sportivo Yildirim en Estambol, (YSK, sien por sien djudyo) al kual tuve la onor de prezidarlo 7 anyos, nunka manki de azer esforsos para ke la ekipa de basket gana el shampiyonado en la liga de la sivdad. Koza ke muestros djugadores reusheron a munchas vezes grasyas a medyanos ke les metimos a sus disponibilidades. Ademas la ekipa de basket tuvo munchos sustentadores, me akodro en una final, kaji 3 mil de eyos estuvieron presentes para ver la ganar, koza ke afito i no me olvido la alegría i el ardor ke los fanatikos djudyos de basket avian mostrado akeya tadre kon bandieras i sloganes de joya.


En los anyos onde fui studyente en la Universidad de Estambol, me akodro ke me avian invitado a azer parte de la ekipa de basket, koza ke refuzi despues de aver djugado en los enkontros universitarios de Turkiya en Ankara, por kavza de no tener tiempo libero para antrenarme komo se devia. Ansi se eskapa mi vida sportiva.


Para mi los basketores famozos djudyos de Estambol, en mayoriya eran de una jenerasyon antes de la miya los kualos fueron mis idoles. Vos enumero unos kuantos de eyos ke me tresaliya de verlos djugar, komo Mordo Habib, Beto Levis, Aron Habib, Moris Kohen, Isak Yavuz Arditi, Niso Behar, David Filiba i Henri Duenyas. Todos eyos azian partida de la ekipa de Fenerbahche. Se puede dizir ke avia ‘minyan’ en esta ekipa. Ademas ajustare Avram Barokas, Silvyo Gershon, Jak Habib grandes djugadores de basket, los kualos fueron mis amigos. La mayoriya de estos sportivos djudyos izyeron parte de la ekipa de basket nasyonala turka i siempre ke ganavan en las kompetisyones internasyonalas, toda la prensa de Turkiya no se arestava de mensyonarlos ke eran djudyos. Una manera para mozotros sivdadinos djudyos de sintirmos orgoyozos de ver sus fotos en los jurnales.


Komo se save el basket fue enventado por James Naismith en 1891 en los Estados Unidos en la YMCA de Springfield. La razón por la kuala toda la terminolojia del djugo es en ingles amerikano. En poko tiempo se izo muy popular i en Nueva York onde bivian la mayoriya de los djudyos en el prensipyo del 20en siglo, el fue el sport preferado de los mansevos djudyos. Barney Sedran, Max Friedman i Louis Sugarman fueron los mas famosos djugadores djudyos de akea epoka. Los basketores djudyos fueron los ke influensaron a ke este ramo sportivo se espande en toda la Amerika. Es ansi ke en 1946 kon la kreasyon de la Asosyasyon de Basket de la Amerika (NBA) se pudo organizar una liga entre las sivdades importantes del payis. El renomado Oscar Benjamin Schectman (Ossie) ijo de parientes imigrantes de Rusia marko el primer punto profesional de la istorya moderna del basket. La ekipa N.Y. Knicks tuvo munchos djugadores djudyos komo Sidney Herzberg i el famoso Bob Cousy.


Una de las karakteriskas del basket moderno es el shut a 3 puntos afuera del arko de la pota a 7.24 metros de eya. Esto fue introduizido por el djudyo Abe Saperstein el fondador de los Harlem Globetrotters el kual avia fondado la American Basketboll League en 1961 por no estar deakordo kon los dirijentes de la NBA. Ma la vida de la liga fue kurta ke desparesyo en 1963 i se ajunto kon la NBA de muevo la kuala adopto todas las muevas reglas ke Saperstein via establisido. Todo esto mos da a entender la influensa grande ke los djudyos tuvieron en este ramo del sport moderno ke se izo muy popular a traverso el mundo i en partikular en Israel.








Bizi Takip Edin
  • Facebook Basic Square
  • Twitter Basic Square
  • Google+ Basic Square
bottom of page