APAREJO PARA MUEVOS AKORDOS



(Teksto-Audio)

(Yazarı sesli dinlemek için tıklayınız)



Israel en 2022 de una parte deve de aparejarse para defenderse en sinko frontes, kontra el Hamas, el Hizbullah, el Iran i Ia Siria, ma de la otra a ser rekonosido eventualmente por 3 payizes muzulmanos. Estos payizes son kon los kualos egziste un dialog politiko i ekonomiko sin relasyones ofisialas. Israel se asemeja a una “kokona” ke se renkontra solo en lo aliskuro ma no komo una sinyora en la klaredad por los dirijentes de estos payis los kualos son la Arabia Seudita, el Bangladesh i la Endonezya.


La administrasyon Biden i su sekretario de estado Blinken, demokratos en poder, dezean a sus tornos mostrar una kerensya enverso el payis djudyo i ansi dechizan a ovrar para ke Israel ayege a tener maz relasyones ofisialas kon el mundo sea arabo, sea muzulmano. Una manera de mirar de azer mijor a de akea de la administrasyon Trump.


De preferensya, visto el dialog stratejiko egzistente i el apoyo amerikano, si Israel es kapache de konvenser de una manera o otra al rey seudyano, el podera azer achetar la rekonosensya diplomatika entre los dos payizes. Para arivar a una finalizasyon semejante, la kuala es muy importante para el muevo Medyo Oriente planifyado por los amerikanos durante la prezidensya de Trump, la administrasyon amerikana devra mostrar su fuersa. Es verda, Trump no fue kapache de arivar a su buto sovre el establisimiento ofisial de las relasyones Israelo-Seudianas por ke no tuvo el apoyo demenesterozo de los dirijentes de las dos partes. Malgrado la entrevista entre el poderozo prens Salman i el primer Netanyahu en tyerra seudiana no se puido arivar a un kompromizo. Ma esto no aresto la kolaborasyon egzistente en el kampo de la segurita, del kambyamento de informasyones sekretas i de la komunikasyon entre los militares de las dos partidas. Stratejikamente la Arabia Seudita i Israel komo se save tienen un inimigo komun ke es el Iran kontra el kual se devran protejarse.


Ademas fin oy en dia los seudianos se apuyaron sovre los Estados Unidos por sus defensias kontra el Iran, ma kon la dechizyon de Biden de travarse del Afganistan i del Irak eyos se sienten peryer la proteksyon amerikana i miran de una parte de estar en kontakto kon Israel ma de la otra, malgrado el konflikto yemenito, de debatir kon el Iran. Dunke el estado aktual no esta muy konveniente para los amerikanos a forsar los seudianos a sinyar un akordo de yure kon Israel. Ma Israel si poede i si kere tiene un regalo para el rey seudiano en aziendolo el gardian del Vakf muzulmano del monte del Templo, i ansina konveserlo a ke achete la rekonosensya de Israel sin mesklar la kestyon insolvavle israelo-palestiniana.


Viniendo al Bangladesh, payiz muzulmano de 164 milyones de abitantes en el sud este de la Asia ke gano su endependensya en el anyo 1971 despues de una gerra entre ermanos muzulmanos de mezma orijin es kandidato a tener relasyones kon Israel. Israel fue el primer payis a kerer rekonoserlo, ma la politika araba de akeya epoka no permetyo a los dirijentes bengalis de achetar esta oferta i dezde de akel tiempo no tiene relasyones kon Israel. El Bangladesh aze partida de los 28 payizes ke no rekonosen la prezensya de Israel en la lista de las Nasyones Unidas i fin a poko antes en el pasaporte bengali avia la lokusyon ke no es valivle para vijitar Israel. Bien entendido aktualmente esta lokusyon fue abandonada dando ansi a los bengalis el poder de vijitar Israel si bien entendido el interesado pode obtener un viza de entrada. El kaji 90 por sien de los bengalis son muzulmanos donde el nivel per kapita de kada uno de eyos no depasa los dos mil dólares al anyo. Dunke payis povre ke nesesita a dezveloparse.


En la kapitala Dhaka bozes en favor de tener relasyones kon Israel, proveniendo de la intelijensya nasyonalista, ampesaron a ser sintidas por los dirijentes aktualos malgrado las ezitasyones de su primer Sheikh Hasina. Les parese absurdo de insistir a rekonoser solo la Palestina i dechar de lado Israel. La situasyon aktuala es diferente de los anyos 70. Oy la India i la China, las 2 potensyas vizinas de las kualas depende el Bangladesh rekonosen a un alto nivel Israel dezde 1992, porke eyos no? Un analisto politiko bengali disho mizmo en una de sus deklarasyones a la televizyon Al Jezeera, si mozos rekonosimos ofisialmente el Pakistan ke mato kaji tres milyones de muestros ermanos bengalis durante la gerra de endependesya porke no rekonoser Israel ke fue el primer a kerer ayudarmos a ser independientes. Veremos!


Para Israel en el futuro serkano lo mas importante va ser tener relasyones diplomatikas kon la Endonezya. Kon una povlasyon de 270 milyones de abitantes biviendo en 17000 izlas entre la China i el Okyanus, a majorita muzulmana la Endonezya pretende azerse una potensya mondiala. Por esta razón no se poede fuyir de no rekonoser Israel por ke esto krea un anakronizmo ke no le da ayudo a su buto. Malgrado el diktator Sukarno ke se deklaro por anyos kontra Israel su suksesor Suharto resivyo Yitshak Rabin en 1993. Shimon Peres vijito Jakarta en el anyo 2000 i el viejo prezidente Abdurrahman Wahid vino a Israel en 2003. Naftali Bennett komo ministro de la ekonomiya partisipo a la reunyon de la Organizasyon Mondiala del Komerso en Bali en 2013. Antes la korona kaji 30 mil turistos endonezyanos vijitavan regularamente kada anyo Israel. El komerso entre los 2 payizes dezde 1967 no se aresto de pujar a traverso tiersos payizes. En 1980 Israel vendyo sus Skyhawk aviones a este payis i en estos dalkavos anyos drones israelianos fueron merkados por su armada. En despartes de la presyon de la diplomasiya amerikana, la India i la China ven kon ujo pozitivo el rekonosimiento de Israel por la Endonezya.


De otra parte Israel en dia de oy es rekonosido por sesh payizes arabo ke representan mas de la mita de la povlasyon araba. Estos payizes luchan kontra el fondamentalizmo muzulmano el kual egziste en Endonezya i por esta razón de punto de vista relijiyon la Endonezya kolabora kon eyos. De mi avizo personal no kreyo ke la Indonezya kerera ajuntarse kon la Siria i el Yemen, ma al kontraryo su entereso es ser serkano de los Emirates i de la Arabia Seudita. Por esta razon pensamos ke el proksimo akordo Avraam será echo kon la Endonezya.