AZEYTE DE OLIVA SALTI

En estos diyas de estrechura, en gerra kon el Hamas, imajinavos ke fuimos kapaches en famiya sin muncho ayudo visto ke los lavorantes agrikultores asiatikos no kijeron salir al kampo del espando de resivir bombas en la kavesa, a arekojer diferentes tipos de azitunas i azer azeyte a saver: Surri, Barnea, Koroneiki, Pichual fransez.   Mizmo yo, a mi edad avansada estuvi meneyando kon un aparat espesial los arvoles para ke las azitunas kaygan ariento de un file ke espandimos debasho de los arvoles mansevos.

Ampesimos a lavorar demprano las demanyanadas fina las 1.30 del medyo dia a arekojer azitunas vedres i pretas i meterlas en sakos de 20 kilos. Una ves ke metimos los sakos en la kamionet, mi ijo Moni, mi inyeto Roy i el guertalano muestro Hagay, el primer dia se yevaron kaji medya tona de azitunas al atelye onde se esprimyeron sovre un sistema moderno ke dyo la azeyte distilada, la kuala fue stokada en botas de acero inoksidable de 50 litros.  Fuimos muy atentivos a ke toda la prosedura no depase las 4 oras del momento ke las azitunas se metieron en sakos sin ke token la tyerra. Porke mas se tadra mas la agror de la azeyte puja.

La agror de una buene azeyte devra ser entre 0.7 a 1.1 mililitro % maksimum. Mazal, la muestra el primer diya salyo a 0.94, al sigundo, 0.76 i al treser 0.73. Muestra kontentes fue grande.  Solo tres diyas podimos lavorar porke mos aviamos sintodos muy kansos i regretimos ke no fue mazal de arekojer las azitunas de los arvoles ke aviamos ensembrando anyos antes.

Komo la sezon se eskapa al medyo del mes de Novembre, el atelye no lavorando, abandonimos tonas de azitunas a kedar en los arvoles. Ademas si la azituna kaye en tyerra, no sierve mas para ser esprimida i tomarle la azeyte, visto ke es una fruta ke se oksida fasilmente. Malgrado esto arekojimos azitunas pretas i vedres para komer. Kavanozes inchimos veremos en los mezes a venir el resultado.

30 anyos antes kuando mos izimos haver del moshav Rishpon onde moramos las 3 familyas Salti los kampos muestros estavan yenos de portokales, klemantinas, limones i avokados. Poko anyos despues me rendi kuento ke la agua kara, el mirado kostozo no valia la pena de azer kreser estas frutas. Ansi desidimos mis ijos i yo a trokar los arvoles. Todo en guadrando siertos de eyos desidimos te plantar arvoles de azitunas. En primero, en el anyo 2001 plantimos 3.5 dunames ke mos dieron frutas 6 anyos mas tadre. El resultado siendo pozifivo en 2019 desidimos de plantar otros 7.2 dunames. Son los arvoles de estas tyerras ke me dieron una buena rekolta. En despartes mis ijos para sus guertas personalas sembraron por ermuzura unos 38 arvoles los kualos no estan dando fruta.  Visto ke la azituna manchando i ensuziando muncho su doredor si no se arekoje, kada anyo es uzo de kortar las flores para ke no ayga frutas.

Esta sezon fue la primera ke podimos azer azeyte, mas de 200 litros. Sufizente para el demenester de la famiya entera. Bien entendido unas 50 ridomas fueron rezervadas para los amigos. No dechizimos a venderla, visto ke la kuantidad es chika, ma esto mos ankoraja para los anyos vinideros onde pensamos ke la produksyon depasara los 700 litros.  En todo kavzo si la azeyte Salti tendrá sukseso, al anyo vinidero su presyo será alto i todas las entradas servirán a alimentar el budjetto de la Funsayon Salti ke distribuara estas entradas adisyonalas, komo kada anyo, a los estudiantes universitarios.

 La gerra, las sufriensas de muestro puevlo, los mansevos ke kayen kada dia en Gazza mos atrista muncho, no kero mizmo kontarvos las desgrasyas del 7 Novembre pasado, la barbariya de estos muzulmanos fundamentalistos. Los kualos no tuvieron dinguna piadad en matando kreaturas, kemando personas i desflorando muchachikas, ademas arevatando personas para yevarlos en kaptivita. En estos momentos duros i apretados, para mi estar en los kampos kon mis keridos fue una melenzina difisil a deskrivir, sovre todo asendiendo la hanukiya kon muestra azeyte pura. Kon pasensya todo serra bien, teneremos konfiensa en muestra uma unida i fuerte.  

101 Kuentos Modernos de Djoha-Dr. SELİM YEHOSHUA SALTİ

Satın Al

Apretar al boton para ver todos los eskritos